អ្នកវិភាគនយោបាយ និងសង្គមឯករាជ្យកម្ពុជា និងតំណាងអង្គការសង្គមស៊ីវិលបានលើកឡើងថា រដ្ឋាភិបាល​មិនត្រូវ​យល់ច្រឡំថា គ្រប់ស្ថាប័នសង្គមស៊ីវិលទាំងអស់ មាននិន្នាការប្រឆាំងរដ្ឋាភិបាលនោះទេ តែគប្បីផ្តើមឲ្យតម្លៃ​ពេញ​លេញដល់គ្រប់ស្ថាប័នសង្គមស៊ីវិល និងសហការ ក្នុងភាពជាដៃគូពិតប្រាកដ ដើម្បីចូលរួមចំណែក​អភិវឌ្ឍន៍សង្គមជា​មួយគ្នា។

លោក ហ៊ុន សែន (រូបលើកដៃចង្អុលនៅកណ្ដាល) នាយករដ្ឋមន្ត្រីកម្ពុជា។ (រូបថត ហ្វេសប៊ុក)

ដោយ អ៊ំ បូរី (ទំនាក់ទំនង៖ [email protected]) - ភ្នំពេញ ថ្ងៃទី១៣ ឧសភា ២០១៤
---------------------

សង្គម - លោក សន ជ័យ មន្ត្រីសម្របសម្រួលបណ្ដាញរួបរួម ដើម្បីគណនេយ្យភាពសង្គម ប្រចាំអាស៊ីបូព៌ា និង​ប៉ាស៊ីហ្វិក ដែលមានអង្គការសមាគមជាដៃគូចំនួន ១២ ស្ថាប័ន បានថ្លែងប្រាប់ទស្សនាវដ្តីមនោរម្យ.អាំងហ្វូ នៅថ្ងៃទី​១៣ ខែឧសភា ឆ្នាំ២០១៤ នេះថា៖ «ភាពជាដៃគូរវាងរដ្ឋាភិបាល និងសង្គមស៊ីវិលហាក់ដូចជា​មិនទាន់ជិតស្និទ្ធ​ជា​មួយគ្នាប៉ុន្មានទេ ខណៈរដ្ឋាភិបាលនៅមន្ទិលសង្ស័យ ពីតួអង្គសង្គមស៊ីវិលហ្នឹង ថាជាក្រុមប្រឆាំងទៅវិញ។»

មន្ត្រីសម្របសម្រួលបណ្ដាញរួបរួម ដើម្បីគណនេយ្យភាពសង្គម ដដែលនេះបានពន្យល់ថា ត្បិតកិច្ចការខ្លះ​សង្គម​ស៊ីវិលមិនមានសមត្ថភាព និងជំនាញ ដូចក្រុមហ៊ុនឯកជន ឬដៃគូឯកជន តែជាបទពិសោធន៍​របស់រដ្ឋាភិបាល​ប្រទេស​កាន់លិទ្ធិប្រជាធិបតេយ្យ អាចមានការរីកចម្រើនបាន ក៏អាស្រ័យមានការចូលរួមវិភាគទានយ៉ាងធំធេង ពីក្រុម​អង្គការ​សង្គមស៊ីវិល។

សម្រាប់ស្ថានការណ៍បច្ចុប្បន្ននៅកម្ពុជាលោក សន ជ័យ បញ្ជាក់ថា៖ « ប្រទេសដែលមិនទាន់មានអភិបាលកិច្ចល្អ និងមានអំពើពុករលួយដូចនេះ វាអាចធ្វើឲ្យមន្រ្តីខ្លះគិតថាការសហការជាមួយសង្គមស៊ីវិល វាធ្វើឲ្យបាត់ផល​ប្រយោជន៍របស់ពួកគេទៅវិញ។ (...) បើគិតពីឆ្នាំ១៩៩៣មក សង្គមស៊ីវិល មានជំនាញ និងបទពិសោធន៍ច្រើន ដូច្នេះ​រដ្ឋាភិបាល គួរតែបើកចិត្តឲ្យទូលាយ ព្រោះសង្គមស៊ីវិលមិនមែនជាគូប្រជែងនយោបាយទេ សង្គមស៊ីវិល​គ្រាន់​តែ​ចង់​ឃើញប្រទេសមានការអភិវឌ្ឍន៍បានត្រឹមត្រូវ និងធានានិរន្តរភាព។»

ទទ្ទឹមនឹងការអះអាងថា ក្រុមអង្គការសង្គមស៊ីវិលជាដៃគូមិនអាចខ្វះបាន ក្នុងដំណើរការអភិវឌ្ឍន៍ប្រទេសកម្ពុជា កន្លង​មករដ្ឋាភិបាលគណបក្សប្រជាជនកម្ពុជា ដែលបានគ្រប់គ្រងប្រទេសកម្ពុជា ជាង៣០សិបឆ្នាំហើយនោះ ក៏បានចោទ​ប្រកាន់ថា មានអង្គការសង្គមស៊ីវិលមួយចំនួន បំពេញការងាររបស់ខ្លួន ដោយមិនឯករាជ្យ និងលំអៀងទៅរក​គណបក្ស​ជំទាស់។

ជុំវិញបញ្ហានេះ លោកកែម ឡី អ្នកវិភាគនយោបាយ និងជាអ្នកតាមដានស្ថានការណ៍សង្គមឯករាជ្យកម្ពុជា បាន​ពន្យល់​ថា ប្រជាពលរដ្ឋកម្ពុជា កំពុងឃ្លាតឆ្ងាយពីរបៀបវារៈនៃការអភិវឌ្ឍន៍ ដោយសាររដ្ឋាភិបាលបច្ចុប្បន្ន ធ្វើការ​ជាមួយដៃគូឯកជន ច្រើនជាងសង្គមស៊ីវិល និងការជំរុញផ្នែកសង្គមកិច្ច។ លោកកែម ឡី បញ្ជាក់ថា៖ «សង្គមស៊ីវិល ដៃគូឯកជន និងរដ្ឋាភិបាល ដៃគូទាំងបីនឹងមិនអាចខ្វះគ្នាបានទេ។ តែបើដៃគូរទាំងបីហ្នឹង ស្រាក់ដៃគ្នាធ្វើការក៏ដោយ ក៏មិនទទួលបានជោគជ័យដែរ ប្រសិនបើភាគីទាំងនោះ មិនយកប្រជាពលរដ្ឋជាស្នូល៕»