នៅមុខថ្ងៃចូលឆ្នាំតែបន្តិចប៉ុណ្ណោះ ប្រជាពលរដ្ឋ សិស្ស និស្សិត កម្មករ បាននាំគ្នាធ្វើចំណាក​«ពី​រាជធានីភ្នំពេញ» ជា​បណ្តើរៗឆ្ពោះទៅកាន់បណ្តាខេត្តនានា ដែលជាស្រុកកំណើតរបស់ខ្លួន។ អ្នកខ្លះធ្វើដំណើរតាមរថយន្តផ្ទាល់ខ្លួន តាម​ទោចក្រយានយន្ត និងតាមរថយន្តឈ្នួលជាដើម។ ខាងក្រោមនេះ ជាបទយកការណ៍យ៉ាងមានជំនក់ចិត្តមួយ របស់​ទស្សនាវដ្ដីមនោរម្យ.អាំងហ្វូ ដើម្បីចែកជូនលោកអ្នកទាំងឡាយ ដែលមិនបានដឹងពីហេតុការណ៍ នៃការធ្វើចំណាក​ក្រុង របស់ពលរដ្ឋនៅពេលរដូវបុណ្យទានម្ដងៗ។

ការត្រៀមឡើងរថយន្ដក្រុង នៅចំណតក្បែរផ្សារអូឬស្សី។ (រូបថត MONOROOM.info/ O. Vary)

រដូវបុណ្យទាន - នៅក្នុងចំណតរថយន្តមួយជិតផ្សាអូឬស្សី ក្នុងរាជធានីភ្នំពេញ ប្រជាពលរដ្ឋ សិស្ស និស្សិត បាន​មកកកកុញ ខ្លះប្រជ្រៀតទិញសំបុត្រ ខ្លះមកផ្ញើរឥវ៉ាន់ និងភាគច្រើនមកឡើងរថយន្តក្រុង ដើម្បីទៅលេងស្រុក​កំណើត​ជួបជុំបងប្អូនក្នុងឱកាសចូលឆ្នាំថ្មីប្រពៃណីជាតិខ្មែរ។

ក្នុងការចេញដំណើរនៃរថយន្តក្រុង នាថ្ងៃទី១២ ខែមេសានេះ មានអ្នកដំណើរសរុប មិនតិចជាង ១០០០នាក់ទេ ក្នុង​នោះមានឡានប្រមាណជា២០គ្រឿង ត្រូវបានដាក់ឲ្យដំណើរការ ទៅតាមបណ្តាខេត្តនានា តាមម៉ោងកំណត់របស់​ខ្លួន។ អ្នករៀបចំឲ្យភ្ញៀវឡើងរថយន្តមួយរូប បានថ្លែងឡើងថា ភាគច្រើននៃរថយយន្តនិងភ្ញៀវ គឺសំដៅទៅខេត្ត​ព្រះសីហនុ បាត់ដំបង សៀមរាប ពោធិសាត់ និងកំពង់ចាម។ តែម៉ោងចេញដំណើរ ត្រូវបានខកបន្តិចបន្តួច ដោយ​ហេតុតែចំនួនភ្ញៀវ និងការរៀបចំឥវ៉ាន់ មានចំនួចច្រើនហួសប្រមាណ។

ឡានចេញខកម៉ោង

ភ្ញៀវមួយចំនួន ដោយការរង់ចាំយូរ បានសម្ដែងការរអ៊ូរទាំ ចំពោះការខកខានចេញដំណើរ មិនតាមកាល​កំណត់​របស់​ខ្លួន ដែលមានខ្លះរហូតដល់ជាងកន្លះម៉ោង។ អ្នកមីង សូ សំនៀង (ឈ្មោះអ្នកសារព័ត៌មានដាក់ឲ្យ) មានសម្លេង​គួរ​សមនៅលើចំណតឡាន លើដងផ្លូវសាធារណៈ ក្រោមកំដៅថ្ងៃក្តៅហែង ក្នុងការរង់ចាំឡានជើងទីពីរ ពីភ្នំពេញ​ទៅ​សួង បានស្រែក«លឺៗ»បន្ទោសភាពយីតយ៉ាវនេះថា គ្មានការទទួលខុសត្រូវ។ អ្នកមីងបន្តថា «ក្នុងសំបុត្រដាក់​ម៉ោង​ពីរ ចេញដំណើរ។ មកដល់ម៉ោងពីរកន្លះជាងហើយ មិនទាន់ចេញដំណើរទៀត។» យ៉ាងណាក៏ដោយ ការលើក​ឡើង​នេះ​ មិនមានភាគីរថយន្ដក្រុងណាមួយតបតនោះទេ។

តែសម្លេងបុរសម្នាក់នៅក្បែនោះ ជាអ្នកដំណើរដូចគ្នា បានលើកឡើងទំនងជាគាំទ្រ​ចំពោះការចេញ«ខក»​ម៉ោង​នេះ​ថា៖ «បើកុំតែឡានខនម៉ោងនេះ ម្លេះខ្ញុំមកមិនទាន់ឡានទេ ព្រោះណាមួយផ្លូវស្ទះខុសពីការគិតទុក។ ម៉ោងពីរ​ដប់​នាទីហើយ ខ្ញុំមិនទាន់មកដល់ចំណតរថយន្តនៅឡើយ។ បើឡាននេះ ចេញតាមការកំណត់ខ្ញុំច្បាស់​ជាខកជើង​ហើយ។»

យ៉ាងណាក៏ដោយ ក៏ភាពយឺតយ៉ាវនេះ ត្រូវបានអ្នករួមដំណើរភាគច្រើន សម្ដែងការមិនពេញចិត្ត។បុរសម្នាក់ដែល​កំពុងរង់ចាំក្នុងកៅអីជាស្រេចនោះ គាត់បានលើកឡើងថា «ពេលវេលាត្រូវតែជាក់លាក់ បើគ្មានករណីចាំបាច់​ណា​មួយ​មករំខានទេនោះ»។

ករណីច្រឡំឡាន

ក្នុងការចេញដំណើរនៃភ្ញៀវទាំងនោះ មានចំនួនច្រើន ក្រុមហ៊ុនបានតម្រូវឡានពីរគ្រឿង សម្រាប់ចេញដំណើរ​ក្នុង​ម៉ោង​ដំណាលគ្នា ទៅកាន់ខេត្តដូចគ្នា។ ករណីនេះបានធ្វើឲ្យភ្ញៀវមួយចំនួនមានការភ័ន្ឌច្រឡំឡានជើងទីមួយ និង​ជើងទីពីរ។ ព្រោះថាអ្នកខ្លះត្រូវឡើងជើងទីមួយ តែគាត់ត្រូវមកឡើងក្នុងជើងទីពីរទៅវិញ ដែលធ្វើឲ្យលេខកៅអីមួយ មានមនុស្សដល់ទៅពីរនាក់។ អុំប្រុសម្នាក់ ដែលត្រូវជិះក្នុងឡានជើងទីមួយ បានឡើងអង្គុយក្នុងឡាន​ជើង​ទីពីរ ដល់​ពេលម្ចាស់កៅអីឡានជើងទីពីរឡើងមករកកៅអី ស្រាប់តែមានអ្នកអង្គុយស្រេចទៅហើយ។ បន្ទាប់មក ក៏មានការរអ៊ូ​ឡើង នៃអ្នកដំណើរថា «កៅអីមួយលក់ដល់ទៅពីរដង»។ ដំណាលគ្នានោះ អ្នករៀបចំកៅអីអង្គុយភ្ញៀវបានមក ពិនិត្យ​សំបុត្រ ឃើញថា អ៊ុំប្រុសដែលមកអង្គុយមុននោះ ត្រូវជិះឡានជើងទីមួយ មិនមែនឡានជើងទីពីរទេ ឯឡានជើងទី​មួយ​ បានចេញដំណើរទៅបាត់ហើយ។

តែម្ចាស់កៅអីពិតប្រាកដ បានសប្បាយចិត្តបន្តិចមកវិញ ដោយសារតែគាត់ត្រូវបានអ្នកមានភារកិច្ចរៀបចំកៅអី រក​យុត្តិធម៌ប្រគល់កៅអីនោះមកឲ្យគាត់។

អុំប្រុសនោះបានតវ៉ាថា «ខ្ញុំមកតាំងពីយូរហើយ ប្រហែលឡានដែលខ្ញុំត្រូវជិះនោះ មិនទានចេញផង។ ខ្ញុំបានយក​សំបុត្រនេះសួរគេ គេចង្អុលថាឲ្យមកឡាននេះ។ ឥឡូវបែរជាខុសដដែល។ ធ្វើការងារអីអញ្ចឹង?» រំពេចនោះ អ្នក​រៀបចំ​កៅអី​យើង ​ក៏បានស្រដីបែបយកចិត្តថា «អ៊ុំកុំព្រួយអី អុំអាចជិះឡាននេះបាន ចាំខ្ញុំរៀបចំឲ្យ។ បើសល់​កៅអី ​អុំ​អាច​អង្គុយបាន តែ​បើ​គ្នានទេ ចាំខ្ញុំរៀបកៅអីជ័រជូនជាជំនួស។»

ក្នុងករណីនេះ អ្នកមីងដែលជាអ្នកដំណើរម្នាក់ ឧស្សាហ៍ជិះឡាននេះញឹកញាប់ មានលើកឡើងថា អ្នកមីងបាន​ជួប​ប្រទះច្រើនណាស់ ចំពោះករណីកៅអីមួយសំបុត្រពីរនេះ។ អ្នកមីងបានទំលាក់កំហុសនេះ ទៅលើអ្នកលក់​សំបុត្រថា​ ជាការខ្ជីខ្ជានៃអ្នកលក់សំបុត្រនោះឯង។ លក់ច្រើនកន្លែង តែមិនបានផ្តល់ដំណឹង ឬព័ត៌មានឲ្យបានច្បាស់​លាស់​ទៅ​វិញ។ ពេលខ្លះលក់កៅអីនេះដាច់ហើយ តែអ្នកលក់នោះ តែជាភ្លេចផ្តល់ព័ត៌មាននេះ ទៅកាន់អ្នកលក់ដទៃទៀត។

សំបុត្រឡើងថ្លៃ

អ្នកដំណើរភាគច្រើន តែងតែរអ៊ូជារៀងរាល់ឆ្នាំថា ឲ្យតែដល់រដូវពេលបុណ្យទានម្តងៗ សំបុត្រឡានត្រូវតែឡើងថ្លៃ​តែម្តង មិនដឹងមូលហេតុអ្វី? ដែលធ្វើឲ្យពួកគាត់ឆ្លងពីខេត្តមួយ ទៅកាន់ខេត្តមួយទៀត ឆ្លងកាត់ទីក្រុងភ្នំពេញ ត្រូវ​ចំណាយប្រាក់យ៉ាងច្រើន រហូតដល់ជាង១០ម៉ឺនរៀលក្នុងម្នាក់ៗ គ្រាន់តែចំណាយលើថ្លៃសំបុត្រនេះ។

ចំពោះការឡើងថ្លៃនៃសំបុត្រនេះ ក៏មិនមានការបញ្ជាក់ច្បាស់លាស់ នូវមូលហេតុណាមួយពីក្រុមហ៊ុនដែរ។ តែអ្នក​លក់សំបុត្រ ហាក់មិនមានភាពច្បាស់លាស់ បានបញ្ជាក់ថា ព្រោះតែក្នុងពេលរដូវបុណ្យទានមានមនុស្សមកជិះច្រើន ហើយឡានមានតិចមិនគ្រប់នឹងទទួលអ្នកដំណើរទាំងនោះ។ «ខ្ញុំមិនដឹងថាហេតុអ្វីឡើងថ្លៃទេ ថៅកែជាអ្នក​កំណត់​តំលៃ ខ្ញុំបានត្រឹមតែជាអ្នកត្រូវលក់តាមប៉ុណ្ណោះ។»

លោក ហ៊ុន សែន នាយករដ្ឋមន្ត្រីកាន់អំណាចក្នុងពេលបច្ចុប្បន្ន ធ្លាប់បានថ្លែងអំពាវនាវកុំឲ្យមានការតម្លើងថ្លៃ កាល​ពីពេលថ្មីៗនេះ។ តែការអំពាវនាវនោះ ប្រៀប​បាននឹងការស្រែកទៅរកខ្យល់យ៉ាងដូច្នេះ។

ចំណាយពេលមួយម៉ោង ដើម្បីចំងាយផ្លូវ៦គីឡូម៉ែត្រ...

រថយន្តបានចេញដំណើរ ពីចំណតរបស់ខ្លួន តាមដងផ្លូវនានា ឆ្ពោះទៅកាន់ផ្លូវជាតិលេខ៦អា ក្នុងទិសដៅ​ទៅខេត្ត​-ក្រុងកំពង់ចាម និងបន្តទៅក្រុងសួង។ ការចេញដំណើរពីទីក្រុងភ្នំពេញនេះ ក៏មិនបានរហ័សទាន់ចិត្តទេ ព្រោះ​តែ​មានអ្នកដំណើរច្រើន បានប្រើប្រាស់នូវយានយន្តខ្លូនរៀងៗ ដែលជាហេតុធ្វើឲ្យមានការកក ណែនណាន់តាន់តាប់ តាមដងផ្លូវចេញរាជធានីភ្នំពេញ។ ម្យ៉ាងផ្លូវតូច ឡានមូតូច្រើន ឈប់គ្មានសណ្តាប់ធ្នាប់ គ្មានអ្នកធ្វើចរាចរណ៍។ ចាប់​ពីចំណតផ្សារអូឬស្សី មកដល់ផ្លូវគីឡូលេខ៦ (ផ្លូវជាតិលេខ៥) ត្រូវបានចំណាយពេលជាងមួយម៉ោង ក្នុងចំងាយផ្លូវ​ត្រឹមតែ៦គីឡូម៉ែត្រប៉ុណ្ណោះ៕

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី១២ មេសា ២០១៤