«ប្តឹង? ឲ្យដាក់សិនមក រឿងស្អី ខ្ញុំមិនទាន់ដឹងរឿងអ្វីផង» នេះជាការថ្លែងបញ្ជាក់យ៉ាងខ្លីរបស់លោក សុខ សម្បត្តិ អភិបាលខណ្ឌដូនពេញ ជាមួយទស្សនាវដ្តីមនោរម្យ.អាំងហ្វូនៅថ្ងៃទី២២ ខែមេសា ឆ្នាំ២០១៤នេះ ពីបញ្ហានៃការ​គ្រោងដាក់ពាក្យបណ្តឹងប្តឹង លោក សុខ ពេញវុធ ដែលជាសេនាធិការផ្ទាល់របស់ខ្លួនលោក ដោយលោកស្រី មួរ សុខហួរ តំណាងរាស្រ្តជាប់ឆ្នោតមណ្ឌលបាត់ដំបង មកពីគណបក្សសង្គ្រោះជាតិ។

លោកស្រីមួរ សុខហួរ ត្រូវបានសែងដោយក្រុមសន្តិសុខ​សាលា​រាជធានី​ ថ្ងៃទី២១ ខែមេសា ឆ្នាំ២០១៤។ (រូបថត MONOROOM.info/ S. Tith)

ប្រព័ន្ធច្បាប់ - ជាមួយនឹងគម្រោងប្តឹងព្យួតំណែង ឬព្យួរការងាររបស់លោកសុខ ពេញវុធ ដោយមេធាវីគណបក្ស​សង្គ្រោះជាតិ និងលោកស្រីមួរ សុខហួរ ទៅកាន់ថានានុក្រមរដ្ឋបាល និងទៅកាន់តុលាការនោះ ត្រូវបានលោក សុខ សម្បត្តិ អភិបាលខណ្ឌដូនពេញលើកឡើងយ៉ាងខ្លីថា លោកទទួលស្វាគមចំពោះពាក្យបណ្តឹងនោះ។

ចំណែកមេធាវីអមសាលាដំបូងរាជធានីភ្នំពេញលោក សួង ចាន់ថន សុំមិនបំភ្លឺលើករណីនេះទេ ព្រោះលោកមិន​ទទួលកាន់រឿងនេះ។ តែអតីតមេធាវីអមសាលាដំបូងរាជធានីភ្នំពេញមួយរូបទៀត ក្នុងលក្ខខណ្ឌមិនបញ្ចេញ​ឈ្មោះ​បានបង្ហាញតាមផ្លូវច្បាប់ថា ករណីនេះមិនថាតែលោកស្រីមួរ សុខហួរ តំណាងរាស្រ្តគណបក្សសង្គ្រោះជាតិទេ ប្រជា​ពលរដ្ឋធម្មតាក៏អាចប្តឹងពីសកម្មភាព នៃការប្រើប្រាស់នូវហិង្សា ពីសំណាក់អាជ្ញាធរមូលដ្ឋាន​នៅទីសាធារណៈ​ទៅ​លើប្រជាពលរដ្ឋស្លូតត្រង់បានដែរ។ មេធាវីរូបនោះ បានបញ្ចាក់ដូច្នេះថា៖ «ធម្មតាក្នុងករណីបទល្មើស​ជាក់ស្តែង​នៅ​តាមកន្លែងមួយៗ អាចដំណើរការនីតិវិធីនេះ តាមរយៈប៉ូលីសយុត្តិធម៌ និងទៅកាន់តុលាការ»។

សូមរម្លឹកថា តំណាងរាស្រ្តជាប់ឆ្នោតមណ្ឌលបាត់ដំបង លោកស្រី មូរ សុខហួរ បានប្រកាសគ្រោងដាក់ពាក្យបណ្តឹង​ក្នុង​សប្តាហ៍ក្រោយ ដើម្បីស្នើឲ្យមានការដកតំណែង ជាអភិបាលរងខណ្ឌដូនពេញរបស់លោក សុខ ពេញវុធ ទៅតាម​បែបបទរដ្ឋបាល ជាមួយពាក្យបណ្តឹងទៅសាលាដំបូងរាជធានីភ្នំពេញ។ លោកស្រីបានបញ្ជាក់ នៅក្នុងសន្និសិទ​សារព័ត៌មាន កាលពីព្រឹកថ្ងៃទី២២ ខែមេសា ឆ្នាំ២០១៤ នាស្នាក់ការគណបក្សសង្កាត់ចាក់អង្រែលើថា លោកស្រីនឹង​ធ្វើបណ្តឹងជាពីរផ្នែក មួយទៅតាមឋានានុក្រមរដ្ឋបាល ដើម្បីឲ្យមានការដកហូត ឬព្យួរនូវតួនាទី និងបណ្តឹងទីពីរ ប្តឹង​ទៅកាន់តុលាការ ដោយមេធាវីនៃគណបក្សសង្គ្រោះជាតិពីបទ «ប៉ុនប៉ងសម្លាប់មនុស្សដោយចេតនា» ទាំងនៅ​ទី​លានប្រជាធិបតេយ្យ ទាំងនៅទីសាធារណៈដទៃទៀតនាពេលកន្លងមក និងពេលបច្ចុប្បន្ន។

ករណីឈានដល់មានការប្តឹងឲ្យមានការដកហូត ឬព្យួតំណែងលោក សុខ ពេញ វុធ ជាជំហានទីមួយនេះ លោកស្រី​ មូរ សុខហួរ បានបញ្ជាក់ថា ដោយសារគ្រប់ករណីទាំងអស់ នៅពេលមានការជួបជុំ មិនថាតិច ឬច្រើននាក់ ឬក៏មាន​តែលោកស្រីម្នាក់ លោកស្រីតែងតែឃើញ«វត្តមាន»លោក សុខ ពេញវុធជាអ្នកបញ្ជារផ្ទាល់។ លោកស្រីបានបន្តថា ពេលខ្លះក្រុមទាំងនោះទំនងជាមិនចង់ធ្វើតាមទេ តែលោកសុខ ពេញវុធនេះ បានប្រើប្រាស់នូវពាក្យ​អាក្រក់ៗទៅ​កាន់ក្រុមទាំងនោះ ពិសេសមកលើលោកស្រី ដែលជាតំណាងរាស្រ្តជាប់ឆ្នោតតែម្តង និងពេលខ្លះអនុវត្តខ្លួនឯង​តែ​ម្តងក៏មានដែរ។ ករណីមួយទៀត ដោយសារតែលើកនេះ ក្រុមដែលទទួលបញ្ជារពីលោក សុខ ពេញវុធ បានប្រើ​ហឹង្សា​មកលើតំណាងរាស្រ្តជាប់ឆ្នោត នៃគណបក្សសង្គ្រោះជាតិ។

ទស្សនាវដ្តីមនោរម្យ.អាំងហ្វូ មិនអាចសំការបញ្ជាក់ពីលោក សុខ ពេញវុធ អភិបាលរងខណ្ឌដូនពេញបានទេ ដោយ​ទូរស័ព្ទរបស់លោកមិនអាចភ្ជាប់ទំនាក់ទំនងបាន។ តែក្នុងកិច្ចសម្ភាសជាមួយសារព័តមានដើមអំពិល លោកបាន​បញ្ជាក់ថា លោកមិនបានបញ្ជាឲ្យមានការប្រើប្រាស់នូវហិង្សានោះទេ។ ជាមួយគ្នានេះ លោកក៏ឲ្យក្រុមអ្នកចោទ​ប្រកាន់លោក បង្ហាញនូវភស្តុតាងដែលបញ្ជាក់ថា លោកជាអ្នក«បញ្ជា» ឲ្យមានការប្រើប្រាស់នូវហិង្សាទាំងនោះ។

មន្រ្តីដែលស្និតនឹងគណបក្សប្រជាជនកម្ពុជាមួយរូបសុំមិនបញ្ចេញឈ្មោះ បានប្រាប់ទស្សនាវដ្តីមនោរម្យ.អាំងហ្វូ បានធ្វើការទទួលស្គាល់ថា ការដាក់ពាក្យបណ្តឹងប្តឹងលោក សុខ ពេញវុធ នេះត្រឹមត្រូវ ពិសេសប្តឹងលើជនដៃដល់ និងអ្នកបញ្ជាផ្ទាល់។ លោកបានបន្តថា «បើមិនប្តឹង សុខ ពេញវុធទេ ថ្ងៃក្រោយនៅតែដើរវាយគេវាយឯងអញ្ចឹង។ (…) មានការបញ្ជាតាមឋានានុក្រមពីសាលាក្រុងមក ខ័ណ្ឌ។ (…) បើគ្មានបញ្ជា គ្មានការផ្តល់នូវដាវអាជ្ញាសិកទេ ក៍មិន​ហ៊ានធ្វើដែរ៕»

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី២២ មេសា ២០១៤