អ្នកនិពន្ធនិងជាអ្នកការសែតជាតិ អូស្ត្រាលី មួយរូប បានសរសេរចេញជាស្នាដៃ នៅក្នុងសៀវភៅមួយរបស់លោក មានចំណងជើងថា «យន្ដហោះ MH370៖ អាថ៌កំបាំង» ដែលរៀបរាប់យ៉ាងក្បោះក្បាយ ពីការបាត់ខ្លួនរបស់យន្ដហោះ និងបានលើកឡើងពីករណីការច្រឡំ បាញ់យន្ដហោះឲ្យធ្លាក់ របស់កងទ័ពជើងទឹករបស់អាមេរិក។

យន្ដហោះប៊ូអ៊ីង ៧៧៧ របស់ក្រុមហ៊ុនអាកាសចរណ៍ ម៉ាឡេស៊ីអ៊ែរឡាញ។ (រូបថតក្រុមហ៊ុន)

បាត់យន្ដហោះ - ជាង៧០ថ្ងៃកន្លងទៅ បន្ទាប់ពីការបាត់ខ្លួនយ៉ាងចម្លែក នៃយន្ដហោះប៊ូអីង ៧៧៧ របស់ក្រុមហ៊ុន​អាកាសចរណ៍ ម៉ាឡេស៊ីអ៊ែឡាញ ស្នាដៃសៀវភៅដំបូងគេមួយ ទាក់ទងនឹងប្រធានបទនេះ ត្រូវបានបោះពុម្ភចេញ​ផ្សាយ កាលពីថ្ងៃចន្ទទី១៩ ខែឧសភាកន្លងមកនេះ ប៉ុន្តែបានធ្វើឲ្យផ្ទុះនូវការភ្ញាក់ផ្អើលមួយឡើង។

តាមពិត លោក នីជេល ខាវថន (Nigel Cawthorne) ដែលជាអ្នកសារព័ត៌មាន និងជាអ្នកនិពន្ធសៀវភៅ «យន្ដហោះ​ MH370៖ អាថ៌កំបាំង» មិនព្យាយាមបង្ហាញថា អ្វីដែលលោកសរសេរ សុទ្ធតែជាការពិតទាំងស្រុងនោះទេ។ ប៉ុន្តែអ្នក​និពន្ធរូបនេះ បានបង្ហាញការគាំទ្រ នូវការរកឃើញរបស់លោក ដែលនិយាយថា ការបាត់ខ្លួនរបស់យន្ដហោះ កាលពី​ថ្ងៃទី៨ ខែមីនា កន្លងទៅនេះ មានជាប់ទាក់ទងនឹងការច្រឡំបាញ់ទម្លាក់ នៅក្នុងសមយុទ្ធយោធាមួយ ដែលធ្វើរួមគ្នា​រវាងប្រទេសថៃ និងសហរដ្ឋអាមេរិក នៅក្នុងសមុទ្រចិនខាងត្បូង។

សារព័ត៌មាន ស៊ីដនី ម័រនីង ហេរៀដ (Sydney Morning Herald) របស់ប្រទេសអូស្ត្រាលី បានលើកយកអត្ថន័យមួយ​ចំនួនរបស់សៀវភៅ ដោយចាប់ផ្ដើមពីក្រុមអ្នកស៊ើបអង្កេត ដែលបានដាក់ទិសដៅទៅរក​ការ«សង្ស័យ»ដែលមិន​ត្រឹមត្រូវ បង្កឲ្យការច្រឡំបាញ់យន្ដហោះនេះ មិនដែលត្រូវបាននរណាម្នាក់ចាប់អារម្មណ៍ លើកយកមកនិយាយ​នោះ​ទេ។ លោក ខាវថន បានសរសេរនៅក្នុងសេចក្ដីផ្ដើមថា «គ្រួសារជនរងគ្រោះ នឹងមិនអាចដឹងជារៀងរហូត ពីអ្វីដែល​បាន​កើតឡើង ចំពោះគ្រួសាររបស់ពួកគេ»។

លោក បានសរសេរថា «តើពួកគេបានស្លាប់ទៅ ដោយក្ដីឈឺចាប់ ឬស្លាប់ទៅទាំងមិនដឹងខ្លួន? ឬពួកគេបានស្លាប់នៅ​ក្នុង​ភាពដង្ហក់ ជាមួយនឹងអណ្ដាតភ្លើងដែលឆេះបំផ្ទុះយន្ដហោះ នៅលើមេឃ ដោយសារមនុស្សឆ្កួតណាម្នាក់ ជាអ្នក​ប្រព្រឹត្តិ?»

បាញ់ច្រឡំ រួចបំបិទសំនុំរឿង ...?

នៅក្នុងសៀវភៅ បានលើកយកសម្ដីសាក្សីមួយរូប លោក ម៉ៃ ម៉ាកខេ (Mike McKay) ជនជាតិញ៉ូហ្សេឡេន ដែល​បាន​ស្ថិតនៅក្នុង​មូលដ្ឋាន​ចម្រាញ់ប្រេងមួយ នៅក្នុងឈូងសមុទ្រថៃ ថាបានឃើញតួយន្ដហោះ បានឆេះនៅលើមេឃ នៅ​ក្នុងពេល​តែមួយ ដែលយន្ដហោះបានដាច់ទំនាក់ទំនង មកផែនដី។ អ្នកនិពន្ធបានភ្ជាក់ហេតុការណ៍នេះ ទៅនឹង​សមយុទ្ធ​យោធា ដែលបានរៀបចំធ្វើរួមគ្នា រវាងប្រទសថៃ និងសហរដ្ឋអាមេរិក នៅក្នុងសមុទ្រចិនខាងត្បូង នៅ​ពេល​នោះ។

លោក ខាវថន បានសរសេរទៀតថា៖ «សមាជិកម្នាក់នៅក្នុងសមយុទ្ធ ទំនងជាបានបាញ់ដោយច្រឡំ ចំយន្ដហោះ​ដែលភ្ជាប់ជើងហោះហើរ MH370 ពីរដ្ឋធានីកូឡាឡំពួរ ឆ្ពោះទៅកាន់រដ្ឋធានីប៉េកាំង។ រឿងបែបនេះធ្លាប់កើតមាន​រួចហើយ នៅក្នុងករណីឡុកខេប៊ី (Lockerbie ទីក្រុងមួយ នៅភាគខាងជើងនៃប្រទេសអង់គ្លេស) តែគ្មាននរណា​ចង់​ឲ្យករណីនេះ កើតមានឡើងវិញនោះទេ។ ដូច្នេះ អ្នកដែលជាប់ពាក់ព័ន្ធនឹងការបាញ់ច្រឡំនេះ អាចនឹងស្ងាត់មាត់ ដោយសារតែមូលហេតុនេះ។»

ទីក្រុង ឡុកខេប៊ី ជាទីក្រុងតួចមួយរបស់ប្រទេសអង់គ្លេស ដែលត្រូវបានគេស្គាល់ពេញពិភពលោក នៅឆ្នាំ១៩៨៨ បន្ទាប់ពីយន្ដហោះ ប៉ានអាម 103 (Pan Am) ត្រូវបានក្រុមភេវរករវាយប្រហារឲ្យធ្លាក់នៅលើទីក្រុងនោះ ដើម្បី​ជាការ​សងសឹកទៅនឹងការបាញ់ដោយច្រឡំ របស់កងទ័ពជើងទឹកអាមេរិក ទៅលើយន្ដហោះដឹកទំនិញមួយនៃប្រទេស​អៀរ៉ង់។

អ្នកនិពន្ធរូបនេះ បានបន្ទោសអ្នកសើបអង្កេតករណី នៃការធ្លាក់យន្ដហោះរបស់ក្រុមហ៊ុនម៉ាឡេស៊ី ថាបានផ្ដោត​ការ​សង្ស័យ ទៅក្នុងទិសដៅមួយដែលខុស។ ជាពិសេស «បន្ទាប់ពីគ្មានបំណែកណាមួយ ត្រូវបានរកឃើញ នៅក្នុងលំហ​ខាងត្បូងនៃមហាសមុទ្រឥណ្ឌានោះ តែវាកាន់តែធ្វើឲ្យ មានការសង្ស័យខ្លាំងឡើង»៕