សង្គមស៊ីវិលស្នើអោយគណបក្សជាប់ឆ្នោត បញ្ចូលបេក្ខភាពជាយុវជន
អង្គការសង្គមស៊ីវិលជាតិចំនួន៦ នឹងរៀបចំសន្និសីទសារព័ត៌មាន នៅថ្ងៃនេះ ដើម្បីស្នើទៅគណបក្សនយោបាយ ជាពិសេសគណបក្សសង្រ្គោះជាតិ និងគណបក្សប្រជាជនកម្ពុជា ក្នុងការដាក់បេក្ខភាពជាយុវជននៅក្នុងការបោះឆ្នោតជ្រើសរើសក្រុមប្រឹក្សាខេត្ត/ក្រុង នាពេលខាងមុខនេះ។
ការចូលរួមបោះឆ្នោតឃុំសង្កាត់ កាលពីឆ្នាំ២០១២កន្លងទៅ។
ការបោះឆ្នោត - នៅថ្ងៃទី១៩ ខែ កុម្ភៈ ឆ្នាំ២០១៤នេះ អង្គការសង្គមស៊ីវិលចំនួន៦ ដែលរួមមានអង្គការក្រុមប្រឹក្សាយុវជនកម្ពុជា (YCC) សមាគមយុវជនខ្មែរ (KYA) អង្គការយុវជនខ្មែរ និងអភិវឌ្ឍន៍សង្គម (KYSD) មជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព (PDP-Center) វិទ្យាស្ថានខ្មែរសម្រាប់អភិវឌ្ឍន៍ជាតិ (KIND) សម្ព័ន្ធដើម្បីសុចរិតភាព និងគណនេយ្យភាពសង្គម (CISA) នឹងរៀបចំសន្និសីទសារព័ត៌មានស្តីពី ការប្រគល់លិខិតសំណូមពរ ដល់គណបក្សនយោបាយឲ្យបញ្ចូលបេក្ខជនយុវជនក្នុងបញ្ជីបោះឆ្នោត និងឲ្យមានការបោះឆ្នោតសកល សម្រាប់ការបោះឆ្នោតជ្រើសរើសក្រុមប្រឹក្សារាជធានី/ខេត្ត ក្រុង/ស្រុក/ខណ្ឌ។ កម្មវិធិនេះប្រព្រឹត្តទៅនៅសាកលវិទ្យាល័យ ខេមរៈ។
តាមបញ្ជាក់របស់លោក សុខ វុទ្ធី មន្រ្តីផ្នែកព័ត៌មាននៃអង្គការក្រុមប្រឹក្សាយុវជនកម្ពុជា បានអោយទស្សនាវដ្ដីមនោរម្យ.អាំងហ្វូ ដឹងថា គោលបំណងនៃកម្មវិធីគឺចង់អោយគណបក្សជាប់ឆ្នោត បញ្ចូលឈ្មោះបេក្ខជនជាយុវជននៅក្នុងការបោះឆ្នោតជ្រើសក្រុមប្រឹក្សាខេត្ត/ក្រុង និងគោលបំណងមួយទៀតប្រមូលស្នាមមេដៃ ឬញ្ញតិពីប្រជាពលរដ្ឋយកទៅដាក់អោយគណបក្សធំៗទាំង២ គឺគណបក្សសង្រ្គោះជាតិ និងគណបក្សប្រជាជនកម្ពុជា។ លោកបានអោយដឹងទៀតថា «កាលពីមុនយើងគិតថាពីថ្ងៃទី១៨ ១៩នេះ នឹងរៀបហែរញ្ញត្តិ ទៅដាក់តាមគណបក្សនីមួយៗ តែដោយមិនមានការអនុញ្ញាត ពីសាលាក្រុងទើបយើងប្តូរសកម្មភាពមកជាសន្និសិទកាសែតវិញ»។
កម្មវិធីនេះមានសមាសភាពអ្នកចូលរួមដូចជា លោក សុខ ពិទូរ្យ នាយកប្រតិបត្តិ YCC លោក ហ៊ឹម យន់ អ្នកសម្របសម្រួលសម្ព័ន្ធដើម្បីសុចរិតភាព និងគណនេយ្យភាពសង្គម(CISA) លោក ម៉ាក ចំរើន ប្រធាន KYA លោក ឈួន បូរិត នាយកប្រតិបត្តិ KYSD លោក សេង ឫទ្ធី នាយកប្រតិបត្តិ KIND លោក យង់ គិមអេង ប្រធាន PDP តំណាងគណបក្សសង្រ្គោះជាតិ គណបក្សប្រជាជនកម្ពុជា និងយុវជនប្រមាណ ១០០នាក់។
មន្រ្តីផ្នែកព័ត៌មានរូបនេះបានអះអាងបន្តទៀតថា «សកម្មភាពដែលយើងធ្វើកន្លងមកឃើញថា យុវជនយល់ដឹងបានច្រើនក្នុងអាណត្តិនេះ សូម្បីតែការប្រមូលញ្ញតិនៅតាមបណ្តាខេត្តក្រុងមួយចំនួន ក៏សកម្មភាពរបស់គាត់មានភាពសកម្មជាងមុន។ ឃើញថាការប្រមូលនៅខេត្តខ្លះមានការរំខានពីអាជ្ញាធរដែរ និងកន្លែងសហគមន៍ខ្លះប្រជាពលរដ្ឋ គាត់អត់យល់ហើយ អត់ដឹងថាការបោះឆ្នោត"អសកល"ហ្នឹងបែបម៉េចទេ។»
-----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី ១៨ ខែកុម្ភៈ ឆ្នាំ២០១៤