កឹម សុខា៖ បក្សសង្រ្គោះជាតិ នៅតែទាមទារឲ្យបោះឆ្នោតឡើងវិញ
ជាថ្មីម្តងទៀត អនុប្រធានគណបក្សសង្រ្គោះជាតិ លោក កឹម សុខា បានអះអាងថា បើទោះជាគណបក្សសង្រ្គោះជាតិ កំពុងចរចាលើការកែទម្រង់ការបោះឆ្នោត ជាមួយគណបក្សប្រជាជនកម្ពុជាក៏ដោយ ក៏គណបក្សសង្រ្គោះជាតិ នៅរក្សាគោលជំហរដដែល ចំពោះការទាមទារកន្លងមក។
លោក កឹម សុខា ក្នុងមហាបាតុកម្មរបស់គណបក្សសង្គ្រោះជាតិរបស់លោក ថ្ងៃទី១៥ខែធ្នូឆ្នាំ២០១៣។ (រូបថត គណបក្ស)
នយោបាយកម្ពុជា - តាមរយៈទំព័រហ្វេសប៊ុកផ្លូវការរបស់ខ្លួន នៅថ្ងៃទី១៩ មីនា លោក កឹម សុខា អនុប្រធានគណបក្សសង្រ្គោះជាតិ បានបញ្ជាក់ថា៖ «គណបក្សសង្គ្រោះជាតិ នៅតែរក្សាគោលជំហររឹងមាំជានិច្ច ទី១. ទាមទារឲ្យស៊ើបអង្កេតភាពមិនប្រក្រតីនៃការបោះឆ្នោត ទី២. ទាមទារបោះឆ្នោតឡើងវិញ ទី៣. ទាមទារឲ្យមានការកែទម្រង់ការបោះឆ្នោត»។
អនុប្រធានគណបក្សជំទាស់រូបនេះ បានបន្ថែមថា គណបក្សប្រជាជនកម្ពុជា នឹងបរាជ័យចំពោះកលល្បិចរបស់ខ្លួន ដែលធ្លាប់តែទិញ សម្លុត និងបំបែកបំបាក់ ចំពោះអ្នកណាដែលមាននិន្នាការនយោបាយផ្ទុយពីខ្លួន។ លោក កឹម សុខា បានបង្ហាញការប្ដេជ្ញាចិត្តទៀតថា៖ «យើងនឹងយកជ័យជម្នះជូនប្រជាពលរដ្ឋ និងជាតិឲ្យបាន»។
ការលើកឡើងរបស់លោកកឹម សុខា គឺស្របពេលដែលក្រុមការងារបច្ចេកទេសរបស់គណបក្សប្រជាជនកម្ពុជា និងគណបក្សសង្រ្គោះជាតិ កំពុងបន្តជជែកគ្នាលើការកែទម្រង់ការបោះឆ្នោត។ ការចរចាលើការកែទម្រង់ការបោះឆ្នោត រវាងគណបក្សទាំងពីរ ត្រូវបានគេមើលឃើញថាចេញជាផ្លែផ្កា ជាបន្តបន្ទាប់ ហើយការចរចានេះ ក៏ជាផ្នែកមួយឈានទៅទម្លាយ ភាពជាប់គាំងផ្នែកនយោបាយផងដែរ។
សម្រាប់គណបក្សប្រជាជនកម្ពុជា រហូតមកដល់ពេលនេះ បើទោះជាកំពុងសហការជាមួយគណបក្សសង្រ្គោះជាតិ ក្នុងការកែទម្រង់ការបោះឆ្នោតក៏ពិតមែន តែគណបក្សដែលបានគ្រប់គ្រងប្រទេសកម្ពុជាជាង៣០ឆ្នាំមកនេះ នៅតែបន្តបដិសេធ ចំពោះការស៊ើបអង្កេតភាពមិនប្រក្រតីនៃការបោះឆ្នោត និងបានចាត់ទុកការទាមទារបោះឆ្នោតឡើងវិញ មុនបញ្ចប់អាណត្តិ គឺជាទង្វើខុសច្បាប់។
លោក ចាន់ សុវ៉េត អនុប្រធានផ្នែកអង្កេតនៃសមាគមការពារសិទ្ធិមនុស្សអាដហុក បានលើកឡើងថា គណបក្សប្រជាជនកម្ពុជា និងគណបក្សសង្រ្គោះជាតិ គម្បីទម្លាក់ចោលផលប្រយោជន៍របស់គណបក្ស ហើយមកចាប់យកផលប្រយោជន៍ជាតិឲ្យបានច្រើនជាង ជាពិសេសគួរប្រុងប្រយ័ត្ន លទ្ធភាពនៃការបែកបាក់ជាតិ អំឡុងពេលដែលកម្ពុជា មានភាពជាប់គាំងផ្នែកនយោបាយ។ លោក ចាន់ សុវ៉េត បញ្ជាក់ថា៖ «ការកែទម្រង់នយោបាយឲ្យបានសមស្រប ល្គឹកណា ទាល់តែគណបក្សទាំងពីរថយក្រោយមួយជំហានម្នាក់ ហើយហ៊ានលះបង់ប្រយោជន៍បុគ្គល និងគណបក្ស»៕
--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី១៩ មីនា ២០១៤