នាយកសាលាមួយរូប ត្រូវបាននគរបាលកម្ពុជាឃាត់ខ្លួន ពីបទបានធ្វើពេស្យាចារ ទៅក្មេងស្រីជំទង់ៗជាច្រើននាក់ ទៅឲ្យម្ចាស់ជំនួយបរទេស។ នេះបើតាមការប្រកាសឲ្យដឹង របស់នគរបាល ខេត្តសៀមរាប ដែលជាខេត្តសម្បូរ​ពោរពេញដោយទេសចរណ៍ របស់ប្រទេសកម្ពុជា។

ស្ត្រីរកស៊ីផ្លូវភេទ នៅតាមដងផ្លូវក្នុងរាជធានីភ្នំពេញ កាលពីខែកក្កដា ឆ្នាំ១៩៩៤។ រូបថត រ៉យទ័រ។

ពេស្យាចារ - ប្រធាន​អង្គការ Underprivileged Children School លោក ឡុង វេហា អាយុ៣២ឆ្នាំ ត្រូវបាន​នគរបាល​ប្រឆាំង​ការជួញដូរ​មនុស្ស ​និង​ការពារ​អនីតិជន​ខេត្តសៀមរាប ចាប់ខ្លួននៅថ្ងៃអង្គារ ទី៨ ខែកក្កដា ហើយបានត្រូវ​បញ្ជូនទៅកាន់តុលាការ ដើម្បីធ្វើការសាកសួរ នៅថ្ងៃពុធ មួយថ្ងៃក្រោយមក។

មេដឹកនាំអង្គការរូបនេះ ត្រូវបានចោទប្រកាន់ ថាបានប្រើប្រាស់គម្រោង ក្នុងនាមជាអង្គការមនុស្សធម៌ ដើម្បី​បញ្ជូន​កូនសិស្សជំទង់ៗ ដែលខ្លួនទទួលយកមកចិញ្ចឹម ឲ្យទៅបម្រើសេវាកម្មផ្លូវភេទ សម្រាប់ជនជាតិបរទេស ជាម្ចាស់​ជំនួយ។

លោកស្រី ដួង​​​ ថាវរី នាយ​​​ការិយាល័យ​​​​​​នគរ​​​បាល​​​​​​ ប្រឆាំង​​​​​​ការ​​​ជួញ​​​ដូរ​​​មនុស្ស​​​ និង​​​ការ​​​ពារ​​​អនីតិជន​​​ខេត្ត​​​សៀម​​​រាប​​​ បាន​​​ថ្លែងឲ្យដឹង​​​ថា លោក​​​ ឡុង​​​ វេហា​​​ ត្រូវបាននាំខ្លួនទៅកាន់ផ្ទះ​​​ជួល​​​របស់​​​គាត់​​​ កណ្ដាល​​​ក្រុង​​​សៀម​​​រាប កន្លែង​​​ដែល​​​គាត់​​​ស្នាក់​​​នៅ​​​ជាមួយ​​​កូន​​​សិស្ស​​​វ័យ​​​ជំទង់​​​៩នាក់ ​​​នៅ​​​ពេល​​​គាត់​​​ត្រូវ​​​បាន​​​ចាប់​​​ខ្លួន​​​ ដើម្បី​​​ប្រមូល​​​ភ័ស្តុ​​​តាង​​​បន្ថែម​​​ទៀត​​​ មុន​​​ពេល​​​បញ្ជូន​​​គាត់​​​ទៅ​​​តុលាការ​​​។

លោកស្រីបានបញ្ជាក់ទៀតថា យ៉ាងហោចមានកូនសិស្សចំនួន៤នាក់ បានក្លាយជាជនរងគ្រោះ ពីក្នុងចំណោម​កូន​សិស្សវ័យជំទង់ទាំង៩នាក់។ តាមច្បាប់របស់ប្រទេសកម្ពុជា ប្រសិនបើ លោក ឡុង​ វេហា ត្រូវបានរកឃើញថា​មាន​កំហុសមែននោះ លោកនឹងត្រូវមានទោសជាប់ពន្ធនាគារ៥ឆ្នាំ។

ជំហានទៅដល់ការចាប់ខ្លួន នាយកអង្គការរូបនេះ ដោយសារការទម្លាយប្រាប់នគរបាល់ ពីសំណាក់អតីតអ្នក​ធ្វើ​ការ​ស្ម័គ្រចិត្តមួយរូប  ដែលធ្លាប់ធ្វើជាគ្រូបង្រៀនភាសាអង់គ្លេស ឲ្យសាលារបស់អង្គការនេះ។

គម្រោងសាលារៀន ឬមជ្ឈមណ្ឌលរបស់អង្គការក្រៅរដ្ឋាភិបាល ដើម្បីទទួលជនទីទ័លក្រ ជនងាយនឹងរងគ្រោះ និង​ជនកំព្រាក្នុងប្រទេសេះ បានកើតមានកាន់តែច្រើនឡើង។ ពីក្នុងចំណោមនោះ មួយចំនួនធំបានបើកទ្វា ដោយគ្មាន​ការត្រួត​ពិនិត្យច្បាស់លាស់ ពីសំណាក់អាជ្ញាធរឡើយ។

ប្រធាន​អង្គការ​សកម្មភាពដើម្បី​កុមារ ​ប្រចាំនៅ​ប្រទេស​កម្ពុជា លោក សំលៀង សីលា បានថ្លែងថា៖ «នេះជាសញ្ញា​មួយ​ប្រាប់ទៅអាជ្ញាធរ ដើម្បីធ្វើការប្រុងប្រយ័ត្ន ទៅដល់គម្រោងនានាទាំងនោះ»៕