ពីនេះពីនោះ - ការ«បែកកម្មដ្ឋាន»តែបន្ដិច តែអាចធ្វើឲ្យមានគ្រោះថ្នាក់ ដ៏ធ្ងន់ធ្ងរ និងឈានទៅរកការ​បាត់​បង់​ជីវិត​ផងក៏មិនដឹង។ នេះជាករណីគ្រោះថ្នាក់ចរាចរណ៍មួយ នៅកណ្ដាលទីក្រុងវីយ៉ែន ប្រទេសអូទ្រីស បង្កឡើងដោយ​យុវជនអ្នកបើកម៉ូតូមួយរូប ដែលមានភ្នែកតែមិនមើលផ្លូវ បែរជាទៅខិតខំសំលឹងមើល ដង​ខ្លួនដ៏ស្រឡូនរបស់​ស្រី​ស្រស់ស្អាត នៅតាមបង្អួចអាគារទៅវិញ។ នេះបើតាមសារព័ត៌មាន ហ័ហ្វីងតុនប៉ុស្ដ៍ (Huffington Post)។

កញ្ញារូបស្រស់រាងបាន ដែលរស់នៅក្នុងអាគារនោះ បានសម្រេចចិត្តឆ្លៀតឱកាសខែក្ដៅមកដល់ ហើយ​ដែលទើបនឹង​មានព្រះអាទិត្យ បញ្ចេញរស្មីយ៉ាងត្រចះត្រចង់នោះ ដើម្បីបន្ទុំស្បែករបស់នាង។ ប៉ុន្តែ​នាង​មិន​បានយក​កម្ដៅនិងរស្មី​ព្រះអាទិត្យ នៅខាងក្នុងផ្ទះនាងទេ តែបែរជាបានបញ្ចេញដងខ្លួនមកខាងក្រៅ (រូបថត​ខាងក្រោម) នៅតាមបង្អួច បង្ក​ឲ្យ​មាន​ការភ្ញាក់ផ្អើលយ៉ាងខ្លាំង ដល់អ្នកដំណើរទាំងឡាយ ដែលឆ្លងកាត់​ទី​នោះ រហូតដល់ផ្ទុះគ្រោះថ្នាក់ចរាចរណ៍។

«សុំទោស ខ្ញុំបានបែកអារម្មណ៍»

សារព័ត៌មាន បានលើកយកសម្ដីសាក្សីមួយរូប ដែលជាអ្នកបើកបររថយន្ដ លោក ម៉ៃឃើល គៀណាស (Michael Kienast) មករៀបរាប់លើករណីនេះថា៖ «ខ្ញុំនៅពីក្រោយរថយន្ដពីរគ្រឿង ដែលជល់គូថគ្នា ដោយ​សារតែអ្នកបើកម៉ូតូ​ដែលជិះមកពីទិសបញ្ច្រាស មិនមើលផ្លូវ តែបែរទៅមើលស្អីឯណាឯណោះទៅវិញ»។ សារព័ត៌មានបានពន្យល់ លើ​ករណីរបស់ស្រីស្រស់រាងបាន ដែលបានបញ្ចេញដងខ្លួនមួយកំណាត់ មក​ខាង​ក្រៅបង្អួច ថាមកពីនាងចង់​បន្ទុំ​ស្បែក​ខ្លាំងពេក ហើយចាំបាច់ត្រូវធ្វើដូច្នេះ ព្រោះនៅក្នុងផ្ទះនាង មិនមាន​កន្លែងអាចធ្វើដូច្នេះបាន។

ជាសំណាងល្អ ការបែក«កម្មដ្ឋាន»របស់យុវជនអ្នកបើកម៉ូតូ មិនបានបង្កឲ្យមានរបួស ហើយនគរបាលក៏​មិន​បាន​ធ្វើអ្វី ទៅលើនាងកញ្ញាដែលបានដុតកំដៅហេតុការណ៍នេះដែរ បន្ទាប់ពីនាងបានស្លៀកពាក់ឡើងវិញ។ នៅ​ចំពោះ​ម្ចាស់​រថយន្ដ ដែលជួបគ្រោះថ្នាក់ដោយសារខ្លួននោះ យុវជនអ្នកបើកម៉ូតូបានអោនខ្នង​លំទោន​សំដីថា៖ «សុំ​ទោស ខ្ញុំបាន​បែកអារម្មណ៍» ដោយមិនភ្លេចផងទេ ចង្អុលទៅរកអ្នកដែលបង្កហេតុដំបូង ដែល​ធ្វើឲ្យនាយងាកភ្នែក៕