ក្រោយពីជួបចរចា ប្រជាពលរដ្ឋបុរីឡាមិនព្រមចុះចេញ ពីអាការថ្មីទី៩ នៅព្រឹកថ្ងៃទី១៤ ខែកុម្ភៈ នេះ កងកម្លាំង​សន្តិសុខ​​ខ័ណ្ឌ៧មករា បានបើកការបង្រ្កាជាថ្មីទៅលើប្រជាពលរដ្ឋ ធ្វើឲ្យមានមនុស្សរងរបួសដោយបែកក្បាល ៤នាក់ និងសន្លប់ចំនួន៣នាក់ ក្នុងនោះមានស្ត្រីសឹងតែទាំងអស់។ ជាការបង្ក្រាបថ្មីមួយទៀត ដែលពលរដ្ឋរងគ្រោះនឹងការ​បណ្ដេញដោយបង្ខំចេញពីដីធ្លី ហៅថាបាន«រងឥទ្ធិពលពីអំពើពុករលួយ»។

ការប្រឈមមុខរវាងកងកម្លាំងសន្តិសុខ និងពលរដ្ឋអ្នករងគ្រោះនៅបូរីកីឡា ថ្ងៃទី១៤ ខែកុម្ភះឆ្នាំ២០១៤។ (រូបថត MONOROOM.info/ O. Vary)

ដីធ្លី - នៅព្រឹកថ្ងៃទី១៤ កុម្ភៈ ឆ្នាំ២០១៤ នេះកម្លាំងសន្តិសុខខ័ណ្ឌបានធ្វើការវាយបង្រ្កាប ទៅលើប្រជាពលរដ្ឋនៅ​តំបន់បូរីកីឡា ដើម្បីបណ្តញប្រជាពលរដ្ឋចេញពីអាគារថ្មីទី៩ ដែលពលរដ្ឋនៅកីឡាតវ៉ាចូលទៅ​រស់នៅកាលពី​ថ្ងៃ​ទី១២ ខែកុម្ភៈ ឆ្នាំ២០១៤។

តាមការដឹងអោយរបស់តំណាងប្រជាពលរដ្ឋបូរីកីឡា លោក ពេជ្រ លឹមឃួន បានបញ្ជាក់ថា ការបង្រ្កាបនៅព្រឹក​នេះ​មានរបួសបែកក្បាល៤នាក់ សន្លប់៣នាក់ក្នុងនោះស្រ្តីមានផ្ទៃពោះម្នាក់ និងស្រ្តីទើបសំរាលកូនម្នាក់។ លោកបាន​អះ​អាងទៀតថា កងកម្លាំងបង្រ្កាបសន្តិសុខ៧មករា ប្រហែល២០នាក់ និងប៉ូលីសប្រដាប់ដោយខែល​ប្រហែល១០០​នាក់​នេះក្រោមការបញ្ជាផ្ទាល់ ពីប្រធានសន្តិសុខខ័ណ្ឌឈ្មោះហាក់ និងលោក សោម សុវណ្ណ អភិបាលខណ្ឌ៧មករា។

លោកបានពន្យល់ថា មូលហេតុដែលមានថាបង្រ្កាបនេះ បណ្តាលមកពីអំពើពុករលួយ។ តំណាងរូបនេះ អះអាងថា​លោក សោម សុវណ្ណ អភិបាលខ័ណ្ឌ៧មករា ខុបខិតជាមួយឈ្មួញលក់អាគារថ្មីនេះ ទៅអោយឈ្មួញទុចរិត។ ហើយ​នៅថ្ងៃម្សិលមិញប្រជាពលរដ្ឋបានរងចាំនៅអាគារទី៩ ដើម្បីជួបម្ចាស់អាគារ ដែលសាលាខ័ណ្ឌបានប្រាប់​ថាអាគារ​ទី៩​នេះជារបស់គេ។

ទស្សនាវដ្ដីមនោរម្យ.អាំងហ្វូ មិនអាចសុំការបំភ្លឺពីលោក សោម សុវណ្ណ នៅព្រឹកនេះបានទេ។ តែក្រោយពីការ​ទាមទារ​ចូលទៅរស់នៅអាគារថី្មទី៩ កាលពីថ្ងៃទី១២ ខែកុម្ភៈ សាលារាជធានីភ្នំពេញបាន​ហៅតំណាង​ប្រជា​ពលរដ្ឋ​បូរីកីឡា ចូល​ជួបចរចាកាលពីថ្ងៃទី១៣ ខែកុម្ភៈម្សិលមិញនេះ តែមិនទទួលបានការយល់ព្រម​ពីប្រជា​ពលរដ្ឋ​ក្នុងការ​ចុះចេញពី​អាគារ​ថ្មី​នោះឡើយ។

យ៉ាងណាក៏ដោយ ​បើទោះជាការ​បង្រ្កាបពីកងកម្លាំងរបស់អាជ្ញាធរ នៅតែកើតមានជាធម្មតា តែតំណាងប្រជាពលរដ្ឋ​រូបនេះនៅតែរក្សាជំហរមិនចុះចាញ់ដែល។ លោក​នៅតែរក្សា​ជំហរថា «ខ្ញុំមិនដកថយ ខ្ញុំនៅតែទាមទាររកការពិត​អោយឃើញ»៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី ១៤ ខែកុម្ភៈ ឆ្នាំ២០១៤