នាយករដ្ឋមន្ត្រីអូស្ត្រាលី បានប្រកាសនៅព្រឹកថ្ងៃព្រហស្បត្តិ៍នេះ ថាផ្កាយរណបរបស់ប្រទេសអូស្ត្រាលី បានឆ្លុះឃើញ​វត្ថុសំខាន់ពីរ ដែលទំនងជាមានការជាប់ទាក់ទងនឹង យន្ដហោះប៊ូអីង ៧៧៧ នៃជើងហោះហើរ MH370 ដែលបាន​បាត់ខ្លួនតាំងពី១២ថ្ងៃមកហើយ។

រូបភាពបង្ហាញពីប្រព័ន្ធផ្ដាយរណប ដែលថតរូបពីលើអាកាស។ (រូបថត ឯកសារ)

បាត់យន្ដហោះ - លោក តូនី អាប៊ុត (Tony Abbott) នាយករដ្ឋមន្ត្រីនៃប្រទេសអូស្ត្រាលី បានថ្លែងនៅពីមុខ​រដ្ឋសភា​ថា អាជ្ញាធរផ្នែកសុវត្ថិភាពនាវាចរណ៍ (AMSA) បានទទួលដំណឹងថ្មី និងគួរឲ្យជឿជាក់បាន ដោយយោងទៅលើ​ទិន្នន័យ ផ្ដល់ដោយប្រព័ន្ធផ្កាយរណបរបស់ប្រទេស ថាវត្ថុទាំងនេះអាចនឹងជាប់ទាក់ទងទៅនឹងការរុករកយន្ដហោះ ដែលដឹកមនុស្ស២៣៩នាក់ ចេញពីរដ្ឋធានីកូឡាឡំពួរ ទៅកាន់រដ្ឋធានីប៉េកាំង។

លោកនាយករដ្ឋមន្ត្រី បានថ្លែងបញ្ជាក់ថា «បន្ទាប់ពីបានសិក្សាវិភាគ ទៅលើរូបភាពនៃប្រព័ន្ធផ្កាយរណបនោះរួច វត្ថុទាំងពីរ ដែលទំនងជាជាប់ទាក់ទងនឹងការរុករកយន្ដហោះនោះ ត្រូវបានកំណត់អត្តសញ្ញាណ»។

យន្ដហោះមួយគ្រឿង ត្រូវបានបញ្ជូនឲ្យធ្វើដំណើរទៅកាន់តំបន់នោះភ្លាម ដើម្បីអង្កេតមើលឲ្យច្បាស់ ពីវត្ថុ​ដែល​ទើប​នឹងរកឃើញនេះ ខណៈយន្ដហោះចំនួនបីគ្រឿងទៀត នឹងបញ្ជូនទៅតាមក្រោយ។ លោកនាយករដ្ឋមន្ត្រី មិនបាន​លំអិតឲ្យបានច្បាស់ ពីទីកន្លែងដែលវត្ថុទាំងនោះ ស្ថិតនៅនោះទេ ប៉ុន្តែកន្លងមកប្រទេសអូស្ត្រាលី បាននាំមុខ​ក្នុង​ស្វែងរកយន្ដហោះទាំងនេះ នៅក្នុងផ្នែកខាងត្បូងនៃមហាសមុទ្រឥណ្ឌា។

អាជ្ញាធរផ្នែកសុវត្ថិភាពនាវាចរណ៍​ នៃប្រទេសអូស្ត្រាលី នឹងត្រូវធ្វើសន្និសីទសារព័ត៌មាន នៅល្ងាចថ្ងៃទី២០ ខែមីនា​នេះ នៅរដ្ឋធានី កង់ប៊េរ៉ា (Canberra) ដើម្បីបញ្ជាក់បន្ថែមពីការរកឃើញនេះ។

លោកនាយករដ្ឋមន្ត្រីអូស្ត្រាលី បានអះអាងថា លោកបានជូនដំណឹងទៅអាជ្ញាធរនៃប្រទេសម៉ាឡេស៊ីរួចហើយ ពីអ្វី​ដែលទើបនឹងរកឃើញនេះ។ ទស្សនាវដ្ដីមនោរម្យ.អាំងហ្វូ នឹងត្រឡប់មកវិញ ជាមួយអត្ថបទរបស់ខ្លួន នៅពេលមាន​ព័ត៌មានបន្ថែម៕

------------------------------------
ដោយ សេក មនោរកុមារ (ទំនាក់ទំនង៖ [email protected]) - ប៉ារីស​ ថ្ងៃទី២០ មីនា ២០១៤