មន្រ្តីអង្គការសង្គមស៊ីវិល និងក្រុមមេធាវីការពារក្ដីឲ្យជនទាំង២៣នាក់ បានថ្លែងរិះគន់ពីភាពមិនប្រក្រតីជាច្រើន ថា​បានកើតឡើង នៅក្នុងសវនាកានៃការសាកសួរ របស់ជនជាប់ចោទទាំង២៣នាក់ ដែលធ្វើឱ្យជនជាប់ចោទទាំងនោះ បាត់បង់នូវភាពយុត្តិធម៌ ពីសំណាក់ការកាត់​សេចក្តី​របស់ចៅក្រម នៃសាលាដំបូងរាជធានីភ្នំពេញ។

សាលាដំបូងរាជធានីភ្នំពេញ មើលពីក្រៅ។ (រូបថត MONOROOM.info/ S.Tith)

ប្រព័ន្ធយុត្តិធម៌ - ក្រោយពីបញ្ចប់សវនាកា នៃការសាកសួរជនជាប់ចោទទាំ២៣នាក់ ដែលនឹងប្រកាសសាលក្រម​នៅថ្ងៃទី៣០ ខែឧសភាខាងមុខនេះ មន្រ្តីសង្គមស៊ីវិល ព្រមទាំងក្រុមមេធាវីការពារក្តី ឱ្យជនជាប់ចោទ​បានកត់​សម្គាល់ថា ភាពយុត្តិធម៌ របស់អ្នកទាំង២៣នាក់ ត្រូវបានបាត់បង់ដោយសារតែចៅក្រម មានភាពលំអៀងទៅលើ​ដើមបណ្តឹង ក៏ដូចជាខាងសមត្ថកិច្ចគ្រប់គ្រងដោយរដ្ឋាភិបាល។

លោក សំ សុគង់ ជាមេធវីការពារជនជាប់ចោទ បានអះអាងពីភាពមិនប្រក្រតីនេះថា ដោយសារពេលវេលា នៃការ​សួរដើមបណ្តឹងរដ្ឋប្បវេណី និងសាក្សីដាក់បន្ទុកមិនមានពេលគ្រប់គ្រាន់ ម្យ៉ាងសាក្សីទាំងអស់នោះ មិនមានវត្តមាន​នៅពេលសវនាកា។ លោកបន្តថា បើទោះបីជាក្រុមមេធាវីបានព្យាយាមសុំឱ្យមានការពន្យា ដើម្បីធ្វើយ៉ាងណា ហៅ​ជនទាំងអស់មកសួរដេញក៏ដោយ ប៉ុន្តែចៅក្រមនៅតែមិនអនុញ្ញាត។

លោក អំ សំអាត ប្រធានផ្នែកបច្ចេកទេសស៊ើបអង្កេត របស់អង្គការការពារសិទ្ធិមនុស្សលីកាដូ ដែលបានឃ្លាំមើល​វនាការទាំង៥លើកមកនេះ បានថ្លែងថា អ្វីដែលលោក​បានអង្កេត កត់សម្គាល់ឃើញថាមាន​ភាពចន្លោះប្រហោង​នៃ​សិទ្ធខ្លះ ដែលជាភាពយុត្តិធម៌សម្រាប់ជនជាប់ចោទ ដូចជាអវត្តមានរបស់ដើមបណ្តឹង និងសាក្សីដែលមានភាព​សំខាន់ ក្នុងការជជែកដេញដោលនៅក្នុងអង្គសវនាកា​ ដើម្បីផ្តល់យុត្តិធម៌ទៅដល់ជនរងគ្រោះ ក៏ដូចជាជនជាប់​ចោទ។

លោកនិយាយថា៖ «នៅក្នុងគោលការណ៍ច្បាប់និងភាពយុត្តិធម៌ កាលណាយើងថ្លោះ ឬចន្លោះប្រហោងនៃអវត្តមាន វាធ្វើឱ្យបាត់នៃភាពយុត្តិធម៌មួយចំនួន សម្រាប់ទាំងជនរងគ្រោះ ទាំងដើមបណ្តឹងក៏ដូចជាជនដែលជាប់ចោទហ្នឹង»។

តើអ្នកទាំង២៣អាចនឹងត្រូវដោះលែងឬយ៉ាងណា?

លោកមេធាវី សំ សុគង់ បានលើកឡើង បើពិនិត្យទៅលើឯកសារភស្តុតាងជារូបភាព និងវីដេអូផ្សេងៗនោះ កូនក្តី​របស់លោកទាំងអស់សុទ្ធតែជាជនរងគ្រោះ។ ដោយលោកសង្កត់ធ្ងន់ថា៖ «ដោយមូលហេតុថាគាត់​មិនបាន​ចូល​រួមក្នុងការប្រព្រឹត្ត អញ្ចឹងក្រុមមេធាវីសង្ឃឹមថា តុលាការនឹងផ្តល់យុត្តិធម៌ លើការសម្រេចមួយដោយឯករាជ្យ និង​មិនមានការភ័យខ្លាច»។

សម្រាប់លោក អំ សំអាត​​ បានថ្លែងយ៉ាងដូច្នេះដែរថា៖​«ទោះជាយ៉ាងណា ក្នុងការជជែកដេញដោលរយៈពេល​៥ថ្ងៃ​កន្លងមក នៅក្នុងអង្គសវនាកាមិនមានភស្តុតាងណា ដែលបញ្ជាក់ថាជនជាប់ទាំងអស់​ហ្នឹងបានប្រព្រឹត្តដូចការចោទ​ប្រកាន់ទេ អញ្ចឹងយើងសង្ឃឹមថាអ្នកទាំង២៣នាក់ នឹងរួចផុតពីការចោទប្រកាន់នេះ»។

លោក ឡៅ ម៉ុងហៃអ្នកវិភាគសង្គម និងនយោបាយករាជ្យ កាលពីថ្ងៃទី២០ ខែឧសភា ធ្លាប់លើកឡើងដែរថា កន្លង​មកឃើញស្រ្តីបឹងកក់ទាំង១៣នាក់ លោកម៉ម សូណង់ដូ រួមទាំងអ្នកស្រី យ៉ោម បុប្ផា ដែលត្រូវបានជាប់​ពន្ធនាគារ​ដោយភាពអយុត្តិធម៌ទីបំផុត គឺត្រូវបានដោះលែងដោយសារការតវ៉ាពីប្រជាពលរដ្ឋ ហើយអ្នកទាំង២៣​ នេះក៏នឹង​ត្រូវ​ដោះលែងដែរ។

លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ និងមនុស្ស២២នាក់ផ្សេងទៀត ត្រូវ​បានចាប់ខ្លួន ក្នុងព្រឹត្តិការណ៍ប៉ះទង្គិចនៅមុខរោងចក្រយ៉ាកជីង និងសួនឧស្សាហកម្មកាណាឌីយ៉ាផ្លូវវ៉េងស្រេង កាល​ពីថ្ងៃទី០២ និងទី០៣ ខែមករា នៅពេលកម្មករទាមទារប្រាក់ឈ្នួលគោល ១៦០ដុល្លារក្នុងមួយខែ។ ជនទាំង២៣​នាក់​ត្រូវបានចោទប្រកាន់ពីបទញុះញង់ ប្រព្រឹត្តអំពើបង្កឲ្យមានភាពវឹកវរធ្ងន់ធ្ងរ ដល់សន្តិសុខសង្គម និងបង្កឱ្យខូចខាត​ដោយចេតនា មានស្ថានទម្ងន់ទោស៕