ដើរកំសាន្ដក្នុងតំបន់រាជធានីអង្គរបូរាណ ដ៏ល្បីរបស់ខ្មែរ នឹងអាចធ្វើបានពីផ្ទះឬការិយាល័យរបស់អ្នក នៅគ្រប់ទី​កន្លែងទាំងអស់ នៅក្នុងពិភពលោក។ ក្រុមហ៊ុនយក្សរបស់អាមេរិក ហ្គូហ្គ័ល (Google) ទើបនឹងបញ្ចប់គម្រោង «សម្បត្តិវប្បធម៌របស់ពិភពលោក» នៅក្នុងប្រទេសកម្ពុជា ហើយបានបញ្ជូនរូបថតវិលជុំ ៣៦០ឌឺក្រេ ជា​ច្រើន​ដាក់ ទៅក្នុងគេហរទំព័រផែនទីរបស់ខ្លួន។

រូបភាពផ្ដិតចេញពីគេហទំព័រផែនទីរបស់ហ្គូហ្គ័ល ដែលថតពីប្រាសាទតាព្រហ្មក្នុងតំបន់អង្គរ។

ទស្សនាតំបន់អង្គរ - បង្ហាញគម្រោងនេះ នៅក្នុងមហាប្រាសាទអង្គរវត្តរបស់ខ្មែរ កាលពីសប្ដាហ៍កន្លងមកនេះ គម្រោងចុងក្រោយរបស់ហ្គូហ្គ័ល ដែលមានឈ្មោះថា «សម្បត្តិវប្បធម៌របស់ពិភពលោក» បានអនុញ្ញាតឲ្យអ្នក​ប្រើប្រាស់បណ្ដាញអាំងធើណែត នៅគ្រប់ទិសទីក្នុងពិភពលោក អាចទស្សនាតាមរយៈកំព្យូទ័របានយ៉ាងរីករាយ នូវមហាប្រាសាទនានា និងតំបន់រាជធានីបូរាណដ៏ល្បីរបស់ចក្រភពខ្មែរ ក្នុងសតវត្សន៍ទី១២។

រូបថតច្រើនជាង១លានរូប ត្រូវបានថត និងយកមកផ្គុំគ្នាដើម្បីបង្កើតជារូបភាពវិលជុំ ៣៥០ឌឺក្រេ ចំនួន ៩០ ពាន់រូប បង្ហាញពីទិដ្ឋភាពទាំងមូលនៃតំបន់នីមួយៗ របស់អតីតរាជធានីបូរាណ ស្ថិតនៅផ្នែកខាងជើងនៃព្រះរាជាណាចក្រ។

គម្រោងនេះ នឹងធ្វើឲ្យក្រុមហ៊ុន«មហាយក្ស»ខាងបច្ចេកវិទ្យា របស់អាមេរិកមួយនេះ ក្លាយជា«មហាយក្ស»​ខាង​បេតិកភ័ណ្ឌពិភពលោកនោះថែមទៀត ដោយសារតែហ្គូហ្គ័លបានចូលទៅធ្វើជាដៃគូរ ជាមួយនឹងសារមន្ទីរវត្ថុសិល្បៈ​ជាច្រើន ហើយក៏បានធ្វើការថតបញ្ចូល នូវទីតាំងនៃសម្បត្តិវប្បធម៌ ឬសម្បត្តិធម្មជាតិនានា របស់ប្រទេសផ្សេងៗ ក្នុង​ពិភពលោក ដាក់​ក្នុងគេហទំព័ររបស់ខ្លួនដែរ។

លោក ម៉ានីក ហ្គូបតា (Manik Gupta) នាយកគម្រោងសម្រាប់គេហទំព័រផែនទី របស់ហ្គូហ្គ័ល បាននិយាយថា «មុន​នេះ យើងបានធ្វើពីប្រាសាទ តាម៉ាហាល (Taj Mahal - ឥណ្ឌា) ជ្រលង ខេនយ៉ុង (Canyon - អាមេរិក) ភ្នំហ្វូជី (Fuji - ជប៉ុន)»។

«ប៉ុន្តែទំហំការងារ ដែលយើងបានធ្វើនៅអង្គរវត្ត (តំបន់) មិនដូចការងារលើកមុនៗនោះទេ» លោក ម៉ានីក ហ្គូបតា បានបញ្ជាក់ពី«ការរំជួលចិត្តដែលមិនគួរឲ្យជឿបាន» នៅពេលដែលក្រុមការងាររបស់លោក បានធ្វើដំណើរទៅ​គ្រប់​ទីកន្លែងនៃតំបន់អង្គរ។

អ្នកបច្ចេកទេសរបស់ហ្គូហ្គ័លរូបនេះ បាននិយាយទៀតថា ដើម្បីចាប់រូបភាពទាំងនេះ អ្នកដើរថត ត្រូវមានម៉ាស៊ីន​ថត​ចំនួន១៥ ចងផ្អោបទៅនឹងសម្ពាយស្ពាយនៅនឹងខ្នង ដែលមានអង្គស្ដុកជាច្រើន និងថ្មសាកមួយ។ ម៉ាស៊ីថតនីមួយៗ ថតយករូបភាពដែលមានភាពច្បាស់ខ្លាំង (HD) ជារៀងរាល់ពីរវិនាទីកន្លះម្ដង។ អ្នកដើរថតទាំងនេះ មានលក្ខណៈ​ពិសេសជាងរថយន្ដថត ដែលហ្គូហ្គ័លប្រើពីពេលមុន ដោយសារតែគេអាចដើរចូលទៅគ្រប់ទីកន្លែងទាំងអស់ ជា​ពិសេសកន្លែងដែលរថយន្ដបើកចូលទៅមិនបាន។

ជនជាតិកម្ពុជាចំនួន៥នាក់ ត្រូវបានទទួលបន្ទុកឲ្យស្ពាយម៉ាស៊ីនថត ដើរ៨ម៉ោងក្នុងមួយថ្ងៃ នៅគ្រប់ប្រាសាទ​ទាំង​អស់ ដើម្បីថតផ្ដិតយកទិដ្ឋភាពយ៉ាងលំអិតពីគ្រប់កន្លុកកន្លៀត។

លោក អាមីដ ស៊ូដ (Amit Sood) ប្រធាននាយកដ្ឋានវប្បធម៌របស់ហ្គូហ្គ័ល បាននិយាយថា «បើមានប្រទេសណាមួយ ដែលសម្បូរដោយសម្បត្តិវប្បធម៌ដ៏ពិសេសនោះ ប្រទេសនោះគឺកម្ពុជា» ដោយលោកមិនបានបំភ្លេច នឹងលើកមក​បញ្ជាក់ទេថា វត្ថុសិល្បៈជាច្រើន ត្រូវបានបំផ្លិចបំផ្លាញ នាសម័យកាលសង្គ្រាមរាំងជល់ នៅក្នុងទស្សវត្តន៍ឆ្នាំ៧០។

ឆ្លើយតបនឹងការព្រួយបារម្ភដែលនិយាយថា ការដាក់រូបភាពទាំងនេះនៅលើគេហទំព័រ នឹងធ្វើឲ្យទេសចរណ៍​លែង​ធ្វើ​ដំណើរមកមើលផ្ទាល់នោះ លោក អាមីដ ស៊ូដ  បានបកស្រាយថា «គ្រប់សារៈមន្ទីរ ដែលយើងបានថតរូប មកដាក់​ក្នុងគេហទំព័ររបស់យើង បានទទួលភ្ញៀវចូលទៅទស្សនាច្រើនជាងមុន»។ លោកនិយាយទៀតថា «ការងារ​របស់​យើង មិនឃើញមានផលវិបាក កើតមានមកវិញទេ»។

អ្នកនិពន្ធសៀវភៅខាងដំណើរកំសាន្ដ លោក ថូម ស្ទៀរ៉ុក (Tom Sturrock) បានពន្យល់ថា «ខ្ញុំមិនគិតថា បានមើល​រូបភាពនៅលើអាំងធើណែត ឬមើលរូបភាពវិលជុំ ៣៦០ឌឺក្រេ របស់ហ្គូហ្គ័ល អាចជំនួសអ្វីដែលជា​ភាពជាក់ស្ដែង​នោះ​ទេ។ អ្វីដែលអាចធ្វើបាន នៅលើអាំងធើណែត មិនអាចជំនួសនូវអ្វីដែលជាធម្មជាតិពិតៗនោះឡើយ។ ឧទាហរណ៍ ពេលព្រះអាទិត្យរៀបលិច នៅអង្គរវត្ត អ្នកនឹងឃើញរូបភាពដ៏ស្រស់បំព្រងដោយផ្ទាល់ភ្នែក ខុសពីរូបដែលយើង​ថត៕»