គោលនយោបាយជាតិ ស្តីពីសុវត្ថិភាពចរាចរណ៍ផ្លូវគោកនៅកម្ពុជា ត្រូវបានទីស្តីការគណៈរដ្ឋមន្ត្រីបាន​សម្រេច​អនុម័ត កាលពីចុងសប្តាហ៍មុន ក្នុងគោលបំណងកាត់បន្ថយគ្រោះថ្នាក់លើដងផ្លូវ ឲ្យបានពាក់កណ្តាលនៅ​ឆ្នាំ​២០២០។ សម្រាប់ក្រុមអ្នកជំនាញសង្គមស៊ីវិល ខាងផ្នៃកសុវត្ថិភាពផ្លូវថ្នល់វិញ បាននិយាយថា បើមានតែគោល​នយោបាយ តែបើគ្មានការធ្វើផែនការលំអិត នោះមិនអាចសម្រេចបានឡើយ។

គ្រោះថ្នាក់ចរាចរណ៍មួយ នៅតាមដងផ្លូវមួយ ក្នុងខេត្តស្ទឹងត្រែង។ (រូបថត ហ្វេសប៊ុក)

គ្រោះថ្នាក់ចរាចរណ៍ - គណៈរដ្ឋមន្ត្រី បានចេញសេចក្តីថ្លែងការណ៍ថា គោលនយោបាយនេះ រៀបចំដោយ​គណៈកម្មា ធិការជាតិសុវត្ថិភាពចរាចរណ៍ផ្លូវគោក ដើម្បីធ្វើ «មធ្យោបាយដ៏មានសក្តានុពល និងជាកត្តាគន្លឹះធ្វើ ជាត្រីវិស័យសម្រាប់រក្សាសន្តិសុខ សណ្តាប់ធ្នាប់ សុវត្ថិភាព ដល់អ្នកប្រើប្រាស់ ផ្លូវថ្នល់ នៅលើដងផ្លូវ»។

នៅក្នុងប្រកាសព័ត៌មានរបស់គណៈរដ្ឋមន្ត្រីបានឲ្យដឹងថា គោលនយោបាយនេះ មានផែនការសកម្មភាពចំនួន៨ ដែលស្របតាមការកំណត់ ក្នុងកិច្ចប្រជុំមួយ នៅប្រទេសរុស្ស៊ី កាលពីឆ្នាំ២០០៩ ដែលមាន គោលបំណង​សំដៅ​កាត់បន្ថយចំនួនអ្នកស្លាប់ នៅលើផ្លូវថ្នល់ឲ្យបានថយចុះ ចំនួន៥០ភាគរយ ពីឆ្នាំ២០១១ ដល់ឆ្នាំ២០២០ ប៉ុន្តែផែនការ​ទាំង៨នោះ មិនត្រូវបានគេបង្ហាញឡើយ។ ប្រកាសព័ត៌មានគណៈរដ្ឋមន្ត្រីកត់សម្គាល់ថា ៖ «គ្រោះថា្នកចរាចរណ៍​ជាបញ្ហាប្រឈមនៅកម្ពុជា ក្នុងរយៈពេល៥ឆ្នាំចុងក្រោយនេះ ចំនួនអ្នកស្លាប់ និងអ្នករបួស បានកើនឡើងគួរឲ្យ​ព្រួយបារម្ភ បង្កជាកង្វល់ដ៏ធំ សម្រាប់រាជរដ្ឋាភិបាលកម្ពុជា។ កម្ពុជា មានអត្រាអ្នកស្លាប់ដោយ​គ្រោះថ្នាក់ចរាចរណ៍​ផ្លូវគោកខ្ពស់ជាងគេ នៅក្នុងតំបន់ អាស៊ាន។»

លោក អ៊ា ចរិយា ប្រធានកម្មវិធីសុវត្ថិភាពចរាចរណ៍ប្រចាំអង្គការ HIB នៅកម្ពុជា ថ្លែងថា គោលនយោបាយនេះ គឺផ្តល់ទស្សនវិស័យ លើការងារសុវត្ថិភាពចរាចរណ៍ ដែលរដ្ឋាភិបាលត្រូវធ្វើផែនការឲ្យច្បាស់ ក្នុងការកាត់បន្ថយ​គ្រោះ​ថ្នាក់នេះ។ លោកបន្តថា ៖ «គោលនយោបាយល្អ តែបើគ្មានការធ្វើផែនការលំអិត នោះមិនអាចសម្រេច​បាន​ឡើយ។ ដើម្បីកាត់បន្ថយគ្រោះថ្នាក់ ក្រសួងពាក់ព័ន្ធត្រូវរៀបចំផែនការលំអិតធ្វើសកម្មភាព ដូចជាផ្សព្វផ្សាយអប់រំ​ដល់​ពលរដ្ឋ ពង្រឹងការអនុវត្តច្បាប់ជាដើម។»

យោងតាមតួលេខរបស់គណៈកម្មាធិការជាតិ សុវត្ថិភាពចរាចរណ៍ផ្លូវគោក បានឲ្យដឹងថា គ្រោះថ្នាក់ចរាចរណ៍​នៅ​ឆ្នាំ២០១២ បានសម្លាប់មនុស្ស ១៩៦៦នាក់ ក្នុងចំណោមជនរងគ្រោះ ១៥ ៦១៥នាក់ ដែលរងគ្រោះថ្នាក់ចរាចរណ៍​តាមដងផ្លូវ។ តួលេខនេះ បានបូកបញ្ចូលទាំងពីតួលេខ ពីក្រសួងមហាផ្ទៃ និងក្រសួងសុខាភិបាល។ បើគិតតែតួ​លេខនគរបាល ឆ្នាំ២០១៣ មានអ្នកស្លាប់ ១៩១២នាក់ គឺកើន៣ភាគរយលើសឆ្នាំ ២០១២ ដែលមានប្រហែលគ្នា គឺ ១៩០៩នាក់។

បើយោងតាមតួលេខពីអង្គការជនពិការអន្តរជាតិ ប៊ែលហ្សិក ប្រចាំកម្ពុជា (HIB) បានឲ្យដឹងថា គ្រោះថា្នក់ចរាចរណ៍ បានធ្វើឲ្យខាតបង់សេដ្ឋកិច្ច ក្នុងឆ្នាំ២០១២ចំនួន ២២៩លានដុល្លារអាមេរិក៕

------------------------------
ដោយ គិន ង៉ុយ (ទំនាក់ទំនង [email protected]) - ភ្នំពេញ ថ្ងៃទី ២៣ កុម្ភៈ ២០១៤