រោងចក្រជញ្ជូនសម្ភារៈចេញ កម្មករអូសេអង់ស្វែងរកអន្តរាគមន៍ក្រសួង
- ដោយ: ប្រាថ្នា ដោយ ក.ចាន់នីតា (ទាក់ទង៖ [email protected]) - ភ្នំពេញ ថ្ងៃទី០៦ មិថុនា ២០១៤
- កែប្រែចុងក្រោយ: June 06, 2014
- ប្រធានបទ: វិបត្តិការងារ
- អត្ថបទ: មានបញ្ហា?
- មតិ-យោបល់
-
វិបត្តិការងារ - ក្រោយពីការចរចាបរាជ័យ ជាលើកទី៤ កាលពីពេលកន្លងមក នៅថ្ងៃទី០៦ ខែឧសភា ឆ្នាំ២០១៤នេះ កម្មកររោងចក្រអូសេអង់ហ្គាមិន ជាង ៥០០នាក់ បានហែក្បួនទៅប្រមូលផ្តុំគ្នា នៅមុខក្រសួងការងារ ដើម្បីដាក់ញត្តិស្វែងរកអន្ដរាគមន៍ ពីក្រសួងមួយនេះ ក្នុងករណីដែលរោងចក្រ ព្យួរការងារកម្មករ និងមិនបានផ្តល់ប្រាក់ខែដល់កម្មករ។
តាមញត្តិរបស់កម្មករ បានឱ្យដឹងថា ក្រុមហ៊ុនអូសេអង់ហ្គាមិននេះ បានលក់ឡាយឡុងសម្ភារៈក្នុងរោងចក្រមួយចំនួន ទើបប្រកាសព្យួរការងារ។ ករណីនេះ ធ្វើឲ្យពួកគេបារម្ភថា ក្រុមហ៊ុននេះ អាចបិទសង្វាក់ផលិតកម្មរបស់ខ្លួន ហើយគេចវេស ពីការផ្តល់សំណងដល់កម្មករតាមច្បាប់ស្តីពីការងារ។
ប្រធានសម្ព័ន្ធសហជីពចលនាកម្មករ បានថ្លែងឡើងថា បើទោះបីជាក្រុមហ៊ុនអូសេអង់ហ្គាមិននេះ បានសាង (លក់) រោងចក្រទៅឱ្យថៅកែថ្មីក៏ដោយ ក្រុមហ៊ុននៅតែមានកាតព្វកិច្ចទូទាត់ នូវអត្ថប្រយោជន៍ផ្សេងៗ ជូនកម្មករដែលមានចែងនៅក្នុងច្បាប់។ អ្វីដែលកម្មករទាមទារនេះគ្មានអ្វីខុសច្បាប់ទេ ព្រោះវាជាការការពាផលប្រយោជន៍របស់ពួកគាត់។ លោកអះអាងថា ប្រសិនគ្មានលទ្ធផលបន្តទៀត ខាងសហជីពនឹងចាត់តំណាងដើម្បីយកញត្តិ ទៅដាក់នៅខុទ្ទកាល័យលោកនាយករដ្ឋមន្រ្តីហ៊ុន សែន។
កម្មការរិនីម្នាក់មកពីខេត្តព្រៃវែងបានរៀបរាប់ថា ការសម្រេចរបស់រោងចក្រ ដែលផ្តល់ប្រាក់ខែតែ១៥ដុល្លា ក្នុងមួយខែក្នុងពេលព្យួរការងារនេះ បានធ្វើឱ្យកញ្ញាជួបប្រទះនូវបញ្ហាលំបាកជាខ្លាំង ណាមួយផ្ទះជួលគេគ្មានលុយបង របស់ប្រើប្រាស់ក៏គ្មាន និងថែមទាំងគ្មានប្រាក់សម្រាប់ទិញអាហារទៀតផង។ កម្មការិនីរោងចក្រអូសេអង់ហ្គាមិន ដែលបំរើការបាន២ឆ្នាំរូបនេះបន្ថែមថា៖ «ឱ្យ១៥ដុល្លាខ្ញុំចាយអីគ្រាន់ ខ្ញុំចាយមិនគ្រាន់ទេ អញ្ចឹងខ្ញុំសូមសំណូមពរ ដល់ក្រសួងថ្នាក់លើគ្រប់ស្ថាប័នទាំងអស់ សូមលលោកជួយដោះស្រាយឱ្យកម្មករយើងខ្ញុំទាំងអស់គ្នាផង»។ កញ្ញាបន្តថា បើខាងក្រុមហ៊ុនមិនផ្តល់ប្រាក់ឈ្នួលឱ្យ តាមការទាមទាររបស់កម្មករទេនោះ កញ្ញានៅតែធ្វើការតស៊ូទាមទារ ឱ្យទាល់តែបាន។
ក្រសួងការងារបានទទួលយកសំណើសុំកិច្ចអន្តរាគមន៍ ដើម្បីបញ្ចប់វិវាទការងារ ប៉ុន្តែក្រសួងសុំពេលជួបជាមួយ សមាគមរោងចក្រកាត់ដេរ និងភាគីរោងចក្រមុនអន្តរាគមន៍ករណីនេះ។ នេះបើតាមឱ្យដឹងរបស់តំណាងកម្មករក្រោយពេលដាក់ញត្តិរួច។
គួររម្លឹកថា កម្មកររោងចក្រអូសេអង់ហ្គាមិន ដែលស្ថិតនៅភូមព្រៃទា សង្កាត់ចោមចៅ ខណ្ឌពោធិ៍សែនជ័យ ប្រមាណ១៥០០នាក់ បានធ្វើកូដកម្មនៅមុខរោងចក្រ តាំងពីថ្ងៃទី២៣ ខែឧសភាមក ក្រោយពេលដែលភាគីរោងចក្របានប្រកាសព្យួរការងារ ។ បើទោះជាមានការចរចាគ្នារវាងថៅកែរោងចក្រ និងកម្មករ ដោយមានការសម្រមសម្រួល ពីខាងក្រសួងការងារជាច្រើនលើកហើយយ៉ាងណាក៏ដោយ តែលទ្ធផលខាងក្រុមហ៊ុន នូវតែរក្សាគោលជំហរផ្តល់ប្រាក់ឈ្នួលក្នុងអំឡុងពេលព្យួរការងារ តែ១៥ដុល្លាដដែល។ កម្មករបានទាមទារលក្ខខណ្ឌការងារ ចំនួនពីរចំណុច គឺទី១.ផ្តល់ប្រាក់ឈ្នួល១០០% ក្នុងកំឡុងពេលក្រុមហ៊ុនព្យួរការងាររយ:ពេល១ខែ ចាប់ពីថ្ងៃទី២៦ ខែឧសភា ដល់ថ្ងៃទី២៦ ខែមិថុនា ឆ្នាំ២០១៤ និងទី២.ក្រុមហ៊ុនត្រូវសងលុយដល់កម្មករវិញ ចំពោះកម្មករដែលក្រុមហ៊ុនបើកជូនមិនបានត្រឹមត្រូវ ។