ក្រោយពីការបូជាសព្វកម្មកររងគ្រោះម្នាក់ទៀត ដែលជាជនរងគ្រោះទី៥នៃការស្លាប់ ក្នុងការបង្ក្រាបដោយហិង្សា ពីកម្លាំងសមត្ថកិច្ចចម្រុះ នៅផ្លូវវ៉េងស្រេង កាលពីដើមខែមករា ក្នុងការទាមទារប្រាក់ឈ្នួល ១៦០ដុល្លារ ក្នុងមួយខែ ជនជាប់ឃុំ២១នាក់ ដែលកំពុងឃុំខ្លួន នៅក្នុងពន្ធនាគារព្រៃស ទាក់ទិននឹងព្រិត្តិការណ៍នេះ បានធ្វើការរិះគន់ថា អ្នកនយោបាយខ្មែរថាខ្សោយ ហើយពុំមានការទទួលខុសត្រូវចំពោះពលរដ្ឋខ្លួនឯង។

បាតុកម្មដ៏បង្ហូឈាម នៅវ៉េងស្រេង ថ្ងៃទី៣ ខែមករា ឆ្នាំ២០១៤។ (រូបថត MONOROOM.info/ O.Vary)

ជីវិត - លោក មួន សុខមាន អាយុ ២៩ ជាកម្មករបំរើការនៅក្នុងសួនកាណាឌីយ៉ា បានទទួលមរណភាព នៅថ្ងៃទី១៧ ឧសភា វេលាម៉ោង ៣:១៥ ទៀបភ្លឺ ដែលជាជនទី៥ស្លាប់ដោយការបង្ក្រាបដោយហិង្សា ពីកម្លាំងសមត្ថកិច្ចចម្រុះ នៅ​ផ្លូវវ៉េងស្រេង កាលពីដើមខែមករា ដោយបានបន្សល់ទុកភរិយាឲ្យមេម៉ាយ និងកូនប្រុស​អាយុ៣ឆ្នាំម្នាក់ឲ្យកំព្រា​ឪពុក។

លោក លុច ពុយ ឪពុកបង្កើតរបស់សព មួន សុខមាន បានឲ្យដឹងក្រោយពីពិធីបូជាសព្វកូនប្រុសរបស់ខ្លួនថា ចាប់​តាំង​ពីវាយបង្ក្រាបនៅផ្លូវវ៉េងស្រេង កន្លងមកកូនប្រុសលោក ស្ថិតក្នុងស្ថានភាពធ្ងន់ធ្ងរ ដោយក្បាលមានស្នាមជាំ ហើមធំ ប៉ុន្តែនៅក្នុងហ្វីលដែលស្កែនមើលនោះ ពុំឃើញមានអីទេ ចំនែកភ្នែកខាងឆ្វេង ត្រូវបានពិការដោយសាររង​ការវាយទាត់ធាក់ ពីកម្លាំងសមត្ថកិច្ច។ ហើយកូនរបស់គាត់ តែងតែធ្វើទុក្ខដូចជាឈឺក្បាលខ្លាំង វិលមុខដួល និងជួន​កាលភ្នែកមើលមិនឃើញ។ ក្រោយពីព្រឹតិ្តការណ៍នោះ កូនរបស់លោកត្រូវបានប្រពន្ធឲ្យសម្រាកនៅផ្ទះ គ្រាន់តែមើល​កូនប្រុសអាយុ៣ ឆ្នាំ ប៉ុណ្ណោះ។

លោកបានថ្លែងទាំងអួលដើមកថា៖ «កូនប្រសាស្រីរបស់ខ្ញុំ បានទូរស័ព្ទមកប្រាប់នៅទៀបភ្លឺថា ស្ថានភាពប្តីមិនស្រួល ខ្ញុំក៏យកម៉ូតូមកឌុបគេ ទៅពេទ្យឯកជនវិសាលសុខ។ ប៉ុន្តែនៅពេលទៅដល់ លោកគ្រួពេទ្យបានប្រាប់ថាកូនរបស់ខ្ញុំ បានដាច់ខ្យល់ស្លាប់បាត់ទៅហើយ។ ខ្ញុំគ្មានលុយជួលឡានពេទ្យ ខ្ញុំក៏សម្រេចចិត្តដឹកសពកូនខ្ញុំនឹង​ម៉ូតូដោយឲ្យគេ​អង្គុយឳបខ្ញុំ ហើយប្អូនប្រុសខ្ញុំអង្គុយឳបសពគេ (ពីក្រោយ)។ ពួកយើងក៏បានឌុបសពគេមកដល់វត្តសំបួរមាស ដើម្បី​ធ្វើបុណ្យ។»។

លោកបានថ្លែងឲ្យដឹងទៀតថា វាអយុត្តិធម៌ណាស់ សម្រាប់កូនប្រុសរបស់លោក ពីព្រោះគេគ្រាន់តែទៅចូលរួមធ្វើការ​តវ៉ាតម្លើងប្រាក់ខែ ១៦០ដុល្លារដោយពុំមានអាវុធអ្វីទាំងអស់ ប៉ុន្តែត្រូវបានគេវាយឲ្យរងរបួសធ្ងន់ រហូតដល់ស្លាប់។ លោកបានថ្លែងថា៖ «នៅក្នុងរឿងនេះ រដ្ឋាភិបាលមិនអាចថាធ្វើមិនដឹងមិនលឺបានទេ រដ្ឋាភិបាលត្រូវតែទទួលខុសត្រូវ ពីព្រោះមន្ត្រីរបស់រដ្ឋាភិបាល គឺជាអ្នកប្រើហឹង្សាវាយមកលើកូនខ្ញុំ និងកម្មករផ្សេងទៀត»។

ដោយសារតែការគ្មានប្រាក់ សពរបស់លោក មួន សុខមាន នឹងត្រូវធ្វើបុណ្យ គម្រប់ខួប ៧ថ្ងៃ រួមបញ្ចូលទាំងបុណ្យ ១០០ថ្ងៃ នៅឯស្រុកកំណើតស្ថិត ក្នុងភូមិរលាំងទឹក ឃុំស្រង់ ស្រុកគងពិសី ខេត្តកំពង់ស្ពឺ។ លោក លុច ពុយ បាន​ថ្លែង​ឲ្យដឹងថា៖ «យើងគ្មានលុយដូច្នេះ យើងធ្វើបុណ្យ៧ថ្ងៃ និង១០០ថ្ងៃ ក្នុងថ្ងៃតែមួយតែម្តង»។

បើយោងទៅតាមសេចក្តីសម្រង់ របកគំហើញរបស់គណៈកម្មការវាយតម្លៃការខូតខាត ដែលបង្កឡើងដោយបាតុកម្ម របស់ក្រសួងមហាផ្ទៃដែលបានចេញផ្សាយកាលពីថ្ងៃទី២៦ ខែ មិនា ឲ្យដឹងថា ចាប់តាំងថ្ងៃធ្វើបាតុកម្ម ក្រោយការបោះ​ឆ្នោត ថ្ងៃទី២៨កក្កដា ឆ្នាំ២០១៣ មានមនុស្សចំនួន៤នាក់បានស្លាប់ ប្រជាពលរដ្ឋនិងកំលាំសមត្ថកិច្ចចំនួន ៦៤នាក់​បានរងរបួសនិង មនុស្ស ២៣នាក់បានឃាត់ខ្លួន ព្រមទាំងខូខាតទ្រព្យសម្បតិ្តសាធារណៈរបស់រដ្ឋ និងទ្រព្យសម្បត្តិ​របស់ឯកជននៅរាជធានីភ្នំពេញ និងខេត្តចំនួន ជិត១០០លានដុល្លារ។

ចំនែកឯ លោក វ៉ន ពៅ ប្រធានសមាគមសេដ្ឋកិច្ចក្រៅប្រព័ន្ធ ដែលជាប់ឃុំនៅក្នុងពន្ធនាគារព្រៃស បានថ្លែងឲ្យដឹងថា លោកសោកស្តាយបំផុត ចំពោះអ្វីដែលកើតឡើង ហើយការស្លាប់របស់កម្មករម្នាក់ថែមទៀត នៅក្នុងការបង្ក្រាបនោះ គឺជាការទទួលខុសត្រូវរបស់អ្នកនយោបាយខ្មែរ អ្នកនយោបាយកុំចោទថា ពួកគេជាអ្នកញុះញ៉ង់ឲ្យធ្វើការតវ៉ា ត្រូវរក​មូលហេតុវាឲ្យច្បាស់។ លោកបានថ្លែងថា៖ «ដោយសារតែក្រពះវាស្រេកឃ្លាន ទើបក្រពះហ្នឹង វាជម្រុញឲ្យកម្មករ​តវ៉ា។ អ្នកនយោបាយខ្មែរខ្សោយបំផុត និងគ្មានការទទួលខុសត្រូវ សូមេត្តាឈប់យកកម្មកររបស់ខ្លួនឯង ធ្វើជា​ចំណាត់​ខ្មាំងនយោបាយ ដើម្បីប្រយោជន៍របស់ខ្លួនឯង។ ភាពជាប់គាំងនយោបាយមិននាំគ្នាដោះទេ តែបែរយកពួក​យើងជាចំណាត់ខ្មាំងទៅវិញ។»។

លោកបានថ្លែងឲ្យដឹងទៀតថា ដូចករណីរបស់ពួកលោកដែលជាប់ឃុំនៅក្នុងពន្ធនាគារ អាជ្ញាធរពុំបានធ្វើការ​ស្រាវ​ជ្រាវរកអ្នក ដែលប្រើហឹង្សារមកលើកម្មករ ទៅផ្តន្ទាទោសនោះទេ បែរជាចាប់ពួកលោក ដែលជាជនរងគ្រោះដាក់​ពន្ធនាគារទៅវិញ។ លោកបានថ្លែងឲ្យដឹងថា៖ «មន្ត្រីក្រសួងមហាផ្ទៃខ្លួនឯងទេ ដែលខ្សោយ មេត្តាកុំចោទយើងថា​ពួកអានាធិបតេយ្យ ពួកលោកទេ ដែលប្រដាប់ដោយអាវុធហើយបាញ់កម្មករ យ៉ាងអានាធិបតេយ្យនោះ ពួកខ្ញុំគ្រាន់​តែទៅចូលរួមឃ្លាំមើលកម្មករតវ៉ាប៉ុណ្ណោះ ពួកយើងគ្មានអាវុធដូចអស់លោកទេ»។

លោក សម រង្ស៊ី ប្រធានគណបក្សសង្គ្រោះជាតិ ដែលបានអញ្ជើញទៅ ចូលរួមរំលែកមរណៈទុក្ខជាមួយក្រុមគ្រួសារ​នៃសពកម្មករ ដែលបានស្លាប់ បន្ទាប់ពីរងរបួសក្បាលធ្ងន់ធ្ងរដែរនោះ បានអះអាងថា លោកនឹងស្វែងរកយុត្តិធម៌ដល់​ជន​រងគ្រោះ។ លោកបានថ្លែងទៀតថា៖ «ខ្ញុំនឹងស្វែងរកយុត្តិធម៌ជនរងគ្រោះ និងការតម្លើងប្រាក់ខែ ១៦០ដុល្លារ»។

លោក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេស បានថ្លែងឲ្យដឹងថា នៅក្នុងករណីនេះត្រូវតែធ្វើការស៊ើប​អង្កេតឲ្យបានត្រឹមត្រូវ ពលរដ្ឋទាំងនោះ ពុំអាចចេះតែនាំគ្នាដើរចោទប្រកាន់មកលើអាជ្ញាធរនោះទេ ថាតើរឿងរ៉ាវនោះ​វាកើតឡើងយ៉ាងម៉េច អ្នកណាជាអ្នកបង្កើតវា។ លោកបានថ្លែងឲ្យដឹងថា៖ «យើងត្រូវធ្វើការស៊ើបអង្កេតថា តើការ​ស្លាប់នោះដោយសារអាជ្ញាធរ រឺក៏ជាឧប្បទ្ទេហេតុមួយកើតឡើងចៃដន្យ»។

លោក អំ សំអាត មន្ត្រីស៊ើបអង្កេតជាន់ខ្ពស់ អង្គការការពារសិទ្ធិមនុស្សលីកាដូ បានថ្លែងឲ្យដឹងថា គាត់ពិតជាត្រូវស្លាប់​ដោយការវាយដំនោះមែន ហើយវាអយុត្តិធម៌បំផុតសម្រាប់គាត់ ដែលបានរងចាំនូវភាពយុត្តិធម៌ ដែលស្ថិតនៅឆ្ងាយ​ដូចជើងមេឃរហូតដល់ខ្លួនស្លាប់ នេះគឺជាការទទួលខុសត្រូវរបស់រដ្ឋាភិបាល ពីព្រោះកំលាំងដែលប្រើហឹង្សារនោះ គឺ​ជាមន្ត្រីរបស់រដ្ឋាភិបាល។ លោកបានថ្លែងឲ្យដឹងទៀតថា៖ «នៅក្នុងរឿងនេះ ពុំឃើញមានអ្នកណាមួយចេញមុខ មក​ទទួលខុសត្រូវនោះទេ ដូច្នេះខ្ញុំសុំជម្រុញឲ្យរដ្ឋាភិបាល ធ្វើការស្រាវជ្រាវក្នុងរឿងនេះ ដើម្បីផ្តល់យុត្តិធម៌ដល់ជន​រងគ្រោះ»៕