ក្រុមការងារបក្សប្រឆាំង នឹងចុះជួបប្រជារងគ្រោះខាងដីធ្លី នៅកោះកុង
បេក្ខជនជាប់ឆ្នោតតំណាងរាស្ត្រគណបក្សសង្គ្រោះជាតិ និងសមាជិកព្រឹទ្ធសភា នឹងចុះសួរសុខទុក្ខប្រជាពលរដ្ឋរងគ្រោះក្នុងទំនាស់ដីធ្លីដ៍រ៉ុំរ៉ៃ ជាមួយក្រុមហ៊ុនចិន - Union Development Group - ដែលអភិវឌ្ឍន៍ពាណិជ្ជកម្ម និងរម្មណីយដ្ឋានទេសចរណ៍ ក្នុងស្រុកចំនួនពីរនៃខេត្តកោះកុង នៅថ្ងៃចន្ទសប្តាហ៍ក្រោយនេះ បន្ទាប់ពីក្រុមហ៊ុនបានដុតបំផ្លាញផ្ទះប្រជាពលរដ្ឋអស់ចំនួន ៤៥ខ្នង កាលពីចុងខែមករាកន្លងមក។
ការដុតបំផ្លាញលំនៅដ្ឋានពលរដ្ឋ ដើម្បីពង្រីកដីដាំអំពៅ នៅកោះកុង ក្នុងឆ្នាំ២០០៦។ (រូបថតផ្ដិតពីវីដេអូ AFP)
វិបត្តិដីធ្លី - យោងទៅតាមសេចក្តីប្រកាសព័ត៌មាន របស់គណបក្សសង្គ្រោះជាតិ ចុះថ្ងៃទី២២ ខែកុម្ភៈ ឲ្យដឹងថា បេក្ខជនជាប់ឆ្នោតតំណាងរាស្ត្រគណបក្សសង្គ្រោះជាតិ និងសមាជិកព្រឹទ្ធសភា លោក សុន ឆ័យ នៅថ្ងៃចន្ទ ទី២៤ ខែកុម្ភៈខាងមុខនេះ នឹងចុះជួបប្រជាពលរដ្ឋ រងគ្រោះ ដោយសារការបណ្តេញចេញពីលំនៅដ្ឋាននៅខេត្តកោះកុង។
លោក សុន ឆ័យ បេក្ខជនជាប់ឆ្នោតតំណាងរាស្ត្រគណបក្សសង្គ្រោះជាតិ ថ្លែងប្រាប់ទស្សនាវដ្តីមនោរម្យ.អាំងហ្វូ ថា ការចុះជួបនេះ ធ្វើឡើងបន្ទាប់ពីមានសារព័ត៌មានបានចុះផ្សាយថា ផ្ទះប្រជាពលរដ្ឋប្រមាណ៤៥ខ្នង កាលពីចុងខែមករា ឆ្នាំ២០១៤នេះ ត្រូវបានរុះរើ និងដុតបំផ្លាញដោយ ក្រុមហ៊ុនចិន Union Development Group។ លោកបានថ្លែងទៀតថា៖ «រដ្ឋាភិបាលត្រូវតែបញ្ចប់ជាបន្ទាន់ ចំពោះការផ្លន់ដីរាស្ត្រយក ចាប់រាស្ត្រដាក់គុកដើម្បីយកដីទៅឲ្យក្រុមហ៊ុនបរទេស»។
លោកបានបញ្ជាក់ថា លោកយល់ពីការលំបាករបស់រាស្ត្រ បន្ទាប់ពីគេដុតផ្ទះ ដូច្នេះលោកក៏បានពាំនាំយកនូវអំណោយ ជាគ្រឿងបរិភោគដើម្បីចែកជូនដល់ពួកគាត់ផងដែរ បន្ទាប់ពីការពិនិត្យរួចរាល់ហើយ លោកនឹងស្វែងរកការអន្តរាគមន៍ពីស្ថាប័នពាក់ព័ន្ធ។
បើតាមការអះអាងរបស់ លោក នាង បូរាទីណូ មន្ត្រីសម្របសម្រួលសមាគមអាដហុកប្រចាំខេត្តកោះកុង បានឲ្យដឹងថា នៅដើមឆ្នាំ២០១៤នេះ ក្រុមហ៊ុនចិន បានដុតផ្ទះនិងរុះបំផ្លាញផ្ទះប្រជាពលរដ្ឋនៅស្រុកបទុមសាគរ អស់៤៥ខ្នង ដោយមិនបានផ្តល់សំណង ដើម្បីបណ្តេញពួកគេចេញពីទីតាំង ដែលគាត់រស់នៅច្រើនឆ្នាំមកហើយ។ លោកបានពន្យល់ថា ៖ «នេះគឺជាការរំលោភសិទ្ធិ រស់រានមានជីវិតរបស់ពួកគាត់យ៉ាងធ្ងន់ធ្ងរ ពួកគាត់បានរស់នៅក្នុងតំបន់នោះតាំងពីយូរណាស់មកហើយ ហើយទៅទីបំផុតអ្វី ដែលពួកគាត់ទទួលបាន គឺគ្មានទីជម្រក»។
កាលពីថ្ងៃទី ៩ ខែឧសភា ឆ្នាំ ២០០៨ រាជរដ្ឋាភិបាលកម្ពុជា បានចុះហត្ថលេខាលើកិច្ចសន្យាជួលសម្រាប់រយៈពេល៩៩ ឆ្នាំ ជាមួយក្រុមហ៊ុន Union Development Group សម្រាប់ការសាងសង់តំបន់អភិវឌ្ឍន៍ពាណិជ្ជកម្ម និងរម្មណីយដ្ឋានទេសចរណ៍ ដើម្បីទាក់ទាញភ្ញៀវទេសចរណ៍ និងការវិនិយោគបន្ថែមទៀតលើផ្ទៃដីទំហំ ៣៦០០០ហិកតា ក្នុងស្រុកគិរីសាគរនិងស្រុកបុទុមសារគរ។ ហើយនៅខែសីហា ឆ្នាំ ២០១១ រាជរដ្ឋាភិបាលបានចេញអនុក្រិត្យស្តីពីការកំណត់ផ្ទៃដីទំហំ ៩១០០ ហិកតា ទៅជាតំបន់ប្រើប្រាស់ដោយចីរភាព ដើម្បីផ្តល់ដីសម្បទានជាលើកទី២ឲ្យទៅក្រុមហ៊ុននេះ ធ្វើអាងស្តុកទឹកនិងវារីអគ្គីសនី។
អ្នកស្រី នាង ណាក់ អាយុ ៣៣ ឆ្នាំ មានកូន៤នាក់ ដែលបានសម្រេចចិត្តមករស់នៅក្នុងទូកជាមួយប្តីនិង កូន តូចៗ បន្ទាប់ពីផ្ទះរបស់គាត់ ត្រូវបានដុតនៅថ្ងៃទី៣០ ខែមករា បានឲ្យដឹងថា អ្នកស្រីមិនខ្វល់ចំពោះគណបក្សនយោបាយណានោះទេ គឺអ្នកស្រីស្វាគមន៍ទាំងអស់ គឺធ្វើយ៉ាងណាឲ្យតែពួកគាត់ អាចស្វែងរកដំណោះស្រាយឲ្យពលរដ្ឋរបស់អ្នកស្រីបាន។ អ្នកស្រីបានថ្លែងឲ្យដឹងទៀតថា ៖ «ខ្ញុំសប្បាយចិត្ត នៅពេលដែលមានមន្ត្រីថ្នាក់លើឈឺឆ្កាលចំពោះពួកខ្ញុំ ពីព្រោះពួកយើងទៅស្វែងរកដំណោះស្រាយគ្រប់ច្រកល្ហកហើយ គឺបានត្រឹមតែពាក្យសន្យាប៉ុណ្ណោះ ចំណែកផ្ទះយើងគេដុតជាហូរហែរ»។
យោងទៅតាមរបាយការណ៍អង្កេត របស់អង្គការមិនមែនរដ្ឋាភិបាលដែលហៅថា គណៈកម្មាធិការប្រព្រឹត្តិកម្ម នៃអង្គការសមាគមការពារសិទ្ធិមនុស្សកម្ពុជា បានរកឃើញថា ប្រជាជនសរុបចំនួន១១៤៣គ្រួសារ ស្ថិតក្នុងឃុំចំនួន៥នៃស្រុកចំនួនពីរ គឺស្រុកស្រុកគិរីសាគរ និងស្រុកបុទុមសារគរ ដែលបានរស់នៅក្នុងទស្សវត្ស៦០និង៨០ និងវត្តចំនួនបី ព្រមទាំងសាលាបឋមសិក្សារមួយ បានរងនូវផល់ប៉ះពាល់ ដោយត្រូវផ្លាស់ប្តូរទីតាំងចេញពីតំបន់នោះ ដោយសារតែគម្រោងអភិវឌ្ឍន៍នោះ។ ប្រជាពលរដ្ឋចំនួន៨០០គ្រួសារស្មើរ និង៧១ភាគរយបានបង្ខំចិត្តផ្តិតមេដៃ យល់ព្រមទៅរស់នៅក្នុងទីតាំងថ្មី។ ចំនែកប្រជាពលរដ្ឋ មិនព្រមយកសំណង៣៤៣គ្រួសារ ស្មើរនិង២៩ភាគរយ បានសូមឲ្យរដ្ឋាភិបាលឆ្វៀលដីរបស់គាត់ចេញពីក្រុមហ៊ុន ក្នុងករណីមិនអាចឆ្វៀលបាន សុំឲ្យមានដំណោះស្រាយសំណងសមរម្យ។
លោក យី សុខសាន្ត មន្ត្រីស៊ើបអង្កេតជាន់ខ្ពស់សមាគមន៍សិទ្ធិមនុស្សអាដហុក បានថ្លែងឲ្យដឹងថា រដ្ឋាភិបាលនិងក្រុមអន្តរក្រសួង បានដោះស្រាយឲ្យត្រឹមតែដីភូមិ ចំពោះដីចំការដែលសន្យាឲ្យពីហិកតា គឺសុទ្ធតែជាដីព្រៃស្ថិតនៅក្នុងតំបន់រាជក្រិត្យទាំងអស់។ លោកបានឲ្យដឹងទៀតថា ៖ «នៅក្នុងជម្លោះនោះពលរដ្ឋទទួលបានតែស្តាមផ្តិតមេដៃនៃការផ្តល់ដី ប៉ុន្តែលទ្ធិផលដែលក្រុមហ៊ុនដោះស្រាយឲ្យពួកគាត់គឺគ្មាន។ តាមខ្ញុំសង្កេតឃើញកន្លងមកការផ្តល់ដីសម្បទានសេដ្ឋកិច្ច ឲ្យក្រុមហ៊ុនឯកជនដល់កន្លែងណា គឺធ្វើឲ្យពលរដ្ឋទឹកភ្នែកនៅកន្លែងនោះ។»
លោក លី តឹកហៃ តំណាងក្រុមហ៊ុនចិន មិនអាចសុំការឆ្លើយតបពីបានទេ ដោយទូរស័ព្ទរបស់លោកមិនអ្នកទទួល៕
------------------------------
ដោយ គិន ង៉ុយ (ទំនាក់ទំនង [email protected]) - ភ្នំពេញ ថ្ងៃទី ២៣ កុម្ភៈ ២០១៤