បេក្ខជនតំណាងរាស្រ្តជាប់ឆ្នោតប្រាំរូប មកពីគណបក្សសង្គ្រោះជាតិ ត្រូវបានបញ្ជូនពីប៉េស៊ី មកសាលាដំបូង​រាជធានី​ភ្នំពេញ ដើម្បីធ្វើការចោទប្រកាន់ ពាក់ព័ន្ធករណីកើតមានអំពើហិង្សា នៅទីលានប្រជាធិបតេយ្យ កាលពីថ្ងៃទី១៥ ខែ​កក្កដា ឆ្នាំ២០១៤ម្សិលម៉ិញនេះ។

បេក្ខជនតំណាងរាស្រ្តជាប់ឆ្នោតប្រាំរូប ដែលត្រូវបានចាប់ខ្លួន និងថតរូបនៅស្នងការនគរបាល។ (រូបថត ហ្វេសប៊ុក)

ការបញ្ចេញមតិ - ព្រហាមស្រាងៗថ្ងៃទី១៦ ខែកក្កដានេះ ស្នងការនគរបាលក្រុងភ្នំពេញ បានបញ្ជូលលោកស្រី មូរ សុខហួរ លោក ហូរ វ៉ាន់ លោក ម៉ែន សុថាវរិន្ទ្រ លោក រៀល ខេមរិន្ទ្រ និងលោក កែវ ភារម្យ មកសាលាដំបូងរាជធានី​ភ្នំពេញ។

បេសកកម្មលោកស្រី មូរ សុខហួរ ក្នុងការរំដោះទីលានប្រជាធិបតេយ្យ កាលពីថ្ងៃទី១៥ ខែកក្កដា ត្រូវបានបរាជ័យ បន្ទាប់ពីអំពើហិង្សា និងការប៉ះទង្គិចគ្នា រវាងកងកម្លាំងសន្តិសុខខណ្ឌ ជាមួយក្រុមបាតុករ។ នាពេលបន្ទាប់នោះ តំណាងរាស្រ្តជាប់ឆ្នោតទាំងបួនរូបខាងលើ ត្រូវបានហៅសាកសួរ ក្នុងទីលានប្រជាធិបតេយ្យដែលកំពុងស្ថិតក្រោម ការហ៊ុះព័ទ្ធដោយរនាំង និងបន្លាលួស និងកម្លាំងសមត្ថកិច្ចចម្រុះ។ បន្ទាប់គ្នានោះដែរ ក៏ត្រូវបានចាប់ខ្លួន និងបញ្ជូន​ទៅស្នងការនគរបាលរាជធានីតែម្តង។

ឯលោក រៀល ខេមរិន្ទ្រ ត្រូវបានកម្លាំងសមត្ថកិច្ច របស់រដ្ឋាភិបាលចាប់ខ្លួននាយប់ថ្ងៃទី១៥ ខែកក្កដា ក្នុងខេត្ត​កំពង់ចាម។ ការចាប់ខ្លួនតំណាងរាស្ត្រជាប់ឆ្នោត ទាំងប្រាំរូបនេះ ធ្វើឡើងក្រោមបទចោទ ដឹកនាំធ្វើបាតុកម្មដោយ​ខុសច្បាប់ និងបង្កហិង្សាលើអាជ្ញាធរមានសមត្ថកិច្ច។

នាព្រឹកថ្ងៃទី១៦ ខែកក្កដានេះ តាមបណ្តោយផ្លូវមុខតុលាការ និងច្រកសំខាន់ៗជុំវិញតុលាការផ្សេងទៀត ត្រូវបាន​ដាក់ពង្រាយនូវក្រុមនគរបាល រនាំងដែក និងរបាំង ជុំជិត និងបិទផ្លូវមុខតុលាការសាលាដំបូង រាជធានីភ្នំពេញ ផ្អាក​ការធ្វើចរាចរមួយរយៈពេល។

ស្ត្រីអាជីវករម្នាក់ សុំមិនបញ្ចេញឈ្មោះ ដែលបានលក់ដូរតាមផ្លូវជិតតុលាការនេះ បានលើកឡើងថា ការរឹតបន្តឹង​សន្តិសុខនៅមុខតុលាការ ពិសេសចាប់ពីចំណុចអាងទឹកអូឡាំពិក រហូតដល់រង្វង់មូលនាងគង្ហីងដូច្នេះ វាជាទំលាប់ និងក៏ទង្វើដែលធ្លាប់មាន ក្នុងពេលកន្លងមករបស់តុលាការដំបូង រាជធនីភ្នំពេញ។ អ្នកស្រីបានបន្តថា ពិសេសករណី​នេះ កើតមាននៅពេលសាកសួរ ឬសម្រេចសេចក្តីលើបុគ្គលណាម្នាក់ ដែលមិនស្របនឹងរដ្ឋាភិបាលលោក ហ៊ុន សែន នោះប្រាកដជាជាប់ពាក់ព័ន្ធថាក្រុមបក្សប្រឆាំង ដូចករណីកម្មករ សង្គមស៊ីវិលនាពេលកន្លងមកជាដើម។

ការចាប់ខ្លួនតំណាងរាស្រ្តជាប់ឆ្នោត គណបក្សសង្គ្រោះជាតិនេះ ត្រូវបានមតិប្រជាពលរដ្ឋមួយចំនូនលើកឡើងថា គឺជាគ្រោងការនៃជនបាតដៃទីបី ដែលមានមេបញ្ជាមួយច្បាស់លាស់ ស្ថិតក្នុងជួរដ្ឋាភិបាល។ លោក វង្ស សម្បត្តិ ពលរដ្ឋរស់នៅក្នុងរាជធានីភ្នំពេញ បាននិយាយថា លោកមើលឃើញការចាប់ខ្លួនរបស់សមត្ថកិច្ច ទៅលើតំណាង​រាស្រ្តបីរូប ដែលត្រូវបានដាក់ឃ្នោះ និងចងស្លាបសេកទៅក្រោយទាំងអស់នោះ ប្រៀបដូចជាចាប់ឧក្រិដ្ឋជន។

រីឯប្រធានស្តីទីគណបក្សសង្គ្រោះជាតិ លោក កឹម សុខា វិញ បាននឹងកំពុងធ្វើសន្និសីទកាសែត នៅទីស្នាក់ការ​កណ្តាល នៅចាក់អង្រែនាព្រឹកម៉ោង៩នេះ ពាក់ព័ន្ធនឹងការចាប់ខ្លួនតំណាងរាស្រ្ត គណបក្សរបស់លោក ក្នុងហេតុ​ការណ៍​ហិង្សាកាលពីថ្ងៃទី១៥ ខែកក្កដាម្សិលម៉ិញនេះ។ ក្នុងថ្ងៃដដែលនេះ នាវេលាម៉ោង​១១រដ្ឋលេខាធិការ​ទីស្តី​ការ​គណៈរដ្ឋមន្ត្រី ដែលជាសេនាធិការរបស់រដ្ឋាភិបាលលោក កែវ រ៉េមី ក៏នឹងធ្វើសន្និសីទការសែត ពាក់ព័ន្ធនឹង​ព្រឹត្តិការណ៍ និងការឃាត់ខ្លួនតំណាងរាស្ត្រជាប់ឆ្នោត នៃគណបក្សសង្គ្រោះជាតិដូចគ្ននេះដែរ។

តាមការអះអាងរបស់អ្នកនាំពាក្យ សាលារាជធានីភ្នំពេញលោក ឡុង ឌីម៉ង់ កាលពីព្រឹកថ្ងៃទី១៥ ខែកក្កដាម្សិលម៉ិញ យ៉ាងហោចណាស់ក្រុមសន្តិសុខ៣៧នាក់ បានរងរបួស ក្នុងនោះមាន២ នាក់ ស្ថិតក្នុងសភាពសង្គ្រោះបន្ទាន់។ សម្រាប់​សង្គមស៊ីវិល ក៏បានអះអាងថា បាតុករជាង១០ នាក់ បានរងរបួស ក្នុងការប៉ះទង្គិចនោះដែរ៕