មន្រ្តីជាន់ខ្ពស់ម្នាក់មកពីគណបក្សសង្គ្រោះជាតិ បានទម្លាយឲ្យទស្សនាវដ្តីមនោរម្យ.អាំងហ្វូ ដឹងថា «ខ្យល់»​នយោបាយ​នៅកម្ពុជា បាននឹងកំពុងឈានដល់ចំណុចមួយ ដែលគណបក្សប្រជាជន​កម្ពុជា និង​គណបក្ស​សង្គ្រោះ​ជាតិ ត្រូវ«កាន់»ដៃគ្នា ចូលសភាជាតិហើយ ដែលវេលានោះនៅមិនឆ្ងាយឡើយ។

ប្រធានគណបក្សប្រឆាំង លោក សម រង្សី (រូបខាងឆ្វេង) និងនាយករដ្ឋមន្ត្រី លោក ហ៊ុន សែន កាលពីខែកុម្ភះឆ្នាំ២០០៦ ក្នុងរាជធានីភ្នំពេញ។ (រូបថត AFP)

នយោបាយ - ការឈានទៅរកភាពត្រូវរ៉ូវគ្នានេះ ត្រូវបានមន្រ្តីដែលថ្លែងក្នុងលក្ខខណ្ឌ មិនបញ្ចេញឈ្មោះ​រូបនោះ​បានបញ្ជាក់ថា កម្ពុជាមិនអាចធ្វើដំណើរ​យឺតយ៉ាវ ជាងប្រទេសជិតខាងឡើយ ពិសេសប្រទេសវៀតណាម និង​ថៃ។ លោកបានថ្លែងទៀតថា «រឿង​នយោបាយ យ៉ាងយូរមួយខែទៀតទេ ត្រូវគ្នាហើយ។ ច្បាប់បានសរសេររួចរាល់ហើយ ឥឡូវកំពុងមានការជួយពិនិត្យ​ ដោយមន្រ្តី​ជាន់ខ្ពស់ មកពីប្រទេសជប៉ុន។ (...) ឯកភាពទាំងអស់គ្នាហើយ បញ្ចប់ទាំង​នយោបាយ បញ្ចប់ទាំងបច្ចេកទេស។»

ក្នុងកិច្ចសម្ភាស ជាមួយអ្នកសារព័ត៌មាន លោក ស ខេង មន្រ្តីជាន់ខ្ពស់ពីគណបក្សប្រជាជនកម្ពុជា ក៏បាននិយាយ​ប្រហែល​គ្នានេះដែរ។ លោកបាននិយាយថា កន្លងមកគណបក្សទាំងពីរ​បានធ្វើការត្រួសត្រាយផ្លូវដែល​ត្រូវដើរ​រួច​រាល់ហើយ។ លោកលើកឡើងថា «អ្វីដែលចាំបាច់ជាបន្តនោះ គឺឆន្ទៈពិតប្រាកដ ជាកត្តាកំណត់នៃការដោះស្រាយ​បញ្ហា។ (...) មានឆន្ទៈពិតប្រាកដ នោះជំនួបកំពូលប្រាកដជាមាន។»

មន្រ្តីដែលមកពីគណបក្សសង្គ្រោះជាតិរូបនោះ បានពន្យល់ទាក់ទងទៅនឹងការរៀបចំរចនាសម្ព័ន្ធ គ.ជ.ប ថា ដោយ​នឹងធ្វើការបែងចែកសម្លេង នៅក្នុងគ.ជ.ប នោះ ឲ្យមានតុល្យភាពនឹងគ្នា។ ជាមួយនឹងការដាក់បញ្ចូលតំណាង​គណបក្ស តែក៏នៅមានការបញ្ជូលបន្ថែម នូវមន្រ្តីមកពីអង្គការសង្គមស៊ីវិល ដែលពាក់ព័ន្ធនឹងការបោះឆ្នោតផងដែរ។ «គ.ជ.ប មានកៅអីទាំងអស់ប្រាំបួន ក្នុងនោះកន្លងមកគណបក្សប្រជាជនមានចំនួន៧ និងគណបក្សសង្គ្រោះជាតិ​មានចំនួន២កៅអី។ (...) ឥឡូវត្រូវប្តូថ្មីទាំងអស់ បីៗស្មើគ្នា ក្នុងនោះក៏មានកៅអីខាងសង្គមស៊ីវិលដែរ។»

សម្រាប់លោក អំ សំអាត មន្ត្រីជាន់ខ្ពស់ ពីអង្គការការពារសិទ្ធិមនុស្សលីកាដូ បានលើកឡើងថា ទាំងអង្កការសង្គម​ស៊ីវិល ទាំងប្រជាពលរដ្ឋ អ្វីដែលចង់បាននោះ ការជួបចចារគ្នាដោយសន្តិវិធី។ ក្រោយការបោះឆ្នោត​ក្រុមប្រឹក្សា​នេះ គណបក្សទាំងពីរ អាចមានឱកាសច្រើនក្នុងការជួប ពិភាក្សាគ្នា។ «យើងសង្ឃឹមថា គណបក្សទាំងពីរនឹងប្រកាន់យក​គោលការណ៍ជំហរឧត្តមប្រយោជន៍ជាតិ ឧត្តមប្រយោជន៍ប្រជាពលរដ្ឋជាធំ មកដាក់ពីមុខ ដោយធ្វើការចចារ និង​ជជែកគ្នា ដើម្បីបញ្ចប់វិបត្តនយោបាយ ដើម្បីបញ្ជៀសនូវការជួបលផលំបាករបស់ប្រចាពលរដ្ឋ ដែលកើតចេញពី​បញ្ហានយោបាយជាប់គាំងនោះ។»៕