បន្ទាប់ពីកិច្ចប្រជុំ​មួយរវាង សាលារាជធានីភ្នំពេញ និងតំណាងសហជីពមួយចំនួនរួចមក សាលារាជធានីភ្នំពេញ មិន​អនុញ្ញាត​អោយសហជីពធ្វើវេទិកាសាធារណៈ នៅទីលានប្រជាធិបតេយ្យនោះឡើយ។ ការហាមឃាត់នោះ ត្រូវបាន​លើកមកបញ្ជាក់ថា ស្ថិតក្រោមហេតុផលសន្តិសុខសណ្តាប់ធ្នាប់។

ក្រុមកម្មករធ្វើបាតុកម្មនៅខាងមុខក្រសួងការងារ លើវិថីសហព័ន្ធរ៉ូស្ស៊ី កាល់ពីថ្ងៃទី៣១ខែធ្នូឆ្នាំ២០១៣។ (រូបថត MONOROOM.info/O.Vary)

សិទ្ធិ - នៅព្រឹកថ្ងៃទី០៤ ខែមិនា ឆ្នាំ២០១៤នេះ សាលារាជធានីភ្នំពេញ និងតំណាងសហជីពធំៗមួយចំនួន បានជួប​ប្រជុំដើម្បីទាក់ទងនឹងការសុំធ្វើវេទិកាសាធារណៈ របស់សហជីពនៅថ្ងៃទី៨ ខែមីនា ដើម្បីទាមទារឲ្យរដ្ឋាភិបាល និង​និយោជក​ដោះស្រាយបញ្ហាមួយចំនួន រួមទាំងការដោះលែងអ្នកជាប់ឃុំ២១នាក់ និងដំឡើងប្រាក់ឈ្នួល​គោល​១៦០​ដុល្លារ ក្នុង១ខែផងដែរ។

ចេញពីកិច្ចប្រជុំនោះ អ្នកស្រី កេន ហេងឡាង អនុប្រធានសហព័ន្ធសហជីពជាតិ នៃឧស្សាហកម្មវាយនភ័ណ្ឌ​កាត់ដេរ​កម្ពុជា បានប្រាប់ទស្សនាវដ្ដីមនោរម្យ.អាំងហ្វូ អោយដឹងនៅថ្ងៃនេះថា សាលារាជធានីភ្នំពេញមិនបានអនុញ្ញាតឲ្យ​សហជីពទាំង១៨ប្រារព្ធវេទិការសាធារណៈ នៅទីលានប្រជាធិបតេយ្យ ថ្ងៃទី០៨ ខែមិនា ខាងមុខនេះទេ។ អ្នកស្រី​បានឲ្យដឹងថា សាលារាជធានីបានអោយក្រុមសហជីព ប្តូរទៅធ្វើនៅតាមការិយាល័យសហជីពរៀងៗខ្លួនវិញ។

បើតាមការបញ្ជាក់របស់ លោក សរ ម៉ូរ៉ា ប្រធានប្រតិបត្តិសហព័ន្ធសហជីពកម្មករចំណីអាហារ និងសេវាកម្មកម្ពុជា ថ្លែងថា មូលហេតុដែលសាលារាជធានីមិនអនុញ្ញាត អោយធ្វើនៅទីលានប្រជាធិបតេយ្យ​ដោយសារហេតុផល​មាន​មនុស្សច្រើន និងដើម្បីរក្សាសន្តិសុខសុវត្តិភាព និងសណ្តាប់ធ្នាប់។

តែហេតុផលនេះ ត្រូវបាន លោក សរ ម៉ូរ៉ា ចាត់ទុកថា ជាការរំលោភលើសិទ្ធិរបស់ប្រជាពលរដ្ឋ ដែលជាកម្មករ​និយោជិក មិនអាចប្រើប្រាស់សិទ្ធជាមូលដ្ឋានរបស់ខ្លួន ដូចមានចែងក្នុងរដ្ឋធម្មនុញ្ញបាន។ ប្រធាន​ប្រតិបត្តិសហព័ន្ធ​សហជីពកម្មករចំណីអាហារ និងសេវាកម្មកម្ពុជារូបនេះបានព្យល់យ៉ាងដូច្នេះទៀតថា «វេទិកាថ្ងៃ៨ មិនា នេះ​មិនមែន​ជាបាតុកម្មទេ វាគ្រាន់តែជាវេទិកាជួបជុំគ្នាសម្តែងមតិ ដើម្បីចង់អោយមានតម្លាភាព មានគណនេយ្យភាព រវាង​រដ្ឋាភិបាលក្នុងការដោះស្រាយបញ្ហាជូនប្រជាពលរដ្ឋ។ តែគ្រាន់អញ្ចឹងក៏ត្រូវបានហាមឃាត់ដែរ។»

ទស្សនាវដ្ដី មិនអាចសុំការបញ្ជាក់ ពីអ្នកនាំពាក្យសាលារាជធាភ្នំពេញ លោក ឡុង ឌីម៉ង់បានទេ ដោយសារតែ​ហៅ​ទូរស័ព្ទចូល ​តែគ្មានការទទួល។

បើទោះបីជាអ្នកការហាមឃាត់ ពីសាលាក្រុងយ៉ាងណាក៏ដោយ លោក រ៉ុង ឈុនធ្លាប់បាន អះអាងថា កម្មវិធីនេះ មិន​អាចលប់ចោលបានទេ បើទោះបីជាខាងសាលារាជធានីភ្នំពេញមិនអនុញ្ញាតក៏ដោយ ដោយសារតែពួកលោក​មិន​មានធ្វើអីខុសច្បាប់ ហើយក៏បានដាក់ពាក្យជូនដំណឹងទៅសាលារាជធានីរួចហើយ ហើយពួកលោកក៏មិនមានការ​ព្រួយបារម្ភ​ពីការប៉ះទង្គិចគ្នាដែរ។ ចំពោះផែនការថា នឹងសម្រេចយ៉ាងណាទៀតនោះ ខាងសហជីពនឹងជជែកគ្នា​ជាបន្តទៀតថានឹងត្រូវធ្វើបែបម៉េច។

គួរបញ្ជាក់ វេទិកាសាធារណៈនៅថ្ងៃទី០៨ មិនានោះ ធ្វើឡើងដើម្បីការពន្លឿនការដោះស្រាយរឿងកម្មករ ការចរចា​ដំឡើងប្រាក់ឈ្នួលកម្មករ១៦០ដុល្លា និងដោះលែងមនុស្ស២១ក្នុងពន្ធនាគារត្រពាំងផ្លុងជាដើម។ វេទិកានោះផងដែរ​ក៏គ្រោងនឹងអញ្ជើញថ្នាក់ដឹកនាំរដ្ឋាភិបាល មានដូចជា លោក ស ខេង លោក គាត ឈន់ លោក ជីវ កេង និង លោក អ៊ិត សំហេង ក៏ដូចជាប្រធានគណបក្សប្រឆាំង លោក សម រង្ស៊ី និង លោកកឹម សុខា មកបំភ្លឺជុំវិញប្រាក់ឈ្នួល​របស់​កម្មករ ជុំវិញសិទ្ធិសេរីភាពរបស់កម្មករ ការប្រើហឹង្សាដែលធ្វើឲ្យកម្មករមានការបាត់បង់ជីវិត រងរបួស ការចាប់ឃុំ​ខ្លួន​មនុស្សចំនួន២១នាក់ ។ សហជីព និងសមាគមទាំង១៨ បានដាក់លិខិតអញ្ជើញនោះ ទៅថ្នាក់ដឹកនាំ​ទាំងនោះ​ហើយ ប៉ុន្តែមិនទាន់មានការឆ្លើយតប បែបណានោះទេ៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី០៤ មិនា ២០១៤