មុខតុលាការរាជធានីភ្នំពេញ ក្នុងថ្ងៃទីបី ចាប់រាប់ពីថ្ងៃទី២០ ដល់ថ្ងៃទី២២ ខែឧសភា នៃការលើកយករឿងដ៍ធំ ក្នុង​ការ​សម្រេចជោគវាសនានៃកម្មករទាំង២១នាក់ និងសកម្មជនសិទ្ធិមនុស្ស ដែលមតិសាធារណៈជនទូទៅចាត់ទុកថា ជា​រឿងនយោបាយនោះ ត្រូវបានមន្ត្រីសង្គមស៊ីវិលដែលតាមដាននូវករណីនេះ តាំងពីដើមរៀងមក ធ្វើការចោទ​ប្រកាន់​ថា ចៅក្រមសួរដេញដោល ក្នុងគោលបំណងតែមួយគត់ គឺចេតនាទម្លាក់ទម្ងន់ទោស ដោយមិនដឹងពី​ស្ថានភាព​នៃ​រឿង។

ទិដ្ឋភាពនៅមុខសាលាដំបូងរាជធានី ថ្ងៃទី៣១ខែតុលាឆ្នាំ២០១៣។ (រូបថត MONOROOM.info/ O.Vary)

សវនាការ - ក្នុងកិច្ចសម្ភាសជាមួយអ្នកសារព័ត៌មាន នៅមុខសាលាដំបូងរាជធានីភ្នំពេញ បន្ទាប់ពីធ្វើការសាកសួរ​ជនជាប់ចោទ​ទាំងអស់ លើកលែងលោក វន ពៅ ដែលទុកសួរក្រោយគេនោះ លោកនី ចរិយា មន្រ្តីផ្នែកស៊ើបអង្កេត​របស់សមាគមការពារសិទ្ធិមនុស្សអាដហុក បានបញ្ជាក់ពីដំណើរការ និងនីតិវិធីនៃការសាកសួរជនជាប់ចោទ របស់​ចៅក្រមសាលាដំបូងរាជធានីភ្នំពេញ តាមការសង្កេតរបស់លោកផ្ទាល់ឃើញថា ដំណើរការនៃសវនាការនេះ មាន​ចំណុចជាច្រើន ដែលមិនស្រមទៅនឹងនីតិវិធីច្បាប់។

ក្នុងនីតិវិធីដែលមិនសមស្រមទាំងនោះ មន្រ្តីអង្គការសង្គមស៊ីវិលរូបនោះ បានធ្វើការពន្យល់ថា៖

ទីមួយ ចៅក្រម​បាន​លើករូបថតតែចំនួនពីសន្លឹកប៉ុណ្ណោះ មកធ្វើជាអំណោះអំណាង ក្នុងការចោទប្រកាន់​ទៅលើជន​ជាប់ចោទទាំងនោះ។ លោកបានបន្តថា ចំណែករូបថតទាំងពីនោះ ជារូបថតដែលមានទីតាំងដោយឡែក​ពីគ្នាទៅ​ទៀត។ ជាមួយគ្នានេះ​ទាំងចៅក្រម និងព្រះរាជអាជ្ញា សួរសំនួ«ដាក់»បន្ទុកច្រើន ដើម្បីធ្វើការសង្កត់ទៅលើជន​ជាប់​ចោទ ឲ្យមានការវង្វេង​វង្វាន់លើរូបថតទាំងពីរនោះ។

ចំណុចទីពីរ លោកលើកឡើងថា ចៅក្រមជំនុំជម្រះនោះមិនបានដឹងថា ទីតាំងកើតហេតុទាំងនោះមានរាងយ៉ាងបែប​ណាទៀតផង។ លោកថា ដូច្នេះចៅក្រមនោះ មិនអាចមកធ្វើការជំនុំជម្រះបានទេ ក្នុងរឿងមួយដ៏ធំបែបនេះ។ «មិន​ដែលស្គាល់ទីតាំងផង ទៅយករូបថតពីរសន្លឹក មកដាក់បន្ទុកមកលើមនុស្សុ។ (...) នេះជាកំហុសធ្ងន់ណាស់​របស់​ចៅក្រម។ (...) រួមទាំងចៅក្រមស៊ើបអង្កេតផង ក៏មិនបានទៅស៊ើបអង្កេតដល់កន្លែងកើតហេតុដែរ គឺសំអាងលើ​រូប​ថតពីរសន្លឹក។»

ចំណុចទីបី ចៅក្រម«លំអៀង»យ៉ាងធ្ងន់ធ្ងរទៅលើដើមបណ្តឹងរដ្ឋប្បវេណី ដោយបានកាត់នូវការសួរដេញ​ដោល​របស់មេធាវីជាច្រើន។ «នៅពេលដែលមេធាវីសួរដេញដោល ទៅលើអង្គហេតុជាក់លាក់ ចៅក្រមខ្លួនឯង​ជាអ្នក​កាត់​ជំនួសតំណាងអយ្យការទៀតនៅពេលខ្លះ។» លោកបានបន្តថា ទាំងបីចំណុចខាងលើនេះហើយ ដែលសរបញ្ជាក់​ពីភាព«លំអៀង»របស់ចៅក្រម នៅក្នុងសវនាការនាព្រឹកថ្ងៃតី២២ ខែឧសភានេះ។

កាលពីថ្ងៃទី២៥ ខែមីនា ចៅក្រមស៊ើបសួរនៅសាលាឧទ្ធរណ៍ មិនបានសម្រេចឲ្យលោក វន ពៅ នៅក្រៅឃុំទេ។ កាលនោះចៅក្រមស៊ើបសួរ បានចោទប្រកាន់លោក វ៉ន ពៅ លើករណីពីរយ៉ាង៖ ទីមួយ ចោទពីបទធ្វើឲ្យខូចខាត ដោយចេទនាមានស្ថានទម្ងន់ទោស និងទីពីរ ចោទពីបទហិង្សា ដោយចេតនាមានស្ថានទម្ងន់ទោស។

ថ្មីៗនេះទៀ នៅថ្ងៃទី៩ ខែឧសភា តុលាការកំពូលក៏បានបដិសេធម្តងទៀត ចំពោះការស្នើសុំឲ្យលោក វ៉ន ពៅ និង​ជនជាប់ចោទទាំង ២២នាក់ ផ្សេងទៀត ក្រោម ហេតុផលរង់ចាំការចចារត្រូវគ្នា របស់គណបក្សទាំងធំៗទាំងពីរ​នា​ថ្ងៃខាងមុខសិន ដោយបិទផ្លូវតវ៉ា។ នេះបើតាមការបញ្ជាក់របស់ក្រុមមន្ត្រីសង្គមស៊ីវិល និងសាច់ញាតិនៃជនរងគ្រោះ អ្នកស្រី ប្រាក់ សុវណ្ណារី៕