អ្នកវិភាគនយោបាយឯករាជ្យកម្ពុជា បានលើកឡើងថា ក្នុងកាលៈទេសៈ បច្ចុប្បន្ននេះ វាជាពេលវេលាចាំបាច់​ហើយ​ដែលត្រូវ ថ្នាក់ដឹកនាំកំពូលនៃគណបក្សប្រជាជនកម្ពុជា និងគណបក្សសង្រ្គោះជាតិ គម្បីជួបគ្នាដោយផ្ទាល់ ដើម្បី​សម្រេចលើចំណុចគន្លឹះ នៃភាពជាប់គាំងផ្នែកនយោបាយ។

លោក សម រង្ស៊ី (ខាងឆ្វេង) និងលោក ហ៊ុន សែន ចាប់ដៃគ្នានៅមន្ទីរដ្ឋសភាជាតិ ថ្ងៃទី១៧ខែកញ្ញាឆ្នាំ២០១៣។ (រូបថត MONOROOM.info/ O. Vary)

នយោបាយកម្ពុជា - អ្នកស្រាវជ្រាវបញ្ហាសង្គម និងជាអ្នកវិភាគនយោបាយឯករាជ្យកម្ពុជា លោក កែម ឡី នៅថ្ងៃទី​២៦ មីនា នេះបានពន្យល់ថា មុននឹងដោះស្រាយបញ្ហានយោបាយ គេត្រូវរកឲ្យឃើញដល់ឬសគល់​ដែលនាំឲ្យមាន​វិបត្តិនយោបាយ នោះគឺបញ្ហាស្ថាប័នបោះឆ្នោត ដែលមិនមានភាពឯករាជ្យ និងមិនមានការជឿទុកចិត្តពីគណបក្ស​នយោបាយ ដូច្នេះចាំបាច់ត្រូវ ធ្វើកំណែទម្រង់ស្ថាប័នបោះឆ្នោតឲ្យមានភាពឯករាជ្យ។

អ្នកវិភាគឯករាជ្យរូបនេះ បន្តថា មេដឹកនាំកំពូលរបស់គណបក្សសង្រ្គោះជាតិ និងគណបក្ស​ប្រជាជន​​កម្ពុជា គួរជួប​គ្នាដោយផ្ទាល់ ដើម្បីឈានទៅសម្រេចចំណុចគន្លឹះ ក្នុងដំណើរការកំណែទម្រង់​ស្ថាប័ន​បោះឆ្នោត។ លោក កែម ឡី បញ្ជាក់ថា៖ «ជាប់គាំងនយោបាយ ហើយទៅចរចាបច្ចេកទេសមុន(...)។ គោជល់គ្នា ហើយបែរជាទៅដេញក្របី ប្រហែលជាមិនអាចទៅរួចទេ។»

យោងតាមស្មារតីដែលបានឯកភាពគ្នាកាលពីថ្ងៃទី១៦ ខែកញ្ញា ឆ្នាំ២០១៣ គណប្រជាជនកម្ពុជា និងគណបក្ស​សង្រ្គោះជាតិ បានប្រកៀកស្មាគ្នា ចរចាលើការកំណែទម្រង់ស្ថាប័នបោះឆ្នោត ជាបន្តបន្ទាប់។ តែការចរចាលើការ​កំណែទម្រង់ស្ថាប័នបោះឆ្នោត បានដើរដល់ភាពទាល់ច្រក ត្រឹមថ្ងៃទី២៤ ខែមីនា ឆ្នាំ២០១៤។ ភាពទាល់ច្រកនេះ ដោយសារគណបក្សប្រជាជនកម្ពុជា មិនឯកភាពដាក់ស្ថាប័នបោះឆ្នោតចូលទៅក្នុងរដ្ឋធម្មនុញ្ញ តាមការស្នើសុំរបស់​គណបក្សសង្រ្គោះជាតិ។

លោក សម រង្ស៊ី ប្រធានគណបក្សសង្រ្គោះជាតិ បានថ្លែងក្នុងសន្និសីទ ការសែត ថ្ងៃទី២៦ មីនា នៅទីស្នាក់ការ​កណ្តាល​គណបក្ស ថា គណបក្សសង្រ្គោះជាតិ មិនបានដាក់កំហិតឲ្យគណបក្សប្រជាជនកម្ពុជា ត្រូវតែទទួលយក​លក្ខខណ្ឌរបស់គណបក្សសង្រ្គោះជាតិនោះទេ។ ប្រមុខគណបក្សជំទាស់ រូបនេះ បញ្ជាក់ថា៖ «យើងគ្រាន់តែស្នើរូបមន្ត រូបមន្តមានច្រើន ហើយមិនដាច់ខាតទេ (...)។ បើគណបក្សប្រជាជនកម្ពុជា មានរូបមន្តថ្មី ដែលធានាឯករាជ្យ​ស្ថាប័ន​បោះឆ្នោត យើងនឹងពិនិត្យ ពិភាក្សាជាមួយគ្នា។»

ជាមួយគ្នានេះ អនុប្រធានគណបក្សសង្រ្គោះជាតិ លោក កឹម សុខា ក៏បានលើកឡើងថា បើគណបក្សប្រជាជនកម្ពុជា មានឆន្ទៈពិតប្រាកដក្នុងការកែទម្រង់ស្ថាប័នបោះឆ្នោត គម្បីដាក់ស្ថាប័នបោះឆ្នោតទៅជាស្ថាប័នធម្មនុញ្ញ។ លោក កឹម សុខា បញ្ជាក់ថា៖ «បើថ្នាក់ក្រុមការងារបច្ចេកទេសគាត់ មិនហ៊ានសម្រេច ឲ្យថ្នាក់កំពូលគាត់សម្រេចមក។ ចាំសួរ​ទៅ​លើ ចាំសួរទៅលើ ឥឡូវបើចាំសួរទៅលើ ជួបលើក៏បាន៕»

-------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី២៦ មីនា ២០១៤