ការសាកល្បងរថយន្តក្រុងសាធារណៈ បញ្ចប់ទៅដោយជោគជ័យ
នេះជាថ្ងៃចុងក្រោយហើយ នៃសេវារថយន្ដក្រុងក្នុងរាជធានីភ្នំពេញ បន្ទាប់ដាក់អោយសាកល្បងដំណើរការអស់រយៈពេលមួយខែកន្លងមកនៅតាមបណ្តោយផ្លូវមុនីវង្ស។
សេវារថយន្ដក្រុង ដែលបានដាក់ឲ្យប្រើប្រាស់ពេញមួយខែ នៅរាជធានីភ្នំពេញ។ (រូបថត AP)
សេវាសាធារណៈ - នៅថ្ងៃទី០៤ ខែមិនា ឆ្នាំ២០១៤ នេះការសាកល្បងដាក់អោយប្រើប្រាស់ សេវារថយន្ដក្រុងសាធារណៈនឹងត្រូវបានបញ្ចប់។ គម្រោងសាកល្បងរថយន្តក្រុងសាធារណៈ ដែលបានសម្ពោធដាក់ឲ្យប្រើប្រាស់ពេញមួយខែ ចាប់ពីថ្ងៃទី០៥ ខែកុម្ភះដល់ថ្ងៃទី០៤ ខែមិនា ឆ្នាំ២០១៤ ក្នុងគោលបំណងអោយប្រជាពលរដ្ឋ ក្នុងរាជធានីភ្នំពេញទាំងអស់ កែប្រែទម្លាប់ក្នុងការប្រើប្រាស់យានជំនិះផ្ទាល់ខ្លួន មកប្រើប្រាស់របស់រួមដើម្បីជួយសង្គម កាត់បន្ថយការបំពុលបរិស្ថាន និងការកកស្ទះចរាចរណ៍។
កាលពីថ្ងៃទី៥ ខែកុម្ភៈកន្លងទៅ សាលារាជធានីភ្នំពេញ ក្រោមកិច្ចសហការជាមួយទីភ្នាក់ងារ សហប្រតិបត្តិការអន្តរជាតិជប៉ុន(JICA) បានដាក់សម្ភោធអោយប្រើប្រាស់ នូវសេវារថយន្តក្រុងសាធារណៈចំនួន១០គ្រឿង នៅលើបណ្ដោយផ្លូវព្រះមុនីវង្ស ចាប់ពីរង្វង់មូលស្តាតចាស់ រហូតដល់គល់ស្ពានច្បារអំពៅ។
ជាការកត់សម្គាល់ឃើញ សម្រាប់ពេញមួយខែនៃការសាកល្បង សេវាសាធារណៈមួយនេះ ទទួលបានការគាំទ្រភាគច្រើនពីសាធារណៈជនទូទៅ។ បើតាមអោយដឹងរបស់សាលារាជធានីភ្នំពេញ ឃើញថានៅ២៥ថ្ងៃដំបូង មានចំនួនមនុស្សជិះជាមធ្យម ១៥០០នាក់ក្នុងមួយថ្ងៃ ដែលលទ្ធផលបានចាត់ទុកថា ជាដំណើរការជោគជ័យមួយ នៃការដាក់អោយប្រើប្រាស់សាកល្បងក្នុងខែដំបូងនេះ។
ស្រង់សម្តីដោយគេហទំព័រក្នុងស្រុកមួយ លោក ឡុង ឌីម៉ង អ្នកនាំពាក្យសាលារាជធានីភ្នំពេញ បានអោយដឹងថា សាលារាជធានីនឹងចុះកិច្ចសន្យា ជាមួយក្រុមហ៊ុនរថយន្តក្រុងសាធារណៈ ដើម្បីឲ្យក្រុមហ៊ុននោះ ទទួលសិទ្ធិបន្តដឹកជញ្ជូនអ្នកដំណើរជាផ្លូវការ បន្ទាប់ពីការសាកល្បងមួយខែកន្លងទៅនេះ ត្រូវបានបញ្ចប់។ តែលោកមិនទាន់អាចកំណត់ថ្ងៃបាននៅឡើយ។ រីឯ លោក ប៉ា សុជាតិវង្ស អភិបាលរាជធានីភ្នំពេញ ក៏ធ្លាប់បានបញ្ជាក់ដែរថា សាលារាជធានីភ្នំពេញ គ្រោងនឹងបង្កើត រថយន្តក្រុងសាធារណៈចំនួន២ខ្សែរទៀត ដែលនឹងត្រូវដាក់អោយដំណើរការ នៅលើមហាវិថី ម៉ៅសេទុង និង មហាវិថី កម្ពុជាក្រោម៕
-----------------------------------------------
ដោយ ក. ចាន់នីតា (ទំនាក់ទំនង៖ [email protected]) -ភ្នំពេញ ថ្ងៃទី ០៤ មិនា ២០១៤