គណបក្សប្រជាជនកម្ពុជា បានស្តីបន្ទោសគណបក្សសង្រ្គោះជាតិថា មានចេតនាទាញទម្លាក់ស្ថានការណ៍​នយោបាយ​ប្រទេសកម្ពុជា ក្រោយការបោះឆ្នោត ឲ្យធ្លាក់ក្នុងវិបត្តិធ្ងន់ធ្ងរមួយ។

ផ្លាកតាំងបង្ហាញបុរសទាំងបី នៃគណបក្សប្រជាជនកម្ពុជា របស់លោកនាយករដ្ឋមន្ត្រីហ៊ុន សែន។ (រូបថត MONOROOM.info/ D.KEO)

នយោបាយ - ក្នុងឱកាសរម្លឹកខួបលើទី៦៣នៃការបង្កើតគណបក្សប្រជាជនកម្ពុជា នៅថ្ងៃទី២៨ ខែមិថុនា ឆ្នាំ២០១៤ នេះលោកហេង សំរិន ជាអនុប្រធាននៃគណបក្សដែលកំពុងគ្រប់គ្រងអំណាចមួយនេះ បានចោទប្រកាន់គណបក្ស​សង្រ្គោះជាតិ ថាបានប្រើប្រាស់ការចរចានយោបាយក្រោយការបោះឆ្នោតសកលឆ្នាំ២០១៣ ដើម្បីកេងចំណេញ​នយោបាយ។

ជាងនេះទៅទៀតលោក ហេង សំរិន ប្រធានកិត្តិយសគណបក្សប្រជាជនកម្ពុជា បានចោទប្រកាន់គណបក្ស​សង្រ្គោះ​ជាតិ ថាព្យាយាមរុញច្រានកម្ពុជាធ្លាក់ក្នុងវិបត្តិ នៅក្រោយថ្ងៃបោះឆ្នោត។

មុនការចោទប្រកាន់ របស់គណបក្សប្រជាជនកម្ពុជាមួយថ្ងៃ គណបក្សសង្រ្គោះជាតិបានអះអាងថា ខ្លួន មានគោល​នយោបាយ ព្យាយាមដោះស្រាយវិបត្តិនយោបាយក្រោយការបោះឆ្នោត ដោយ​សន្តិវិធីឲ្យអស់លទ្ធភាព ដើម្បី​បញ្ចៀស​អំពើហិង្សា។

ចំពោះមុខវិបត្តិនយោបាយនៅកម្ពុជាលោក សូរិយា ប្រាសាទ ស៊ូប៊ែឌី អ្នករាយការណ៍ពិសេស របស់អង្គការសហ​ប្រជាជាតិប្រចាំកម្ពុជា ស្តីពីបញ្ហាសិទិ្ធមនុស្ស ក្នុងដំណើរទស្សនកិច្ចមកកម្ពុជានៅគ្រាចុងក្រោយនេះ បានផ្តល់​អនុសាសន៍​ថា គណបក្សប្រជាជនកម្ពុជា គម្បីមានឆន្ទៈពិតប្រាកដលើការ​កែទម្រង់គណៈកម្មាធិការជាតិ​រៀបចំ​ការបោះឆ្នោត គ.ជ.ប ហើយថាគណបក្សសង្រ្គោះជាតិ ក៏ចាំបាច់ទម្លាក់ចោលការធ្វើពហិការ ដើម្បីចូល​ដោះស្រាយ​បញ្ហានៅក្នុងសភា៕