សហព័ន្ធបាល់ទាត់នៃប្រទេសកាមើរូន បានបើកការស៊ើបអង្កេតមួយ ទាក់ទងនឹងការសង្ស័យ ពីការប្រកួតបន្លំ រវាង​ក្រុមបាល់ទាត់ជំរើសជាតិរបស់ខ្លួន ជាមួយនឹងក្រុមបាល់ទាត់ នៃប្រទេសក្រូអាស៊ី កាលពីថ្ងៃទី១៩ ខែមិថុនា កន្លងទៅ នៅបាល់ទាត់ពិភពលោក ប្រទេសប្រស៊ីល។ ការប្រកួតបន្លំនេះ ត្រូវបានបង្ហើបឲ្យដឹង ដោយទស្សនាវដ្ដីមួយ​របស់​ប្រទេសអាល្លឺម៉ង់ ហើយបានផ្ដោតការសង្ស័យយ៉ាងហោច ទៅលើកីឡាករជាតិកាមើរូន ៧រូប។

ក្រុមបាល់ទាត់ជំរើសជាតិនៃប្រទេសកាមើរូន។ (រូបថត AFP)

បាល់ទាត់ពិភពលោក - នៅក្នុងសេចក្ដីប្រកាសព័ត៌មានមួយ ចេញផ្សាយដោយសហព័ន្ធបាល់ទាត់ នៃប្រទេស​កាមើរូន កាលពីដើមសប្ដាហ៍នេះ បានបញ្ជាក់ថាកីឡាករ៧រូប នឹងក្លាយជាមុខសញ្ញាថា មានជាប់សង្ស័យទៅនឹង​ការ​ប្រកួត​បន្លំ រវាងក្រុមបាល់ទាត់កាមើរូន និងក្រុមក្រូអាស៊ី កាលពីថ្ងៃទី១៩ ខែមិថុនាកន្លងទៅ នៅបាល់ទាត់ពិភពលោក ប្រទេសប្រេស៊ីល។ ការស៊ើបអង្កេតនេះ ត្រូវបានបើកធ្វើភ្លាម បន្ទាប់ពីសហព័ន្ធបាល់ទាត់អន្តរជាតិ ហៅកាត់ថា ហ្វីហ្វា (FIFA) បានប្រកាសសញ្ញាកាលពីពេលថ្មីនេះ។

ការប្រកួតបន្លំនេះ ត្រូវបានទស្សនាវដ្ដីអាល្លឺម៉ង់មួយ យកមករាយការណ៍នៅក្នុងអត្ថបទរបស់ខ្លួន ដែលបានបញ្ជាក់ថា ការប្រកួតនោះត្រូវបានរៀបចំទុកជាមុន ដើម្បីលទ្ធផលមួយ ដែលបានដឹងមុនរួចជាស្រេច។ ហេតុការណ៍ដែល​ទស្សនាវដ្ដី​បានលើកឡើង បានធ្វើទៅលើការ«ភ្នាល់»ដែលគេចង់ឲ្យផ្លាស់ប្ដូរលទ្ធផល បើសូម្បីតែការដេញកីឡាករ​កាមើរូន ចេញពីការប្រកួត នៅពាក់កណ្ដាលម៉ោងដំបូង ក៏មានការរៀបចំជាមុនដែរ។ កីឡាករកាមើរូន អាឡិចសដ្រ៍ សុង (Alexandre Song) ត្រូវបានអាជ្ញាកណ្ដាលដកកាតក្រហម បណ្ដេញចេញពីការប្រកួត បន្ទាប់ពីកីឡាកររូបនេះ បាន«អុក»មួយកែងដៃដោយចំហរ ទៅលើខ្នងរបស់កីឡាករក្រូអាត ម៉ារីយ៉ូ មេនហ្សូគិក (Mario Mandzukic)។

ការប្រកួតនៅពេលនោះ មើលទៅដូចជាបង្កលក្ខណៈងាយស្រួល យ៉ាងច្រើនសម្រាប់ក្រុមកីឡាករ ក្រូអាត ក្នុងការ​យកពិន្ទុ និងស៊ុតបញ្ចូលទីរហូតដល់ទៅបួនគ្រាប់។ មិនត្រឹមតែប៉ុណ្ណោះ នៅចុងបញ្ចប់នៃការប្រកួត នៅមានជម្លោះ​រវាងកីឡាករកាមើរូន គ្នាឯង នោះទៀត។ សូមអានអត្ថបទ ទាក់ទងនឹងជម្លោះឡើងវិញ ដោយចុចនៅលើទីនេះ។

សហព័ន្ធបាល់ទាត់ នៃប្រទេសកាមើរូន បានចាត់ទុកការលើកឡើងរបស់ទស្សនាវដ្ដីអាល្លឺម៉ង់ ជាបានការ ហើយ​បានស្នើសុំឲ្យគណៈកម្មាធិការវាយតម្លៃរបស់ខ្លួន បើកការស៊ើបអង្កេតទៅលើករណីនេះ ជាពិសេសទៅលើ«ផ្លែប៉ោម​ស្អុយទាំង៧» ដែលអាចជាទិសដៅក្នុងការប្រកួតបន្លំនេះ។ ក្នុងសេចក្ដីប្រកាសព័ត៌មានដដែលនោះ បានឲ្យដឹងទៀត​ថា សហព័ន្ធបាល់ទាត់នៃប្រទេសកាមើរូន សន្យានឹងដោះស្រាយឲ្យបានឆាប់បំផុត នូវបញ្ហា ដែលធ្វើឲ្យរំខាន ដល់​កីឡាបាល់ទាត់នៃប្រទេសខ្លួន។

សម្រាប់ ហ្វីហា វិញ បានថ្លែងថា ខ្លួនមិនចង់ធ្វើអត្ថាធិប្បាយអ្វីទាំងអស់ ទៅលើករណីនេះ ដោយទុកឲ្យក្រុមអ្នក​ស៊ើប​អង្កេត ធ្វើកិច្ចការនេះឲ្យចប់ចុងចប់ដើមសិន។ សូមបញ្ជាក់ថា ការរៀបចំការប្រកូួតបន្លំណាក៏ដោយ នឹងរងនូវទណ្ឌកម្ម​យ៉ាងធ្ងន់ធ្ងរពីសំណាក់ ហ្វីហ្វា ហើយជនប្រព្រឹត្តិ ឬជននៅពីក្រោយ អាចនឹងមានទោសព្រហ្មទណ្ឌនោះថែមទៀត៕