សារព័ត៌មានអង់គ្លេស ដេល្លីមៀរ័រ (Daily Mirror) បានទម្លាយពីចំណុចថ្មីៗ ដែលខ្លួនទទួលបានពីអាជ្ញាធរម៉ាឡេស៊ី ទាក់ទងនឹងការស៊ើបអង្កេត ទៅលើការបាត់ខ្លួន នៃយន្ដហោះប៊ូអីង ៧៧៧។ ចំណុចថ្មីៗទាំងនោះ បានបាញ់​មុខ​ព្រួញនៃការសង្ស័យ ទាក់ទងនឹងមូលហេតុ ដែលធ្វើឲ្យយន្ដហោះបាត់ខ្លួន ទៅរកមេបញ្ជាការអាកាសយានិក លោក ហ្សាហារី អាមេដ សារ (Zaharie Ahmad Shah) ដែលជាអ្នកដឹកនាំកាន់ចង្កូតយន្ដហោះ។

លោក ហ្សាហារី អាមេដ សារ មេបញ្ជាការបើកបរយន្ដហោះប៊ូអីង ៧៧៧ ដែលបាត់ខ្លួន។ (រូបថតហ្វេសប៊ុក)

បាត់យន្ដហោះ - សារព័ត៌មានអង់គ្លេស ចេញផ្សាយកាលពីថ្ងៃទី២២ ខែមិថុនា បានរាយការណ៍ថា ខុសប្លែក​ពី​អាកាសយានិកផ្សេងទៀត នៃក្រុមហ៊ុន ម៉ាឡេស៊ីអ៊ែរឡាញ លោក ហ្សាហារី អាមេដ សារ (Zaharie Ahmad Shah) អាយុ៥៣ឆ្នាំ មិនបានកត់ត្រាទុក នូវអ្វីសូម្បីបន្ដិចឡើយ នៅក្នុងសៀវភៅកំណត់ហេតុប្រចាំថ្ងៃរបស់លោក។ បើតាម​នគរបាល់ បាននិយាយថា នៅក្រោយថ្ងៃទី៨ ខែមីនា ថ្ងៃដែលយន្ដហោះ នៃជើងហោះហើរ MH370 បានបាត់ខ្លួន​ចេញពីប្រព័ន្ធរលកអាកាស យ៉ាងអាថ៌កំបាំងនោះ លោក ហ្សាហារី មិនបានកត់ត្រាការណាត់ជួប ណាមួយទាល់តែ​សោះ ទាំងនៅក្នុងការងារ ទាំងនៅក្នុងជីវិតឯកជន របស់លោក។

មិនត្រឹមតែប៉ុណ្ណឹង អ្នកស៊ើបអង្កេតបានសម្រេច ក្នុងការយកត្រឡប់មកវិញ នូវទិន្នន័យទាំងប៉ុន្មានដែលត្រូវបាន​លប់​ចោល នៅក្នុងអង្គស្តុកនៃកំព្យូទ័ររបស់លោក ដែលធ្វើឲ្យគេរកឃើញថា លោកបានធ្វើការហោះសាកល្បង (តាម​រយៈកំព្យូទ័រ) ឆ្ពោះទៅកាន់ភាគខាងត្បូងនៃមហាសមុទ្រឥណ្ឌា ហើយបានហ្វឹកហាត់ចុះចត នៅលើកោះឬដីដុះ កណ្ដាលមហាសមុទ្រ ដោយប្រើចម្ងាយផ្លូវខ្លីបំផុត។

សារព័ត៌មានបានសរសេរទៀតថា នៅមានភស្ដុតាងជាងច្រើនទៀត ដែលអនុញ្ញាតឲ្យគេចាត់ទុកលោក ហ្សាហារី ជាជនសង្ស័យដ៏សំខាន់ជាងគេ។ ប៉ុន្តែនគរបាលម៉ាឡេស៊ី មិនចង់ទម្លាយរឿងទាំងនេះ ឲ្យដឹងនោះទេ។

បើតាមការចង្អុលបង្ហាញ របស់ប្រព័ន្ធផ្កាយរណប អ៊ីម៉ាសាត (Inmarsat) ការរុករកយន្ដហោះបាត់ខ្លួននៅក្នុងពេលនេះ ត្រូវបានបង្វែរខិតទៅផ្នែកខាងត្បូង ជាងរង្វង់រុករកដែលត្រូវបានធ្វើកន្លងមក។ ក្រុមហ៊ុនមួយជំនាញខាងគូសផែនទី​បាតសមុទ្រ របស់ប្រទេសហូឡង់ ត្រូវបានគេចាត់ឲ្យទទួលបន្ទុក នាំឧបករណ៍ជ្រមុជទៅក្នុងទឹកសមុទ្ ដ៏ជ្រៅនោះ ដើម្បីឈានទៅរកយន្ដហោះបាត់ខ្លួន។

រហូតមកដល់ពេលនេះ មានរយៈពេលជាង ១០០ថ្ងៃហើយ តែគេនៅតែគ្មាន​ដំណឹងអ្វីទាល់តែ​សោះ ពីយន្ដហោះ​ដែល​បាត់ខ្លួននេះ ជា​មួយនឹងមនុស្ស២៣៩នាក់ នៅក្នុងនោះ៕