មើលទៅ លោកវេជ្ជបណ្ឌិត ហ្គារេត ម័រហ្គាន (Gareth Morgan) នឹងធ្វើអ្វីគ្រប់យ៉ាងទាំងអស់ ដើម្បីសុខភាពជាទូទៅ​របស់​បណ្ដាជន នៅក្នុងសកលវិទ្យាល័យរបស់លោក ក្នុងនោះរាប់ទាំងសម្លាប់ឲ្យស្រឡះពីមុខ នូវពពួកសត្វកណ្ដុរ​ប្រម៉េះ ដោយលោកបានផ្ដក់ទឹកចិត្តទៅឲ្យពេជឃាត ដែលហានក្លាហ៊ានលើកដៃប្រហារសត្វនេះ នូវស្រាប៊ៀរមួយ​កែវ។

កណ្ដុរជាប់អង្គប់។ (រូបភាព wikipedia.org)

ពីនេះពីនោះ - បន្ទាប់ពីសត្វឆ្មារ ឥឡូវនេះដល់វេនសត្វកណ្ដុរម្ដង។ ហ្គារេត ម័រហ្គាន ត្រូវបានគេស្គាល់លោក តាំង​ពីដើមឆ្នាំ២០១៣កន្លងមក នៅក្នុងយុទ្ធនាការសម្លាប់សត្វឆ្មារ នៅក្នុងប្រទេសញ៉ូហ្សេឡេន ដើម្បីសង្គ្រោះសត្វស្លាប​ប្រភេទ គីវី ដែលត្រូវបានចាត់ទុកជាសម្បត្តិធម្មជាតិដ៏ពិសេស របស់ប្រទេសនេះ ពីការ«បរិភោគ»ជាបង្អែមក្លែមមាត់ របស់សត្វឆ្មារ។ ប៉ុន្តែនៅឆ្នាំ២០១៤នេះ លោកសាស្ត្រាចារ្យវេជ្ជបណ្ឌិត ហ្គារេត ម័រហ្គាន បានប្រកាសសង្គ្រាម​ជាថ្មី​ម្ដងទៀត ប្រឆាំងសត្វកណ្ដុរប្រម៉េះ។

លោកបានជំរុញ ឲ្យក្រុមនិស្សិតដើរស្វែងរកប្រមាញ់សត្វកណ្ដុរទាំងនេះ ដោយសន្យានឹងជូនស្រាប៊ៀរមួយកែវ ជាថ្នូរ​នឹងកណ្ដុរមួយក្បាលចាប់បាន ទោះស្លាប់ឬក៏រស់ក៏ដោយ។ តែសាស្ត្រាចារ្យ ដែលមាននិន្នាការប្រឆាំងសត្វ​កណ្ដុរ​រូប​នេះ បានថ្លែងថា លោកចង់ឲ្យសត្វដែលនាំមកនោះ គួរតែត្រូវបានសម្លាប់រួចហើយ។

ហេតុអ្វី? ព្រោះ លោក ហ្គារេត ម័ហ្គាន រូបនេះ ជាអ្នកស្រឡាញ់ធម្មជាតិមួយរូប ដែលចង់បញ្ជៀសសកលវិទ្យាល័យ​របស់លោក ពីជំងឺឆ្លងមួយប្រភេទ (ប៉េស្ត៍) ដែលបណ្ដាលមកពី ឬឆ្លងពីសត្វកណ្ដុរ។ លោកយល់ថា ការជ្រើសរើស​វិធីបែបនេះ ជាវិធីដ៏ល្អបំផុតសម្រាប់ការពារសកលវិទ្យាល័យ និងជីវធម្មជាតិដែលរងការរិករិល ដោយសារការឈ្មុស​បំផ្លាញរបស់សត្វកណ្ដុរ។

ហេតុដូច្នេះហើយ ទើបនិស្សិតនៅសកលវិទ្យាល័យ វិតូរីយ៉ា កាលពីចុងសប្ដាហ៍មុន បានដាក់អង្គប់ (សម្ភារះផ្ដល់​ជូន​ដោយមិនគិតថ្លៃ) និងធ្វើយ៉ាងណាក៏ដោយ ដើម្បីសម្លាប់សត្វកណ្ដុរ។ ដើម្បីជាការតបស្នង លោក ហ្គារេត ម័រហ្គាន និងក្រុមហ៊ុនស្រាវជ្រាវវិទ្យាសាស្ត្រមួយ ដែលទទួលរៀបចំគម្រោងនេះដែរនោះ បានផ្ដល់ជូនទៅបណ្ដា​ពេជឃាត​ណាក៏ដោយ នូវរង្វាន់ស្រាប៊ៀរមួយកែវយ៉ាងពិសេស។

នាយកក្រុមហ៊ុន លោក ចនណាថាន់ មូធើរ បានថ្លែងប្រាប់អ្នកសារព័ត៌មានថា «វាពិតហើយដែល​មាននិស្សិតមួយ​ចំនួន មកចូលរួមក្នុងកម្មវិធីនេះ ដើម្បីគ្រាន់តែទទួលបានស្រាប៊ៀរប៉ុណ្ណោះ។ ប៉ុន្តែក៏មាននិស្សិតជាច្រើន បានចូលរួម ដោយសារតែពួកគេបានយល់ដឹងពីបរិស្ថាន និងជីវសាស្ត្រដ៏មានតម្លៃនោះដែរ»។

ប៉ុន្តែយុទ្ធនាការនេះ មិនទទួលនូវការគាំទ្រដោយឯកច្ឆ័នទាំងស្រុងនោះទេ ហើយក៏មិនខុសពីយុទ្ធនាការលើកមុន ប្រឆាំងនឹងសត្វឆ្មារយ៉ាងដូច្នេះដែរ។ ក្រុមអ្នកស្រឡាញ់សត្វ បានផ្ទុះកំហឹងឡើង បង្កឲ្យមានការជជែកគ្នាយ៉ាង​រណ្ដំ​ថ្គាម ជាពិសេសបាននិយាយបកឲ្យលោក ហ្គារេត ម័ហ្គាន វិញថា ប្រសិនបើចំនួនសត្វកណ្ដុរមានការកើនឡើង គឺ​ដោយមកពីយុទ្ធនាការសម្លាប់កណ្ដុរ ដែលបានធ្វើការពីឆ្នាំមុន។

នៅក្នុងទំព័រហ្វេសប៊ុករបស់លោក ហ្គារេត ម័ហ្គាន ដែលបានបង្កើតឡើងដើម្បីយុទ្ធនាការនេះ មានសរសេរតប​នឹង​ក្រុមអ្នកជំទាស់ថា «គ្មានភស្តុតាងអ្វីមកបញ្ជាក់ទាល់តែសោះ បើនិយាយថាកណ្ដុរភាគច្រើន ត្រូវបានសម្លាប់ដោយ​សត្វឆ្មារនោះ»។ ប៉ុន្តែឃ្លាប្រយោគដែលលើកឡើងនវ មិនសូវជាមាននរណាគាំទ្រឡើយ ម្យ៉ាងទំព័រដែលបានបង្កើត​ឡើងនេះ មានមនុស្សចុចចូលមកតាមដាន និងចូលចិត្តប្រមាណតែ៥០នាក់ប៉ុណ្ណោះ៕

សូមទស្សនាវីដេអូស្ដីពីព្រឹត្តិការណ៍នេះ៖

------------------------------------
ដោយ ឈូករ័ត្ន (ទំនាក់ទំនង៖ [email protected]) - ប៉ារីស​ ថ្ងៃទី២០ មីនា ២០១៤