បារ៉ាក់ អូបាម៉ា គាំទ្រ​និង​ជួយ​ម៉ាឡេស៊ី រឿង​រុក​រក​យន្ដហោះ​បាត់​ខ្លួន

បន្ទាប់ពីមកដល់ប្រទេសម៉ាឡេស៊ី កាលពីថ្ងៃសៅរ៍ទី២៧ ខែមេសា នៅក្នុងដំណើរទស្សនកិច្ចវិលជុំ ក្នុងទ្វីបអាស៊ីនោះ លោកប្រធានាធិបតីសហរដ្ឋអាមេរិក បារ៉ាក់ អូបាម៉ា​ បានថ្លែងអះអាងជាថ្មី ពីការគាំទ្រអាជ្ញាធររបស់ប្រទេសម៉ាឡេស៊ី ដែលកំពុងតែរកនូវការរិះគន់ ជុំវិញប្រសិទ្ធិភាពនៃការរុករកយន្ដហោះប៊ូអីង បាត់ខ្លួនតាំងពីថ្ងៃទី៨ខែមីនាមកនោះ។
Loading...
  • ដោយ: កេសរ កូល
  • កែប្រែចុងក្រោយ: April 28, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

បន្ទាប់ពីមកដល់ប្រទេសម៉ាឡេស៊ី កាលពីថ្ងៃសៅរ៍ទី២៧ ខែមេសា នៅក្នុងដំណើរទស្សនកិច្ចវិលជុំ ក្នុងទ្វីបអាស៊ីនោះ លោកប្រធានាធិបតីសហរដ្ឋអាមេរិក បារ៉ាក់ អូបាម៉ា​ បានថ្លែងអះអាងជាថ្មី ពីការគាំទ្រអាជ្ញាធររបស់ប្រទេសម៉ាឡេស៊ី ដែលកំពុងតែរកនូវការរិះគន់ ជុំវិញប្រសិទ្ធិភាពនៃការរុករកយន្ដហោះប៊ូអីង បាត់ខ្លួនតាំងពីថ្ងៃទី៨ខែមីនាមកនោះ។


លោកប្រធានាធិបតីសហរដ្ឋអាមេរិក បារ៉ាក់ អូបាម៉ា (រូបឆ្វេង) និងលោកនាយករដ្ឋមន្ត្រីម៉ាឡេស៊ី។ (រូបថត Reuters)

បាត់យន្ដហោះ - នៅមុនបញ្ចប់ដំណើរទស្សនកិច្ចវិលជុំនៅទ្វីបអាស៊ី ប្រធានាធិបតីអាមេរិក លោក បារ៉ាក់ អូបាម៉ា បានអះអាងសារជាថ្មី នូវការគាំទ្ររបស់លោក ចំពោះអាជ្ញាធរម៉ាឡេស៊ី ក្នុងការរុករកយន្ដហោះបាត់ខ្លួន ដែលបង្ក​ឲ្យ​មានអាថ៌កំបាំងមកទល់នឹងថ្ងៃនេះ។

រដ្ឋមន្ត្រីក្រសួង​ដឹកជញ្ជូន​ម៉ាឡេស៊ី លោក ហ៊ីស្សាមូឌីន ហ៊ូសេន (Hishammuddin Hussein) បានស្រង់សម្ដី​របស់​លោក បារ៉ាក់ អូបាម៉ា មកថ្លែងប្រាប់អ្នកសារព័ត៌មានថា «លោកបានដឹងថាផ្លូវដើរស្វែងរក មានរយៈពេលយូរ​ត​ទៅទៀត និងពិបាក។ យើងនឹងធ្វើការនេះទាំងអស់គ្នា។ ការគាំទ្រ នៅទីនេះនៅឡើយ។»

លោករដ្ឋមន្ត្រី បានបន្តទៀតថា «ខ្ញុំរីករាយណាស់ ដែលបានឮបែបនេះ ព្រោះដំណើរទំនងនៅក្នុងការរុករកនេះ ពិត​ជាមានរយៈពេលយូរដូច្នេះមែន»។

យន្ដហោះប៊ូអីង ៧៧៧ ភ្ជាប់ជើងហោះហើរ MH370 បានបាត់ខ្លួននៅព្រឹកព្រហាមថ្ងៃទី៨ ខែមីនា នៅក្រោយ​ពេល​ដែលយន្ដហោះ បានបង្ហើបខ្លួនពីដី បានប្រមាណជិត១ម៉ោង។ យន្ដហោះ របស់ក្រុមហ៊ុន ម៉ាឡេស៊ីអែរឡាញ បាន​ហោះចេញពីរដ្ឋធានី កូឡាឡំពួរ ឆ្ពោះទៅកាន់រដ្ឋធានីប៉េកាំង ដោយមានអ្នកដំណើរ ២២៧នាក់ និង​អ្នកបម្រើការ​រួម​នឹងអ្នកបើកបរយន្ដហោះ ១២នាក់ ជិះនៅលើយន្ដហោះនោះផង។

គេបានដឹងសម្ដីរបស់លោកប្រធានាធិបតីអាមេរិក ថ្លែងនៅប្រទេសម៉ាឡេស៊ីទៀតថា «សហរដ្ឋអាមេរិក បានសម្រេច​ចិត្តយ៉ាងច្បាស់ ថានឹងផ្ដល់នូវគ្រប់កម្លាំង និងមធ្យោបាយដែលខ្លួនមាន» ដើម្បីតាមរុករកយន្ដហោះនេះ។

ប្រទេសម៉ាឡេស៊ី ដែលជាម្ចាស់យន្ដហោះ បានបញ្ជាក់ជាផ្លូវការ តាមរយៈនាយករដ្ឋមន្ត្រីរបស់ខ្លួន កាលពីថ្ងៃ២៥ ខែមីនា ថាយន្ដហោះបានបញ្ចប់ជីវិតរបស់ខ្លួន នៅលំហ​ខាងត្បូងនៃមហាសមុទ្រឥណ្ឌា ប៉ុន្តែរហូតមកទល់នឹង​ពេល​នេះ ការរុករកនៅក្នុងតំបន់នោះ ដោយមានការចូលរួម ពីសំណាក់ប្រទេសជាច្រើននោះ នៅមិនទាន់បានរកឃើញ​ស្លាកស្នាមណាមួយនៅឡើយ។ ការណ៍នេះបង្កឲ្យមានការក្ដៅក្រហាយកាន់តែខ្លាំងឡើង ពីសំណាក់ក្រុមគ្រួសារ​នៃជនរងគ្រោះ។ ពួកគេបានចង្អុលចំៗ ពីអសមត្ថភាពរបស់អាជ្ញាធរម៉ាឡេស៊ី ហើយនៅតែមានមន្ទិលថា ប្រទេស​ម្ចាស់យន្ដហោះ ដូចជាមា​នលាក់បំបាំងអ្វីមួយ។

នៅចំពោះការរិះគន់ទាំងនេះ អាជ្ញាធរម៉ាឡេស៊ី បានសន្យាថា នឹងបញ្ចេញឯកសារស៊ើបអង្កេត​ដំណាក់កាលដំបូង​មួយ មកផ្សាយជាសាធារណៈ នៅក្នុងសប្ដាហ៍នេះ។

បន្ទាប់ពីការរុករកមិនបានលទ្ធផល នូវប្រអប់ខ្មៅរបស់យន្ដហោះ នៅក្នុងប៉ុន្មាសប្ដាហ៍ចុងក្រោយនេះ អ្នកទទួល​ខុស​ត្រូវមួយរូប របស់ក្រសួងការពារជាតិអាមេរិក បាននិយាយរំពឹងពីការរុករកយន្ដហោះនេះ ថានឹងអាចមានរយៈពេល​រហូតដល់«រាប់ឆ្នាំ»។

សូមបញ្ជាក់ថា បន្ទាប់ពីប្រទេសជប៉ុន លោក បារ៉ាក់ អូបាម៉ា បានធ្វើដំណើរទៅកាន់ប្រទេសកូរ៉េខាងត្បូង មុននឹង​ធ្វើដំណើរមកដល់ប្រទេសម៉ាឡេស៊ី។ លោកប្រធានាធិបតីអាមេរិក នឹងបញ្ចប់ដំណើរទស្សនកិច្ចវិលជុំរបស់លោក នៅប្រទេសហ្វីលីពីន ដែលបានរងចាំលោក នៅថ្ងៃចន្ទនេះ។ លោកបារ៉ាក់ អូបាម៉ា ជាប្រធានាធិបតីអាមេរិក​លើក​ដំបូងហើយ ដែលបានធ្វើដំណើរទស្សនកិច្ចផ្លូវរដ្ឋ ទៅកាន់ប្រទេសម៉ាឡេស៊ី រាប់ចាប់តាំងឆ្នាំ១៩៦៦ ពោលគឺជិត​ហាសិបឆ្នាំកន្លងមក៕

-----------------------------------------------
ដោយ កេសរកូល (ទំនាក់ទំនង៖ [email protected]) - ភ្នំពេញ ថ្ងៃទី២៧ មេសា ២០១៤

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...