មានវត្តមាននៅក្បែរស្ពាននាគ  លោក ម៉ម សូណង់ដូ បានថ្លែងថា លោកមិនខ្លាចចំពោះការវាយតប់ មកលើរូប​លោក​ឡើយ។ ការថ្លែងរបស់លោក បានធ្វើឡើងក្នុងខណៈពេល ដែលប្រជាពលរដ្ឋជាច្រើនសិបនាក់ បានធ្វើបាតុកម្ម​ទាម​ទារហ្រ្វេកង់ទូរសទស្សន៍ និងបង្កើតកម្លាំងផ្សាយនៅតាមខេត្តឆ្ងាយៗ នៅទីលានប្រជាធិបតេយ្យនាថ្ងៃទី៣១ ខែមីនា នេះ។

លោក ម៉ម សូណង់ដូ នៅស្ពាននាគ ថ្ងៃទី៣១ ខែមីនា ឆ្នាំ២០១៤។ (រូបថត MONOROOM.info/ C. Nita)

បាតុកម្ម - ទោះបីមានការហាមឃាត់ ពីសាលារាជធានីភ្នំពេញយ៉ាងណាក៏ដោយ ក៏ក្រុមអ្នកគាំទ្រ នៅតែបានប្រមូល​គ្នាមកជុំដើម្បីធ្វើការទាមទារ ឲ្យមាន​ការបន្ថែម​កម្លាំងផ្សាយវិទ្យុនៅតាមខេត្ត និងការទាមទារហ្រ្វេកង់ទូរសទស្សន៍ ជាដើម។

នៅព្រឹកថ្ងៃទី៣១ ខែមីនានេះ គេសង្កេតឃើញមានការដាក់ពង្រាយ នូវកងកម្លាំងប្រដាប់អាវុធចម្រុះ និងសន្តិសុខ​សាលាខណ្ឌដូនពេញ សឹងពាសពេញនៅលើទីតាំងនៃទីលានប្រជាធិបតេយ្យ រហូតដល់ស្ពានក្បាលនាគ។ បន្ទាប់​ពីប្រជាពលរដ្ឋចាប់ផ្ដើមប្រមូលគ្នាបន្តិចម្ដងៗ ភាពតានតឹងបានកើតមានឡើង រហូតមានការវាយដំ​មកលើ​ពលរដ្ឋ​ បណ្ដាលឲ្យមានរបួស និងខូចខាតសម្ភារៈបន្តិចបន្តួច។

តាមសេចក្តីរាយការណ៍ពីអ្នករាយការណ៍របស់ទស្សនាវដ្តីមនោរម្យ.អាំងហ្វូ បានបញ្ជាក់ឲ្យដឹងថា ​ក្នុងពេល​សម្តែង​មតិ​ទាមទារនេះ ប្រជាពលរដ្ឋយ៉ាងហោចណាស់ពីរនាក់ ក្នុងចំណោមប្រជាពលរដ្ឋ ដែលបានចូលរួម​មិនតិចជាង​១០០​នាក់នោះ បានរងរបួសបែកក្បាល ខណៈពេលដែលក្រុមសន្តិសុខខណ្ឌដូនពេញជាច្រើននាក់ បំបែកពួក​គេ​មិនឲ្យ​ប្រមូល​ផ្តុំគ្នា នៅក្បែរស្ពាននាគ ជិតទីលានប្រជាធិបតេយ្យ។ ពេលនេះ អ្នករបួសទាំងពីរនាក់ត្រូវបានដឹក ទៅ​សុំឲ្យអង្គការលីកាដូ ជួយ​ព្យាបាល។

សូមរម្លឹកថាកាលពីថ្ងៃទី២៧ ខែមករា ឆ្នាំ២០១៤កន្លងមកថ្មីៗនេះ ប្រធានវិទ្យុសំបុកឃ្មុំ និងអ្នកគាំទ្រជាងពីររយនាក់​បានធ្វើបាតុកម្មម្តងរួចមកហើយ ដើម្បីទាមទារហ្វ្រេកង់ទូរទស្សន៍ និងដំឡើងកម្លាំងផ្សាយវិទ្យុសំបុកឃ្មុំ បន្តទៅតាម​ខេត្ត​ នៅខាងមុខក្រសួងព័ត៌មាន។ បាតុកម្មនៅពេលនោះ ត្រូវបានក្រុមអាជ្ញាធររាជធានីភ្នំពេញ ប្រើប្រាស់​គ្រាប់​បែក​ផ្សែង បាញ់ទៅលើក្រុមប្រជាពលរដ្ឋ ដើម្បីបំបែកការតវ៉ា បង្កឲ្យមានប្រជាពលរដ្ឋជាច្រើននាក់រងរបួសធ្ងន់ និង​ស្រាល។ ដោយឡែកលោក ម៉ម សូណង់ដូ នៅពេលនោះ ត្រូវបានគេគ្រាហ៍គេចចេញពីការបង្ក្រាបនោះ បើទោះជា​លោក​ប្រាប់គេ កុំឲ្យយកលោកចេញពីកន្លែងនោះក៏ដោយ៕

--------------------------------------------------
ដោយ អ៊ុម វ៉ារី  និង ក. នីតា (ទំនាក់ទំនង៖ [email protected]) - ភ្នំពេញថ្ងៃទី៣១ មីនា ២០១៤