មួរ សុខហួរ ត្រូវសន្តិសុខរាជធានីសែងចេញ និងវាយជំនួយការឲ្យរបួស
ជាថ្មីម្តងទៀត បេក្ខជនជាប់ឆ្នោតរបស់គណបក្សសង្រ្គោះជាតិ លោកស្រីមួរ សុខហួរ ត្រូវបានក្រុមសន្តិសុខសាលារាជធានីភ្នំពេញចាប់សែងនៅថ្ងៃទី២១ ខែមេសានេះ ចេញពីទីលានប្រជាធិបតេយ្យទាំងទីណាត់ទីណែង ហើយក្រុមសន្តិសុខទាំងនោះ ថែមទាំងបានវាយជំនួយការរបស់លោកស្រី ឲ្យរងរបួស៣នាក់នោះទៀត។
លោកស្រីមួរ សុខហួរ ត្រូវបានសែងដោយក្រុមសន្តិសុខសាលារាជធានី ថ្ងៃទី២១ ខែមេសា ឆ្នាំ២០១៤។ (រូបថត MONOROOM.info/ S. Tith)
សិទ្ធិ - បន្ទាប់ពីក្រុមនគរបាលជាតិ ដែលសហការជាមួយក្រុមសន្តិសុខសាលារាជធានីភ្នំពេញ ប្រលយពាក្យថាលោកស្រី មួរ សុខហួរ មិនមែនជាតំណាងរាស្រ្តមក ភ្លាមៗនោះក្រុមសន្តិសុខសាលារាជធានីភ្នំពេញ បានចាប់សែងលោកស្រីមួរ សុខហួរ ទាំងទទឹងទទែងពីក្នុងបរិវេណ ទីលានប្រជាធិបតេយ្យ ទៅដាក់លើចញ្ចើមផ្លូវក្បែរទីលានប្រជាធិបតេយ្យ ដោយមានកម្លាំង សមត្ថកិច្ចអមសងខាង។
ក្រោយមកសកម្មជនគាំទ្រគណបក្សសង្រ្គោះជាតិ និងក្រុមអ្នកសារព័ត៌មាន ត្រូវបានក្រុមសន្តិសុខសាលារាជធានីភ្នំពេញស្រែកគំហ៊កដាក់ និងរុញច្រានបង្ខំឲ្យចេញពីផ្លូវក្បែរទីលានប្រជាធិបតេយ្យនោះដូចគ្នាដែរ។ ក្នុងហេតុការណ៍ប្រទាញប្រទង់នោះ យ៉ាងហោចណាស់មានមនុស្ស៣នាក់ដែលគេដឹងថា ជាអ្នកថតរូប និងជាជំនួយការរបស់លោកស្រី មួរ សុខហួរ ត្រូវបានក្រុមសន្តិសុខសាលារាជធានីភ្នំពេញ វាយឲ្យរងរបួសក្បាល។
តាំងពីដើមខែមេសា មកលោកស្រី មួរ សុខហួរ បានធ្វើដំណើរជាច្រើនដង ទៅកាន់ទីលានប្រជាធិបតេយ្យ រៀងរាល់ម៉ោងប្រមាណជា៨ព្រឹក ក្នុងបំណងអានច្បាប់ស្ដីពីការធ្វើបាតុកម្មដោយសន្តិវិធី និងអប់រំដល់កងកម្លាំងសមត្ថកិច្ចដែលបិទទីលានប្រជាធិបតេយ្យ មិនឲ្យពលរដ្ឋប្រមូលផ្តុំនៅទីនោះ។ តែរាល់គ្រប់សកម្មភាពបេក្ខជនជាប់ឆ្នោតរបស់គណបក្សជំទាស់នេះ តែងត្រូវបានកម្លាំងសមត្ថកិច្ច យាយី និងបង្ខំឲ្យចាកចេញពីទីលានប្រជាធិបតេយ្យ ជាបន្តបន្ទាប់។
ក្រោមហេតុផលរក្សាសន្តិសុខ និងសណ្តាប់ធ្នាប់សង្គម និងរង់ចាំការបញ្ចប់ការស៊ើបអង្កេតករណីអំពើហិង្សាដ៏បង្ហូរឈាម នៅផ្លូវវេងស្រេងកាលពីថ្ងៃទី០៣ ខែកញ្ញា ឆ្នាំ២០១៤ រដ្ឋាភិបាលកម្ពុជាតាមរយៈក្រសួងមហាផ្ទៃ និងសាលារាជធានីភ្នំពេញដែលជាសេនាធិការ បានប្រកាសបិទទីលានប្រជាធិបតេយ្យ និងហាមឃាត់មិនឲ្យមានការប្រមូលផ្តុំមនុស្ស ចាប់ពីចំនួន១០នាក់ឡើងទៅ តាំងពីដើមខែមករា ឆ្នាំ២០១៤ ដោយគ្នានការកំណត់ឲ្យបើកវិញ។
ចំណាត់ការរបស់រដ្ឋាភិបាលកម្ពុជាខាងលើ ត្រូវបានប្រធានក្រុមប្រឹក្សាភិបាល នៃមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ ចាត់ទុកថាជាហេតុផលនយោបាយ ច្រើនជាងហេតុផលច្បាប់ និងការរក្សាសន្តិសុខសង្គម។ លោក អ៊ូ វីរៈ ពន្យល់ថា៖ «កម្ពុជាយើងឥឡូវនេះ អត់មានចលាចលទេ ហើយសភាក៏មិនដែលប្រកាសចលាចលដែរ។ ហើយក៏អត់មានច្បាប់ណា ប្រកាសឲ្យបិទទីលានប្រជាធិបតេយ្យដែរ។ រដ្ឋាភិបាលកំពុងបំពានរដ្ឋធម្មនុញ្ញ និងច្បាប់ប្រទេសកម្ពុជាយើង។ នេះការបំភិតបំភ័យដល់ អ្នកហ៊ានរិះគន់៕»
ជំនួយការរបស់លោកស្រីមួរ សុខហួរ ត្រូវបានវាយឲ្យរបួស ថ្ងៃទី២១ ខែមេសា ឆ្នាំ២០១៤។ (រូបថត MONOROOM.info/ S. Tith)
លោកស្រីមួរ សុខហួរ ត្រូវបានសែងដោយក្រុមសន្តិសុខសាលារាជធានី ថ្ងៃទី២១ ខែមេសា ឆ្នាំ២០១៤។ (រូបថត MONOROOM.info/ S. Tith)
-------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី២១ មេសា ២០១៤