តបទៅនឹងការចោទប្រកាន់ របស់ប្រធានសហជីពស៊ីខាវឌូ លោក អាត់ ធន់ ទៅលើលោក អ៊ុំ វិសាល និងអ្នកស្រី រឿន ចាន់ថន អតីតស្ថាបនិកពីររូប ដែលត្រូវបានប្រធានសហជីពបញ្ឈប់ពីការងារនោះ លោក អ៊ុំ វិសាល បានសម្ដែង​ប្រតិកម្មនៅថ្ងៃនេះថា លោកបានធ្វើទៅតាមកាតព្វកិច្ចរបស់លោក ក្នុងនាមជាមន្ត្រីសហជីពមួយរូប ហើយលោក​បាន​ចង្អុលត្រឡប់​ទៅលោក អាត់ ធន់ វិញថា គឺជាអ្នកចង់បំបែកផ្ទៃក្នុងរបស់ស៊ីខាវឌូ។

រូបកណ្ដាល៖ លោក អ៊ុំ វិសាល អតីតស្ថាបនិក មន្រ្តីគោល​នយោបាយ និងច្បាប់របស់សហជីពស៊ីខាវឌូ។ (រូបថត MONOROOM.info/ C.Nita)

វិវាទស៊ីខាវឌូ - «ស៊ីខាវឌូ មិនមែនជារបស់លោក អាត់ ធន់ ទេ ហើយលោក អាត់ ធន់ ទេដែលចង់បំបែកផ្ទៃក្នុង របស់ស៊ីខាវឌូហ្នឹង» នេះជាការលើកឡើងរបស់លោក អ៊ុំ វិសាល អតីតមន្រ្តីផ្នែកគោលនយោបាយ និងច្បាប់ របស់​សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ហៅកាត់ថា ស៊ីខាវឌូ ឆ្លើយតបទៅនឹងការលើកឡើង​របស់​លោក អាត់ ធន់ ដែលបានចោទប្រកាន់លោកអ៊ុំ វិសាល និងអ្នកស្រី រឿន ចាន់ថន ថាមានបំណងចង់បង្ខូចកេរ្តិ៍ឈ្មោះ និងចង់បំបែកបំបាក់សហជីពជាពីរជាបី ។

ប្រតិកម្មរបស់លោក អ៊ុំ វិសាល បានធ្វើឡើងបន្ទាប់ពី លោក អាត់ ធន់ ប្រធានសហជីពស៊ីខាវឌូ កាលពីថ្ងៃទី០២ ខែ​មេសា កន្លងមកនេះ បានបញ្ជាក់ថា លោកនឹងរៀបចំពាក្យបណ្តឹងប្តឹងលោក អ៊ុំ វិសាល និងអ្នកស្រី រឿន ចាន់ថន ពីបទដើរបរហាកេរ្តិ៍គ្មានមូលដ្ឋាន បង្កាច់បង្ខូចកេរ្តិ៍ឈ្មោះ និងចង់ឲ្យ ស៊ីខាវឌូ មានឱនភាព។ ពាក្យបណ្ដឹងរបស់កម្មករ​រោងចក្រអ៊ីហ្គាមេន  ដែលបានប្តឹងប្រធាន និងថ្នាក់ដឹកនាំសហជីពពីររូប ពីបទកេងបំបាត់លុយកម្មករ​ជាង៩ម៉ឺន​ដុល្លា​នោះ ត្រូវបានលោក អាត់ ធន់ ថ្លែងនៅពេលចេញពីសាលារាជធានីមកវិញ ថាជាទង្វើញុះញង់របស់ លោក អ៊ុំ វិសាល និងអ្នកស្រី រឿន ចាន់ថន។

តបនឹងការលើកឡើងរបស់លោក អាត់ ធន់ ខាងលើនេះ លោក អ៊ុំ វិសាល បានអោយទស្សនាវដ្ដី​មនោរម្យ.អាំងហ្វូ​ ដឹងថា ការប្តឹងរបស់លោក អាត់ ធន់ ជាសិទ្ធរបស់គាត់។  រីឯការប្តឹងរបស់កម្មករ ចំពោះថ្នាក់ដឹកនាំ​សហជីព​ទាំងបី ជា​សិទ្ធិរបស់កម្មករ ហើយរូបលោកគ្រាន់តែជាជំនួយផ្នែកច្បាប់ ផ្នែកបច្ចេកទេសទៅដល់កម្មករ ព្រោះ​វាជា​កាតព្វកិច្ច​របស់លោក ជាសហជីពត្រូវតែជួយ តាមការពឹងពាក់របស់កម្មករ។

អតីតស្ថាបនិកស៊ីខាវឌូរូបនេះ បានអះអាងបន្ថែមថា៖ «ប្រសិនបើកម្មករគាត់មិនប្តឹង ក៏ខ្ញុំប្តឹងដែរ ពីព្រោះថាជា​កាតព្វកិច្ចរបស់ខ្ញុំក្នុងនាមជាសហជីព ជាគណកម្មការ ជាស្ថាបនិក ខ្ញុំត្រូវតែចាត់វិធានការ ប្រសិនបើខ្ញុំរកឃើញថា​បុគ្គលណាមួយ នៅក្នុងស្ថាប័នរំលោភលក្ខន្តិកៈ កិបកេងប្រព្រឹត្តិអំពើពុករលួយ អញ្ចឹងមិនមែនចាំបាច់តែកម្មករទេ»។

ពាក់ព័ន្ធនឹងការរៀបចំពាក្យបណ្តឹង ប្តឹងអតីតស្ថាបនិកទាំងពីរ របស់លោក អាត់ ធន់ ប្រធានសហជីពរូបនេះ​បញ្ជាក់​ថា មិនទាន់កំណត់ច្បាស់ទេ ដោយសារក្នុងសហជីពស៊ីខាវឌូ មិនចង់មានជម្លោះជាមួយកម្មករគ្នាឯង ឬកម្មករដទៃ​ទៀត​ទេ។ ប៉ុន្តែលោកបាននិយាយទៀតថា ក្នុងករណីអ្នកទាំងពីរនៅតែបង្ក ដើម្បីបំបែកបំបាក់ចលនាសហជីព លោក​នឹងប្តឹងទៅតុលាការដើម្បីអោយអ្នកទាំងពីរហ្នឹង សងនូវអ្វីដែលជាផលប៉ះពាល់ដល់ស៊ីខាវឌូ។

ចំណែកការទាមទាររបស់កម្មករ ដែលចង់អោយ លោក អ៊ុំ វិសាល និងអ្នកស្រី រឿន ចាន់ថន ចូលធ្វើការ​នៅក្នុង​សហជីព​ស៊ីខាវឌូដដែលនោះ លោក អាត់ ធន់ បានអោយដឹងថា «យើងក៏បានប្រជុំជាមួយគណកម្មការស៊ីខាវឌូ​ហើយ គឺ៩៩.៩ភាគរយ គឺគេបញ្ឈប់អ្នកទាំងពីរហ្នឹងជាស្ថាពរ ហើយក៏មិនឲ្យមានការពាក់ព័ន្ធទៀតដែរ»៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី ០៣ មេសា ២០១៤