លោក ជួន មុំថុល ដែលជាប្រធានសហជីពកម្មករផង និងជាទីប្រឹក្សាអមក្រសួងការងារ និងបណ្តុះបណ្តាលវិជ្ជាជីវៈ​ផង បានថ្លែងថា លោកមិនខ្វល់នឹងពាក្យរិះគន់របស់មជ្ឈដ្ឋាន​ទូទៅ ចំពោះមុខតំណែងរបស់លោកនោះទេ។ លោក​បានអះអាងថា នោះជារឿងសាមញ្ញទៅហើយ នៅក្នុងប្រទេស​កាន់លិទ្ធិប្រជាធិបតេយ្យ ដែលចាំបាច់ត្រូវតែ​មាន​ការ​រិះគន់។

លោក ជួន មុំថុល។ (រូបថត ហ្វេសប៊ុក)

យុត្តិធម៌ - បច្ចុប្បន្នលោក ជួន មុំថុល ត្រូវបានគេដឹងថា មានមុខតំណែងយ៉ាងហោចណាស់៥ ដែលពាក់ព័ន្ធ​ជាមួយ​ក្រសួងការងារ និងបណ្តុះបណ្តាលវិជ្ជាជីវៈ និងក្រសួងសង្គមកិច្ចអតីតយុទ្ធជន និងយុវនីតិសម្បាទា។ មុខតំណែង​ទាំង​នោះរួមមាន៖

ទី១. ទីប្រឹក្សាអមក្រសួងការងារ និងបណ្តុះបណ្តាលវិជ្ជាជីវៈ មានឋានៈស្មើអនុរដ្ឋលេខាធិការ។
ទី២. អគ្គលេខាធិការរង នៃអគ្គលេខាធិការដ្ឋាន នៃគណៈកម្មាធិការសម្រាប់ការដោះស្រាយបញ្ហាកូដកម្ម បាតុកម្ម នៅ​តាមគ្រប់មុខសញ្ញា មានឋានៈស្មើអគ្គនាយក នៃអគ្គនាយកដ្ឋានរបស់ក្រសួង។
ទី៣. អនុប្រធានគណៈកម្មការ ប្រឹក្សាការងារ ភាគីតំណាងកម្មករ និយោជិត។
ទី៤. ប្រធានសហព័ន្ធ សហជីពខ្មែរ។
ទី៥. សមាជិកនៃអគ្គលេខាធិការដ្ឋាន នៃគណៈកម្មាធិការសម្រាប់ការដោះស្រាយបញ្ហាកូដកម្ម បាតុកម្ម នៅតាមគ្រប់​មុខសញ្ញា។

មានមុខតំណែងច្រើន ក្នុងពេលតែមួយ ស្ថាប័នពាក់ព័ន្ធតែមួយ ហើយក៏មានមុខតំណែងត្រូវការពារប្រយោជន៍កម្មករ និយោជិត ស្របពេលដែលមានមុខតំណែងស្និតនឹងរដ្ឋាភិបាល នាំឲ្យមជ្ឈដ្ឋានទូទៅដាក់ការសង្ស័យ ពីសមត្ថភាពនិង​ប្រសិទ្ធិភាពបំពេញការងារ ដែលមានលក្ខណៈ«វិសមិតភាពការងារ» របស់លោកជួន មុំថុល។ នេះមិនទាន់​រាប់​បន្ថែម ពីថានៈរបស់លោក ដែលជាសកម្មជននយោបាយដ៏លេចធ្លោមួយរូប របស់គណបក្សប្រជាជនកម្ពុជានោះផង។

តែបញ្ហាទាំងនេះ ត្រូវបានលោក ជួន មុំថុល បកស្រាយប្រាប់ទស្សនាវដ្តីមនោរម្យ.អាំងហ្វូនៅថ្ងៃទី០៣ ខែឧសភា ឆ្នាំ​២០១៤ នេះថា៖ «តំណែងទាំងនោះ ពិតជាមានពិតប្រាកដមែន តែតំណែងទាំងនោះភាគច្រើន ជាតំណែង​បណ្តោះ​អាសន្នៗប៉ុណ្ណោះ។ ការងារនៅតំណែងផ្សេង មានអញ្ចឹងហើយ តែមុខតំណែងស្នូល (ទីប្រឹក្សាអមក្រសួងការងារ និង​បណ្តុះបណ្តាលវិជ្ជាជីវៈ) របស់យើងនៅតែធ្វើ។»

ទីប្រឹក្សាអមក្រសួងការងារ និងបណ្តុះបណ្តាលវិជ្ជាជីវៈរូបនេះ ក៏បានអះអាងដែរថា តាមពិតទៅ មុខតំណែង​ទាំងអស់​នេះ ភាគច្រើនជាការចាត់តាំង របស់រដ្ឋាភិបាលគណបក្សប្រជាជនកម្ពុជា ហើយការងារក៏គ្មាន បញ្ហាស្មុគស្មាញ ឬ​ច្របូកច្របល់ដូចការរិះគន់អីដែរ។ លោកជួន មុំថុល បញ្ជាក់ថា៖ « គ្មានអីទេ តាមធម្មតា ការរិះគន់វាចេះតែ​មានអញ្ចឹង​ហើយ»។

នៅក្នុងរដ្ឋាភិបាលដឹកនាំដោយលោក ហ៊ុន សែន មិនមែនមានករណីតែលោក ជួន មុំថុល មួយរូបទេ តែនៅមាន​តំណែងជាច្រើនផ្សេងទៀត  ដែលសុទ្ធតែត្រូវបានបង្កើតឡើង ដើម្បីបំពាក់ឲ្យបុគ្គលតែមួយនាក់ ឬមិនមាន​មនុស្ស​គ្រាប់គ្រាន់ ដើម្បីនឹងមកកាន់ការនៅក្នុងមុខតំណែងទាំងនោះទេ។ បើគ្រាន់តែគេមើលលោក សុខ អាន តែម្នាក់ ដែល​ក្រៅពីតំណែងបច្ចុប្បន្ន ជាឧបនាយករដ្ឋមន្ដ្រី រដ្ឋមន្ដ្រីទទួលបន្ទុកទីស្ដីការគណៈរដ្ឋមន្ដ្រីនោះ មន្ត្រីដៃស្ដាំដ៏ជំនិត​របស់​លោក ហ៊ុន សែន រូបនេះ នៅមានកាន់តំណែង«គ្រាក់ៗ» មិនតិចជាង១០ផ្សេងទៀតឡើយ៕

-----------------------------------------------
ដោយ អ៊ំ បូរី (ទំនាក់ទំនង៖ [email protected]) - ភ្នំពេញ ថ្ងៃទី០៣ ឧសភា ២០១៤