នេះបានចំជា«គ្រោះ ត្រួតលើគ្រោះ»មែន។ មិនមែនគ្រោះយ៉ាងម៉េច បើក្រុមបាល់ទាត់ជម្រើសជាតិអេស្ប៉ាញ អតីត​ជើងឯកពិភពលោកលើកមុន ដែលបាន«ហាលអាវ»ជាស្ថាពរ នៅវគ្គជម្រុះក្នុងការប្រកួតឆ្នាំ២០១៤នេះ ទទួលជួបនូវ​បញ្ហាដ៏ធំៗជាបន្តបន្ទាប់ទៀត នៅពេលដែលពួកគេត្រឡប់មកកាន់មាតុប្រទេសវិញ។

ក្រុមបាល់ទាត់ជម្រើសជាតិអេស្ប៉ាញ ចុះចេញពីយន្ដហោះ។ (រូបថត Reuters)

បាល់ទាត់ពិភពលោក - បន្ទាប់ពីត្រូវបានជម្រុះចេញ ទាំងមិនបានត្រៀមទុក និងយ៉ាងអាម៉ាស ពីបាល់ទាត់​ពិភពលោក​ឆ្នាំ២០១៤ នៅប្រទេសប្រេស៊ីលនេះ ក្រុមបាល់ទាត់អេស្ប៉ាញ អតីតជើងឯកឆ្នាំ២០១០ បានចាកចេញ​ពីប្រទេសម្ចាស់ផ្ទះ (ប្រេស៊ីល) ដោយជិះយន្ដហោះពីទីក្រុង គួរីទីបា (Curitiba) ឆ្ពោះមកកាន់រាជធានីម៉ាឌ្រីដ ប្រទេស​អេស្ប៉ាញវិញ។ ប៉ុន្តែអភូតហេតុដ៏អាក្រក់ បានកើតឡើងផ្ទួនៗ ទៅលើយន្ដហោះដែលពួកគេជិះ។ នេះ ជាអ្វីដែល​សារព័ត៌មានក្នុងប្រទេសអេស្ប៉ាញ El Mundo បានធ្វើសេចក្ដីរាយការណ៍។

ហេតុការណ៍ដ៏អាក្រក់ កើតឡើងដំបូងគេ នោះគឺយន្ដហោះ«អស់សាំង» នៅកណ្ដាលមហាសមុទ្រអាត្លង់ទិក ប៉ុន្តែ​បានហោះមកឈប់សំចតជាបន្ទាប់ នៅព្រលានយន្ដហោះ ក្រុងឡាស ប៉ាលម៉ាស (Las Palma) លើកោះ កាណារី (Canaries) ដែលជាដែនដីមួយ ស្ថិតក្រោមការគ្រប់គ្រងរបស់ប្រទេសអេស្ប៉ាញ។ នៅក្នុងការឈប់ជាបន្ទាន់នោះ ក្រុមបាល់ទាត់ទាំងមូល ត្រូវបានអញ្ជើញឲ្យចុះចេញពីយន្ដហោះ មុននឹងត្រឡប់ឡើងយន្ដហោះវិញ ហើយហោះ​សំដៅមករាជធានីម៉ាឌ្រីដ។

មិនមែនតែរឿងនេះទេ តែយន្ដហោះដែលដឹកក្រុមបាល់ទាត់ដ៏អភ័ពជាគេ នៅក្នុងការជួបប្រកួតពិភពលោកលើកនេះ បានជួបនឹងរឿងចង្រៃមួយទៀត នៅពេលហោះជិតមកដល់ព្រលានយន្ដហោះ អន្តរជាតិនៃប្រទេសអេស្ប៉ាញ។ នៅ​២០នាទី មុនការចុះចត យន្ដហោះអ៊ែរប៊ូស (Airbus A330) បានរងនូវការវាយប្រហារ ពី«រន្ទះបាញ់» ដ៏ខ្លាំងមួយ បង្ក​ឲ្យមានការភ័យរន្ធត់ជាថ្មីទៀត ដល់គ្រប់មនុស្សដែលជិះក្នុងយន្ដហោះ។

ប៉ុន្តែរឿងដែលក្រុមបាល់បាត់អ៊េស្ប៉ាញ បានជួបទាំងពីរខាងលើ មិនមានការតក់ស្លុតខ្លាំង ដូចនឹងការជួបប្រឈម​ជា​មួយនឹងក្រុមអ្នកគាំទ្រ និងក្រុមអ្នកសារព័ត៌មាន ដែលចាំពួកគេទាំងក្ដីខកបំណង នៅព្រលានយន្ដហោះ​នោះ​ឡើយ។ ដោយហេតុនេះហើយ ទើបក្រុមកីឡាករបាល់ទាត់ទាំងអស់ សុទ្ធចិត្តចេញពីព្រលានយន្ដហោះ តាមទ្វាក្រោយ ដើម្បី​គេចចេញពីការប្រឈម ដែលអាចក្លាយទៅជាហេតុការណ៍ដ៏អាក្រក់ លើកទីបី សម្រាប់ពួកគេ៕