តុលាការកម្ពុជាដោះលែងជនជាតិប៊ែលហ្សិក ក្នុងសំនុំរឿងឃាតកម្មស្ត្រីទេសចរណ៍បារាំង
តុលាការកម្ពុជា បានដោះលែងជនសង្ស័យជនជាតិប៊ែលហ្សិក កាលពីថ្ងៃព្រហស្បត្តិ៍ ទី ១០ ខែមេសា បន្ទាប់ពីជនបរទេសរូបនេះ ត្រូវបានឃាត់ខ្លួនដោយនគរបាលកម្ពុជា កាលពីពាក់កណ្ដាលខែមេសាឆ្នាំទៅម៉ិញមុន ពីបទរំលោភសម្លាប់ស្ត្រីទេសចរណ៍ជនជាតិបារាំង វ័យក្មេងម្នាក់។ ជាការដោះលែងបណ្ដោះអាសន្នមួយ រហូតដល់ការស៊ើបអង្កេត ត្រូវបានបិទបញ្ចប់។
ពន្ធនាគាររបស់ខេត្តកំពត។ (រូបថតឯកសារ)
ឃាតកម្ម - លោក អូលីវីយ៉េ វានដេន បូហ្គាយ៉េរ (Olivier Van Den Bogaert) ជនសង្ស័យក្នុងសំនុំរឿង «រំលោភរួចសម្លាប់» ដែលប្រព័ន្ធយុត្តិធម៌របស់ប្រទេសកម្ពុជា បានចាប់ឃុំខ្លួនតាំងពីមួយឆ្នាំមកហើយ ត្រូវបានដោះលែងឲ្យនៅក្រៅឃុំជាបណ្ដោះអាសន្ន កាលពីថ្ងៃព្រហស្បត្តិ៍ ទី ១០ ខែមេសាកន្លងមកនេះ។ ការសែត Gazet van Antwerpen របស់ប្រទេសប៊ែលហ្សិក បានរាយការណ៍ពីករណីដោះលែងនេះ កាលពីថ្ងៃសោរ៍ថា៖ «លោក អូលីវីយ៉េ អាចចាកចេញពីប្រទេសកម្ពុជា លុះត្រាណាតែការស៊ើបអង្កេត ត្រូវបានបិទបញ្ចប់ទាំងស្រុង»។ តែអ្នកដែលស្និតនឹងសំនុំរឿង មិនបានឲ្យដឹងថា តើរយៈពេលនៃការស៊ើបអង្កេត នឹងត្រូវប្រើរយៈពេលប៉ុន្មាននោះទេ។
ជនជាតិប៊ែលហ្សិកអាយុ៤០ឆ្នាំរូបនេះ បានចូលទៅរស់នៅរកទទួលទាន នៅក្នុងប្រទេសកម្ពុជាតាំងពី៤ឆ្នាំមុន ហើយត្រូវបានអាជ្ញាធរខ្មែរចាប់ឃាត់ខ្លួន នៅថ្ងៃទី២៣ខែមេសា ឆ្នាំ២០១៣ ក្នុងតំបន់តែមួយនឹងទីកន្លែង ដែលគេបានរកឃើញ សាកសពរបស់ស្ត្រីទេសចរណ៍បារាំងវ័យ២៥ឆ្នាំមួយរូប អណ្ដែតក្នុងស្ទឹងកំពត។ សាក្សីមួយចំនួន បានមើលឃើញ ជនសង្ស័យដែលជាម្ចាស់សណ្ឋាគារមួយនៅក្នុងខេត្តកំពតនេះ បានបោះចោលកង់មួយ នៅថ្ងៃដែលស្ត្រីទេសចរណ៍បារាំងបានបាត់ខ្លួន។ អាជ្ញាធរសង្ស័យថា កង់នោះ ជារបស់ស្ត្រីទេសចរណ៍ជនជាតិបារាំង បានជិះចេញពីផ្ទះសំណាក់ជាលើកចុងក្រោយបង្អស់ មុននឹងនាងត្រូវបានឃើញស្លាប់ក្នុងមួយថ្ងៃក្រោយមក។
ជនរងគ្រោះនាង អូហ្វេលី ប៊ើនីស (Ophélie Begnis) ដែលធ្លាប់រស់នៅក្នុងទីក្រុងលីយ៉ុង ផ្នែកខាងត្បូងនៃប្រទេសបារាំង បានធ្វើដំណើរជាមួយមិត្តភ័ក្ររបស់នាង ទៅលំហែវិស្សមកាល ក្នុងប្រទេសកម្ពុជា និងក្នុងគោលបំណងចង់ស្វែងយល់ពីសិល្បៈវប្បធម៌របស់ប្រទេសនេះផង។ សាកសពរបស់អូហ្វេលី ត្រូវបានរកឃើញគ្មានសម្លៀកបំពាក់ អណ្ដែតលើផ្ទៃទឹក ក្នុងស្ទឹងកំពត។ នៅលើក្បាល និងនៅលើដៃទាំងសងខាង គេពិនិត្យឃើញមានស្លាកស្នាមរបួស ដែលទំនងជាប៉ះនឹងអាវុធមុតស្រួចអ្វីម្យ៉ាង។ នៅមុនពេលរកឃើញសាកសពនាងមួយថ្ងៃ គេឃើញនាងជាចុងក្រោយបង្អស់ ថាបានជិះកង់ចេញពីផ្ទះសំណាក់ កន្លែងដែលនាងបានស្នាក់នៅក្នុងទីក្រុងកំពត ផ្នែកនារតីនៃប្រទេសកម្ពុជា។
នៅថ្ងៃសុក្រទី៣ ខែឧសភា ឆ្នាំ២០១៣ បន្ទាប់ពីបានចាប់ខ្លួនរួចមក ជនសង្ស័យលោក អូលីវីយ៉េ វានដេន បូហ្គាយ៉េរ ត្រូវបានតុលាការសាលាដំបូងខេត្តកំពត ធ្វើការចោទប្រកាន់លោក ពីបទ«មនុស្សឃាត» ដោយមានរួមទាំង បទ«រំលោភ» និងធ្វើ«ទារុណកម្ម»នោះផង។ គេនៅមិនទាន់ដឹង ពីមូលហេតុបែបណា ដែលឈានទៅដល់ ការប្រព្រឹត្តិឧក្រិដ្ឋកម្មទាំងអស់នេះនៅឡើយ តែរហូតមកដល់ពេលនេះ លោក អូលីវីយ៉េ នៅតែអះអាងពីភាពគ្មានទោសពៃរបស់លោក ហើយថា លោកមិនមានជាប់ទាក់ទងអ្វីនឹងសំនុំរឿនេះទេ។
នាងអូហ្វេលី ជានាដការិនីមួយរូប កាលពីនាងនៅរស់។ (photo d.r)
«មុខមាត់ប្រទេសកម្ពុជា...»
គេហទំព័រនៃសារព័ត៌មានកោះសន្តិភាព ដែលមាននិន្នាការផ្អៀងទៅរករដ្ឋាភិបាលកម្ពុជា ធ្លាប់បានសរសេរនៅពេលចាប់ខ្លួនជនជាតិប៊ែលហ្សិកថា «ការចាប់ខ្លួនជនសង្ស័យជាជនបរទេសនេះ បានផ្តល់សញ្ញាល្អមួយសម្រាប់ប្រទេសកម្ពុជា» ហើយកាសែតបានបន្ត ជាមួយនឹងឃា្លនេះថា «សមត្ថកិច្ចកម្ពុជាមិនបណ្តោយ ឱ្យជនដែលបំផ្លាញមុខមាត់កម្ពុជា ដោយអំពើឧក្រិដ្ឋបែបនេះ រួចពីសំណាញ់ច្បាប់នោះឡើយ»។ ការលើកអះអាង ពី«មុខមាត់ប្រទេសកម្ពុជា»នេះ បានបង្កឲ្យមានមន្ទិលកាន់តែខ្លាំង ទាក់ទងនឹងសមត្ថភាពរបស់អាជ្ញាធរខ្មែរ ក្នុងការបំបែកសំនុំរឿងឧក្រិដ្ឋកម្មធំៗជាច្រើន ព្រោះរហូតមកដល់ថ្ងៃនេះ ជនរងគ្រោះពីក្នុងសំនុំរឿងទាំងនោះ នៅមិនទាន់អាចរកពន្លឺយុត្តិធម៌ឃើញនៅឡើយ៕
-----------------------------------------------
ដោយ កេសរកូល (ទំនាក់ទំនង៖ [email protected]) - ភ្នំពេញ ថ្ងៃទី១២ មេសា ២០១៤