អគ្គនាយកដ្ឋានពន្ធនាគារ បានស្នើរសុំព្រះមហាក្សត្រ ព្រះរាជទានលើកលែងទោស និងបន្ទូរបន្ថយទោស ដល់​ទណ្ឌិតទូទាំងប្រទេស សរុបចំនួន ៦២៥ នាក់នៅក្នុងពិធីចូលឆ្នាំប្រពៃណីខ្មែរ ដែលនៅក្នុងប្រតិទិនបានកំណត់​ប្រារព្ធធ្វើ រយៈពេល៣ថ្ងៃ ចាប់ពីថ្ងៃទី១៤ដល់ថ្ងៃទី ១៦ ខែមេសា។

អ្នកទោស នៅពន្ធនាគារត្រពាំងថ្លុង។ (រូបថត ហ្វេសប៊ុក)

ប្រព័ន្ធយុត្តិធម៌ - លោក សម ប្រជាមានិត នាយកខន្ទកាល័យក្រសួងយុត្តិធម៌ បានថ្លែងប្រាប់ទស្សនាវដ្ដី​មនោរម្យ.អាំងហ្វូ ថា អគ្គនាយកដ្ឋានពន្ធនាគារនៃក្រសួងមហាផ្ទៃ បានស្នើរសុំព្រះមហាក្សត្រ ព្រះរាជទានលើក​លែងទោស និងបន្ទូរបន្ថយទោសដល់ទណ្ឌិតទូទាំងប្រទេស សរុបចំនួន ៦២៥ នាក់នៅក្នុងពិធីចូលឆ្នាំប្រពៃណីខ្មែរ។ លោកបាននិយាយទៀតថា៖ «ពន្ធនាគារបានស្នើរសុំចំនួន ៦២៥នាក់ ប៉ុន្តែយើងកំពុងប្រជុំដើម្បីសម្រេច យើង​មិន​ទាន់ដឹងថា មានចំនួនប៉ុន្មានពិតប្រាកដ ថានឹងត្រូវលើកលែងទោស និងបន្ធូបន្ថយទោសនោះទេ មុននឹងបញ្ជូននៅ​ព្រះមហាក្សត្រ ព្រះរាជប្រទានលើកលែងទោស និងបន្ធូបន្ថយទោស»។

លោកបានថ្លែងឲ្យដឹងថា នៅក្នុងមួយឆ្នាំ ពន្ធនាគារទូទាំងប្រទេស បានអាចស្នើរសុំលោកលែងទោស និងបន្ធូបន្ថយ​ទោសដល់ទណ្ឌិត បានចំនួន៣ដងគឺនៅ ថ្ងៃបុណ្យចូលឆ្នាំប្រពៃណីខ្មែរ បុណ្យភ្ជុំបិណ្ឌ និង ថ្ងៃបុណ្យអុំទូក។ លោក​បានបញ្ជាក់ថា៖ «ទណ្ឌិតដែលត្រូវលើកលែងទោស និងបន្ធូបន្ថយទោសលុះត្រាតែកែខ្លួននៅក្នុងពន្ធនាគារ អាចធ្វើ​សមាហរណកម្មរស់នៅជាមួយ សហគមន៍របស់ពួកគេបាន»។

លោក គុយ ប៊ុនសន អគ្គនាយក នៃអគ្គនាយកដ្ឋានពន្ធនាគាររបស់ក្រសួងមហាផ្ទៃ បានពន្យល់ ថាអគ្គ​នាយកដ្ឋាន​ធ្វើការស្នើរសុំទៅ ក្រសួងយុត្តិធម៌ហើយមុននឹងបញ្ជូនទៅ ព្រះមហាក្សត្រ។ លោកបានបន្ថែមទៀតថា៖ «យើងកំពុង​តែប្រជុំសម្រេចរឿងនេះ យើងពុំទាន់ដឹងតួរលេខច្បាស់ប៉ុន្មាននោះទេ»។

លោក ចាន់ សុវ៉េត មន្ត្រីស៊ើបអង្កេតជាន់ខ្ពស់ សមាគមការពារសិទ្ធិមនុស្សអាដហុក បានលើកឡើងថា ទណ្ឌិត​ដែល​អាចលើកលែងទោសបាន លុះត្រាតែបានអនុវត្តទោសរបស់ខ្លួន២ភាគ៣ និងបានកែប្រែខ្លួននៅក្នុងពន្ធនាគារបានល្អ ទើបប្រធានពន្ធានគារស្នើរសុំមកក្រសួង ឲ្យលោកលែងទោស និងបន្ធូបន្ថយទោសបាន ប៉ុន្តែកន្លងមក តែងតែ​មាន​ការអនុវត្តន៍ផ្ទុយដូចករណី លោក ស សុង ក្នុងទំនាស់រឿងដីធ្លីតូចតាចមួយ ត្រូវបានជាប់ទោស៦ឆ្នាំ ហើយគាត់បាន​ជាប់ពន្ធនាគារលើលចំនួន២ភាគ៣ ប៉ុន្តែពុំបានត្រូវលើកលែងរឺបន្ធូបន្ថយទោសនោះទេ គាត់ជាប់ពន្ធនាគារ​រហូត​បានអនុវត្តទោសគាត់ទាំងអស់។ លោកបានទម្លាយរឿងនេះ អញ្ចេះថា៖ «យើងតែងតែលឺពីសាច់ញាត្តិទណ្ឌិតថា បើចង់លើកលែងទោស រឺបន្ធូរបន្ថយទោស លុះត្រាតែមានលុយឲ្យគេ»។

កាលពីថ្ងៃទី៤ ខែកុម្ភៈ ឆ្នាំ ២០១៣ រាជរដ្ឋាភិបាលកម្ពុជា បានស្នើរសុំទៅព្រះមហាក្សត្រធ្វើការលើកលែងទោសដល់ ទណ្ឌិតនៅទូទាំងប្រទេសចំនួន ៤១២នាក់ និងបន្ធូរបន្ថយទោសដល់ទណ្ឌិត ៨៤នាក់ ក្នុងពិធីថ្វាយព្រះភ្លើងដល់​ព្រះ​បរមរតនកោដ្ឋ ព្រះមហាវីរក្សត្រ នរោត្តម សីហនុ ដោយក្នុងនោះមានទាំងស្តី្រដែលមានផ្ទៃពោះចាស់ជរា និង​មាន​ជំងឺរ៉ាំរៃ ផងដែរ៕

------------------------------
ដោយ គិន ង៉ុយ (ទំនាក់ទំនង [email protected]) - ភ្នំពេញ ថ្ងៃទី២០ មីនា ២០១៤