ធ្លាក់យន្ដហោះយោធាឡាវ ស្លាប់២០នាក់ រួមទាំងឧបនាយករដ្ឋមន្ត្រីម្នាក់
យន្ដហោះប្រភេទ អង់តូនូវ (Antonov 74TK-300D) ផលិតនៅប្រទេសរ៉ូស្សី ដែលបានដឹកវរជនសំខាន់ៗ របស់រដ្ឋាភិបាលប្រទេសឡាវ បានជួបគ្រោះអាក្រក់ ធ្លាក់នៅក្នុងតំបន់ជាប់នឹងព្រំដែនភាគខាងជើង ក្នុងថ្ងៃទី១៧ ខែឧសភានេះ។ តុល្យភាពចុងក្រោយ បានឲ្យដឹងថា មនុស្សជិះនៅក្នុងយន្ដហោះយ៉ាងហោច២០នាក់ បានស្លាប់បាត់បង់ជីវិត ក្នុងនោះឧបនាយកនាយករដ្ឋមន្ត្រី និងជារដ្ឋមន្ត្រីការពារជាតិឡាវមួយរូបផង។
យន្ដហោះប្រភេទ អង់តូនូវ (Antonov 74TK-300D) របស់ប្រទេសឡាវ។ (រូបថតឯកសារ)
-----------------------------------
ដោយ កេសរកូល (ទំនាក់ទំនង៖ [email protected]) - ភ្នំពេញ ថ្ងៃទី១៧ ឧសភា ២០១៤
-----------------------------------
ធ្លាក់យន្ដហោះ - មនុស្សជាង២០នាក់ ក្នុងនោះឧបនាយកនាយករដ្ឋមន្ត្រី និងជារដ្ឋមន្ត្រីការពារជាតិឡាវមួយរូប អភិបាលក្រុងវៀងចន្ទ និងវីរជនសំខាន់ចំនួនបួននាក់ផ្សេងទៀត បានស្លាប់ក្នុងគ្រោះធ្លាក់យន្ដហោះ ដែលបានកើតឡើងក្នុងអំឡុងម៉ោងប្រមាណជា៦និង១៥នាទី នៅចំងាយប្រមាណជា៤០០០ម៉ែត្រ ពីព្រលានយន្ដហោះ សៀង ខាង (Xieng Khouang) ដែលត្រូវចុះចត។ ប៉ុន្តែតុល្យភាពចេញពីគ្រោះថ្នាក់នេះ នៅក្នុងលក្ខណៈវាយតម្លៃជាបន្តបន្ទាប់នៅឡើយ។ តែបើតាមអាជ្ញាធរប្រទសថៃ ដែលនៅជាប់នឹងតំបន់នោះ បានឲ្យដឹងថា អ្នកដំណើរចំនួនបីនាក់ បានរួចរស់មានជីវិត។
ស្ថានីយទូរទស្សន៍របស់ថៃបានផ្សាយរូបភាពដំបូងគេ ទាក់ទងនឹងគ្រោះថ្នាក់នេះ ដោយឃើញមានភ្លើងឆេះ និងផ្សែងហុយខ្មួលខ្មាញ់ចេញពីព្រៃទីកន្លែងដែលយន្ដហោះធ្លាក់។
លោក ដួងចៃ ភីចិត (Douangchay Phichit) បានដឹកនាំគណប្រតិភូជាន់ខ្ពស់របស់ប្រទេសឡាវ ធ្វើដំណើរទៅកាន់តំបន់នោះ ដើម្បីចូលរួមក្នុងពិធីខួបលើកទី៥៥ នៃការបង្កើតកងទ័ពប្រជាជនឡាវ។ យន្ដហោះដែលពួកគេជិះនេះ បានហោះចេញពីរដ្ឋធានីវៀងចន្ទ ហើយបានធ្វើដំណើរប្រមាណជា៥០០គីឡូម៉ែត្រ មុននឹងធ្លាក់។
មូលហេតុដែលឈានទៅដល់ការធ្លាក់យន្ដហោះនេះ នៅមិនទាន់ឲ្យដឹងនៅឡើយ។
ប្រទេសឡាវ បានជួបគ្រោះធ្លាក់យន្ដហោះ ប្រមាណជាជាង៣០ដងហើយ រាប់ចាប់តាំងពីឆ្នាំ១៩៥០មក។ គ្រោះថ្នាក់មុននេះ បានកើតឡើងទៅលើយន្ដហោះ ATR72-600 របស់ក្រុមហ៊ុនអាកាសចរណ៍ជាតិឡាវ ដែលបានធ្លាក់នៅមុនការចុះចតបន្តិចនៅព្រលានយន្ដហោះ ប៉ាកសេ (Pakse)។ យន្ដហោះ បានធ្លាក់ទៅក្នុងទន្លេមេគង្គ ចម្ងាយប្រមាណជា៨គីឡូម៉ែត្រ ពីព្រលាន ហើយបានសម្លាប់មនុស្ស៤៩នាក់ ក្នងនោះ៥នាក់ ជាសមាជិកបម្រើការនៅលើយន្ដហោះ៕
សូមទស្សនាវីដេអូរបស់ទូរទស្សន៍ថៃ ដែលផ្សាយដំបូងគេដូចតទៅ៖