«ការរកឃើញនូវព្រះសារីរិកធាតុដែលបានបាត់នេះ អាត្មាយល់ឃើញថា វាមិនទាន់គួឲ្យជឿជាក់ និងទុកចិត្តទាំង​ស្រុងនៅឡើយទេ។ (…) ព្រោះរបស់ដែលបាត់ទៅ ប្រៀបដូចលុយកាក់មាសប្រាក់ ដែលនៅក្នុងខ្លួន នៅក្នុងផ្ទះ បើ​បាត់ទៅហើយពិបាកនឹងរកឃើញមកវិញណាស់។» នេះជាការលើកឡើងរបស់ ព្រះតេជគុណ លួន សូវ៉ាត ម្ចាស់​ពាន​រង្វាន់សម្រាប់បុគ្គលក្លាហានក្នុងការការពារ និងលើកកំពស់សិទិ្ធមនុស្សពីប្រទេសស្វីស។

ព្រះតេជគុណ លួន សូវ៉ាត ក្នុងកិច្ចសម្ភាសថ្ងៃទី០៧ ខែកុម្ភះ ឆ្នាំ២០១៤។ (រូបថត MONOROOM.info/ O.Vary)

សន្តិសុខសង្គម - ព្រះតេជគុណ លួន សូវ៉ាត មានសង្ឃដីកាថា «យើងគិតមើល ព្រះសារីរិកធាតុវត្ថុដ៏មានតម្លៃ មាសពេជ្រ ព្រះកោដ្ឋ​ដែលកសាងដោយសម្តេចព្រះនរោត្តម សីហនុ (ព្រះបរមរតនៈកោដ្ឋ) មានតម្លៃថ្លៃពុំអាច​កាត់​បាន ជាអាយុជីវិត ជា​ព្រលឹងមរតកនៃព្រះពុទ្ធសាសនា តំណាងឲ្យជាតិ និងអន្តរជាតិទូទៅនៃប្រទេសដែលកាន់​ព្រះពុទ្ធសាសនា។»

ព្រះអង្គក៏បានបញ្ជាក់ផងដែរថា ការបាត់វត្ថុដ៏មានតម្លៃរបស់ប្រទេសជាតិ ដែលបានរក្សាទុកនៅទីទួលខ្ពស់មួយ មាន​ទាំងចាក់សោ(មាំ)យ៉ាងមានសុត្ថិភាព ជាមួយនឹងសន្តិសុខយាមម្ភៃបួនម៉ោងលើម្ភៃបួនម៉ោង និងមិនតិចជាង២០នាក់​នោះ ហេតុអ្វីបានជាបាត់ទៅយ៉ាងងាយស្រួលបែបនេះ។ «អាត្មាមិនជឿថាចោរអំបុកចោរអំបែងអាចលួចកើតទេ (វា)​មានមេចោរ! (…) មេចោរប្រាដកណាស់ (វា)ពាក់ព័ន្ធជនដែលមានអំណាចណាមួយ ដែលទទួលបន្ទុកក្នុងកិច្ច​ការពារ​ថែរក្សា ឬ​អ្នក​មានអំណាចណាមួយផ្សេងទៀតៗ ដែលមិនមែនជាចោរធម្មតា។»

ព្រះអង្គបន្តរថាតាមមុខមាត់ចោរ ដែលចាប់មកនេះ ប្រសិនចោរមែន ក៏ជាចោរអំបុក ចោអំបែង ជាចោរលួចមាន់​ទាដែរ ដែលមិនអាចមានលទ្ធភាពឯណាទៅលួចព្រះសារីរិកធាតុដែលមានការការពារយ៉ាងតឹងតែងនោះ។ ព្រះអង្គ​បានបន្ថែមថា រាជរដ្ឋាភិបាលបានប្រកាសក្តែងៗថា បច្ចុប្បន្ននេះកម្ពុជាមានសុខសន្តិភាព តើហេតុអ្វីបានជាបាត់ក្នុង​អំឡុងពេលប្រទេសមានសុខសន្តិភាព គួណាស់តែបាត់យូរណាស់មកហើយ។

«វាបាត់ដោយងាយ រឿងអី(វា)រកឃើញដោយងាយ អាត្មាមិនជឿ។ (…) វាគួតែពិបាកនិងបាត់ព្រោះជាវត្ថុមានតម្លៃ មិនអាចប្រហែសធ្វេសបានទេ។ ចាក់សោរសុទ្ធតែលេខមួយ ពីរបីជាន់ ចោរធម្មតាណាហ៊ាននឹងលួច។ (…) ទាំងនេះ​មិនមែនជាចោរធម្មតាទេ ដូចជាចោរលួចក្បាលអ្នកតា លួចរួបចម្លាក់និងវត្ថុបុរាណផ្សេងៗទៀត សុទ្ធតែមានការពាក់​ព័ន្ធ​នឹងជនដែលមានអំណាច។»

ជាមួយគ្នានេះព្រះអង្គក៏បានធ្វើការប្រៀបធៀប សម្រាប់គិត និងពិចារណាថា ក្នុងពេលកន្លងមកមានការបាត់បង់​នូវ​ព្រះពុទ្ធរូបធំៗ ឧទាហរណ៍ជាក់ស្តែងក្នុងឆ្នាំ២០១០ ថ្មីៗនេះ នៅវត្តឧណ្ណាឡោម បានបាត់ព្រះពុទ្ធរូបមួយដ៏ធំ និងជា​វត្ថុដ៏មានតម្លៃតាំងពីបុរាណ ដែលមិនអាចលើកដោយមនុស្សម្នាក់ ឬពីរនាក់រួចនោះទេ ចាំបាច់ត្រូវប្រើឡានស្ទូចទើប​អាច​យកបាន ហេតុអ្វីបានជាបាត់ងាយៗពីក្នុងព្រះវិហារ។ មួយវិញទៀត រូបចម្លាក់ វត្ថុបុរាណ ដែលបានបាត់ចេញពី​ប្រាសាទនានាក្នុងខេត្តសៀមរាបជាដើម ពិសេសពីក្នុងវត្តបុរាណមួយ ដែលព្រះពុទ្ធរូបនោះទាល់តែមាន​ឡាន​មក​ស្ទូច ទើបអាចលើកបាន ហេតុអ្វីបានជាបាត់សូន្យ?

ជាមួយគ្នានៃការចាប់ខ្លួនបុគ្គលម្នាក់ ដែលអាជ្ញាធរមានសមត្ថកិច្ចចោទប្រកាន់ថា ជាចោរលួច ព្រះសារីរិកធាតុនេះ ព្រះអង្គក៏បានធ្វើការរម្លឹកថា «រឿងស្រុកខ្មែរកើតឡើងហើយតាំងពីឃាតករ សិប្បនិម្មិត ដីកាចោទចាប់សិប្បនិម្មិត និងមានរឿងរ៉ាវផ្សេងៗសិប្បនិម្មិតជាច្រើន។ រឿងអីត្រឹមតែប៉ុនហ្នឹង យើងមិនអាចជឿបានថា ជាចោរសិប្បនិមិត្ត​នោះ?»

ភាពធ្វេសប្រហែសរបស់រដ្ឋាភិបាល អាជ្ញាធរមិនយកចិត្តទុកដាក់ ការពារវត្ថុដ៏មានតម្លៃ ជាកេរ្តិ៍តំណែលរបស់ព្រះ​មហាវីរៈក្សត្រ និងរបស់សម្តេចព្រះសង្ឃរាជ ជួន ណាតនិងអតីតព្រះសង្ឃពីជំនាន់ និងជាវត្ថុទិព្វមួយតំណាង​ឲ្យ​សន្តិភាព សេរីភាព យុត្តិធម៌សង្គម ភាពត្រជាក់ត្រជុំនៃម្លប់ព្រះពុទ្ធសាសនា ដោយអហិង្សានិងសន្តិភាព។ ព្រះអង្គ​បានចាត់ទុកគម្រោងនៃការរៀបចំខាងលើនេះថា ដោយសារតែមានការថ្គោលទោសពីព្រះសង្ឃ ពុទ្ធបរិស័ទ ជនរួម​ជាតិខ្មែរទូទាំងពិភពលោក ជាមួយនឹងការខ្លាចបាក់មុខមាត់ក្នុងឆាកអន្តរជាតិផង អាជ្ញាធរឬរដ្ឋាភិបាល «អាចប្រឌិត» នូវភស្តុតាងមិនពិតក៏ថាបាន។

មកទល់នឹងពេលនេះ ទស្សនាវដ្តីមនោរម្យ.អាំងហ្វូ មិនអាចស្នើសុំប្រតិកម្មពីមន្រ្តីជាន់ខ្ពស់​នៃរដ្ឋាភិបាល​បាននៅ​ឡើយ ដោយហៅទូរស័ព្ទចូល តែគ្មានអ្នកលើក។ រួមដំណើរដោយមន្រ្តីជាន់ខ្ពស់​នគរបាលជាតិ និងមន្រ្តីពាក់ព័ន្ធ ព្រះសង្ឃនាយករងទីពីរសម្តេចព្រះពោធិវាំង អ៊ំ លឹមហេង និមន្តទៅត្រួតពិនិត្យ​គុណភាព ព្រះសុវណ្ណកោដ្ឋ និងព្រះ​សារីរិកធាតុ ព្រះអង្គបានបញ្ជាក់ថា ព្រះសុវណ្ណកោដ្ឋ និងព្រះបរម សារីរិកធាតុ​ពិតជានៅគង់វង្សដូចដើម មិនទាន់​មានការបាត់បង់នោះទេ។ នេះបើយោងតាមគេហទំព័រផ្លូវការ របស់អគ្គស្នងការ​ដ្ឋាននគរបាលជាតិ។

រីឯការបង្ហាញរបស់អាជ្ញាធរដែលបញ្ជាក់ថាចាប់បានជនចាប់ចោទ ដែលលួចព្រះសារីរិកធាតុនោះ​ព្រះតេជគុណ លួន សូវ៉ាត ក៏ស្នើសុំឲ្យមានការស៊ើបអង្កេត ស្រាវជ្រាវ ត្រួតពិនិត្យដោយសារធារណៈ ដោយឯករាជ្យ និងអព្យាក្រិត្រ។ តើពិត ឬមិនពិត្យ តើក្លែងក្លាយ ឬការពិតត្រូវបង្ហាញដល់សាធារណៈជនទូទៅ មិនមែនធ្វើ​គ្រាន់​តែ​ថតបង្ហាញ​បន្តិច​បន្តួច ហើយចប់នោះទេ។ «បើពិតមែនយើងទទួលស្គាល់ យើងអបអរសាទរ» ដោយការប្រៀប​ប្រដូចការបាត់ ព្រះ​សេរីរិកធាតុនេះ ទៅនឹងម្ជុលមួយបានធ្លាក់ចូលទៅក្នុងទឹកសមុទ្រ ដែលពិបាកនឹងរកឃើញនោះ ព្រះអង្គនៅតែ​បង្ហាញពីភាពគ្មានជំនឿថានោះជារបស់«ពិត»ដែរ។ តែបើពិតមែននោះវាជាសំណាងមួយ ក្នុង​ចំណោម​មួយលាន​របស់កម្ពុជា។

ព្រះអង្គមានសង្ឃដីការ ដោយភាពទោមនស្សថា «ក្នុងស្រុកខ្មែរ អ្វីក៏គេអាចប្រឌិតបានដែរ មិនទាន់មានអ្វីដែល​ពិត​មួយរយភាគរយ្យនោះទេ ដូចជាបូរណៈភាពទឹកដី ឯករាជ្យ អធិបតេយ្យភាព ក៏សិប្បនិម្មិតដែរ»។ បើសូម្បីតែ​ទូរទស្សន៍ វិទ្យុក្នុងស្រុក ក៏ផ្សាយតែរឿងបំភ្លៃ រឿងបំភ័នយកជាការ និងទុកចិត្ត​មិនបាន។ «រាល់ករណីមួយចំនួន​ដូច​ជា ការរំលោភសិទ្ធិ ការកាប់បំផ្លាញព្រៃឈើជាដើម មិនដែលឃើញផ្សាយទេ តែបើចែកអំណោយបន្តិចបន្តួច ដាំកូន​ឈើមួយដើមផ្សាយរាប់ភ្លេច»៕

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី៧ ខែកុម្ភៈ ឆ្នាំ២០១៤