ការប្រកួតរវាងអាមេរិក និងអាល្លឺម៉ង់ ដើម្បីសម្រេចក្នុងការឡើងទៅកាន់ វគ្គ១/៨ផ្ដាច់ព្រ័ត្រ នៃការប្រកួតបាល់ទាត់​ពិភពលោកឆ្នាំ២០១៤ នៅប្រទេសប្រេស៊ីលនេះ ក៏មានធ្វើឡើងដែរនៅក្នុងលំហរអាវកាសអន្តរជាតិ ហៅកាត់ជា​ភាសា​​អង់គ្លេសថា ISS។ នៅទីនោះ អាវកាសយានិកជាតិអាល្លឺម៉ង់ លោក អាឡិចសង់ឌ័រ ហ្គ័រ (Alexander Gerst) បាន​ប្រកួត​ជាមួយ សហសេវិករបស់ខ្លួនពីរនាក់ទៀត ដែលមកពីអង្គការណាស្សា (Nasa) របស់អាមេរិក ដើម្បី​បង្ហាញ​នូវ​ការចូលរួម ជាមួយនឹង​ព្រឹត្តិការណ៍ដ៏អស្ចារ្យនៅលើផែនដី។

ក្រុមកីឡាករបាល់ទាត់ នៅលើអាកាស។ (រូបថតផ្តិតពីវីដេអូ)

បាល់ទាត់ពិភពលោក - នៅក្នុងវីដេអូមួយ ដែលទើបនឹងបានដាក់ផ្សាយ ដោយស្ថាប័នអាវកាសរបស់អ៊ឺរ៉ុប បាន​ឲ្យ​ដឹងថា អាវកាសយានិកជាតិអាល្លឺម៉ង់ លោក អាឡិចសង់ឌ័រ ហ្គ័រ បានពាក់អាវជាកីឡាករអាល្លឺម៉ង់ កំពុងទាត់បាល់​ជាមួយ អាវកាសយានិកជាតិអាល្លឺម៉ង់ពីរនាក់ផ្សេងទៀត លោក រ៉េដ៍ វ៉ាយម៉េន (Reid Wiseman) និង ស្ទេវ ស្វនសុន (Steve Swanson)។ ហើយពួកគេបានយកច្រកចេញចូល របស់យានអាវកាស ធ្វើជាកន្លែងទី ដើម្បីទាត់បញ្ចូល។

ដោយប្រើជើងទាត់ យកក្បាលបុកបញ្ជូនបាល់ និងការចាប់បាល់ដោយបង្វិលខ្លួនថយក្រោយ ... រឿងទាំងអស់នេះ ពិបាកឬកម្រនឹងធ្វើឲ្យបានណាស់នៅលើផែនដី ជាពិសេសជាមួយនឹងសកម្មភាពយឺតៗដូច្នេះទៀត។ តែផ្ទុយទៅវិញ អាវកាសយានិក​ទាំងបីរូប បែរជាបានធ្វើកាយវិការទាំងនេះដោយស្រួល ដោយមិនខ្លាចឈឺ ពេលធ្លាក់មកវិញ។

ទស្សនាការប្រកួតបាន ដូចនៅលើផែនដីដែរ ...

បើទោះជា អាវកាសយានិកទាំងនេះ មានកាលវិភាគរបស់ខ្លួនសែនចង្អៀតយ៉ាងណាក៏ដោយ តែបើតាមទីភ្នាក់ងារ ណាស្សារបស់អាមេរិក បានឲ្យដឹងថា ពួកគេនៅតែមានឱកាស ដើម្បីទស្សនាតាមដាន ការប្រកួតបាល់ទាត់​នៅលើ​ផែនដី តាមរយៈម៉ាស៊ីនកំព្យូទ័រ បានជាដរាប៕

សូមទស្សនាវីដេអូ នៃការប្រកួតបាល់ទាត់នេះ នៅលើអាវកាសដូចតទៅ៖