សហជីព​នឹង​បន្ត​ធ្វើ​កូដកម្ម បើ​ទោះ​តុលាការ​ដោះលែង​ជន​ទាំង​២៣

សហភាពសហជីពកម្ពុជាបានអះអាងថា សហជីពរបស់ខ្លួន ជាមួយសហជីព និងសមាគមចំនួន៨ ផ្សេងទៀត នឹង​មិនបោះបង់ការទាមទារ​ ឲ្យដំឡើងប្រាក់ឈ្នួលគោល១៦០ដុល្លារដល់កម្មករនោះទេ ដរាបណាការទាមទារនោះ មិនទាន់បានសម្រេចជោគជ័យ និងបើទោះជាតុលាការសាលាដំបូងរាជធានីភ្នំពេញ ដោះលែងជនសង្ស័យ​ទាំង២៣​នាក់នោះក៏ដោយ។
Loading...
  • ដោយ: អ៊ុំ បូរី
  • កែប្រែចុងក្រោយ: February 07, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់


លោក រ៉ុង ឈុន (ខាងស្ដាំ) ឡើងលើដំបូលរថយន្ដ ថ្លែងទៅកាន់ក្រុមកម្មករ នៅមុខក្រសួងការងារ។ (រូបថត MONOROOM.info/ O.Vary)

វិបត្តិការងារ - លោក រ៉ុង ឈុន ប្រធានសហភាពសហជីពកម្ពុជា និងជាប្រធានសមាគមគ្រូបង្រៀនកម្ពុជាឯករាជ្យ បានថ្លែងប្រាប់ទស្សនាវដ្តីមនោរម្យ.អាំងហ្វូ នៅថ្ងៃទី០៦ ខែកុម្ភៈ នេះថា ក្រុមសហជីពទាំង៩ កំពុងរង់ចាំមើល​ការ​ជំនុំ​ជម្រះ លើជនទាំង២៣នាក់ ដោយសាលាតំបូងរាជធានីភ្នំពេញ នៅថ្ងៃទី១១ ខែកុម្ភៈ ខាងមុខនេះ។ ហើយ​ប្រសិន​បើ​តុលាការ សម្រេចដោះលែងជនទាំង២៣នាក់នោះឲ្យមានសេរីភាព វាគឺជារឿងត្រឹមត្រូវមួយ និងគួរតែអបអរ​សាទរ។

ប្រធានសហភាពសហជីពកម្ពុជាដដែលនេះបន្តថា ចំពោះការទាមទារប្រាក់ឈ្នួលគោល១៦០ដុល្លារដល់កម្មករ មិន​មានពាក់ព័ន្ធនឹងជនទាំង២៣នាក់នោះទេ។ មានន័យថា ខាងសហជីពមិនបោះបង់ការទាមទារនោះទេ បើទោះជា​តុលាការសម្រេចចំពោះជនទាំង២៣នាក់នោះយ៉ាងម៉េចក៏ដោយ ហើយចរន្តទាមទារប្រាក់ឈ្នួលជាថ្មីនេះ នឹងនៅតែ​បន្តជាមួយនឹងទ្រង់ទ្រាយធំជាងមុនទៅទៀត។

ជាមួយគ្នានេះ លោក ប៉ាវ ស៊ីណា ប្រធានសហព័ន្ធសហជីពកម្មករ ដែលជាសហជីពមួយក្នុងចំណោមសហជីពទាំង៩ ក្នុងកិច្ចប្រជុំ នៅមជ្ឈមណ្ឌលអប់រំច្បាប់សម្រាប់សហគមន៍ នៅថ្ងៃនេះ បានបញ្ជាក់ថា៖ «យើងមិនដែលបោះបង់ការ​បេ្តជ្ញារបស់យើងទេ។ រហូតមកដល់ថ្ងៃនេះ ពុំទាន់មានសញ្ញាវិជ្ជមានណាមួយពីរដ្ឋាភិបាល ក៏ដូចជាអ្នកបញ្ជា​ទិញនោះ​ទេ ជុំវិញការរកដំណោះស្រាយរឿងប្រាក់ខែ។ ដូច្នេះយើងជំរុញ ឲ្យមានការជជែកគ្នាជាថ្មី។»

គួររំលឹកដែរថា កាលពីដើមខែមករា ឆ្នាំ២០១៤ នៅរោងចក្រយ៉ាកជីង និងចំណុចមុខសួនឧស្សាហកម្មកាណាឌីយ៉ា ផ្លូវ​វេងស្រេង លើទឹកដីរាជធានីភ្នំពេញ សមត្ថកិច្ចគ្រប់គ្រងដោយរដ្ឋាភិបាលគណបក្សប្រជាជនកម្ពុជា ក្រោម​ហេតុ​ផល​រក្សាសន្តិសុខ និងសណ្តាប់ធ្នាប់សាធារណៈ បានធ្វើការបង្រ្កាបយ៉ាងចាស់ដៃលើកម្មករដែលធ្វើកូដកម្ម និង​បដិសធ​ប្រាក់ឈ្នួលគោល១០០ដុល្លារ ដែលសម្រេចដោយភាគីរដ្ឋាភិបាល និងភាគីនិយោជក ខណៈបាតុករ​ចង់​បាន​ប្រាក់ឈ្នួលគោល១៦០ដុល្លារ។ ក្រោយការបង្រ្កាបយ៉ាងហិង្សានោះ ក្រសួងមហាផ្ទៃ និងសាលារាធានីភ្នំពេញ បាន​ដាក់កំហិត មិនអនុញ្ញាតឲ្យមានការជួបជុំ ឬធ្វើកូដកម្ម ទាមទារប្រាក់ឈ្នួល បន្តទៀតទេ រហូតដល់ស្ថានការណ៍​មាន​ភាពល្អប្រសើរឡើងវិញ៕

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី០៦ ខែកុម្ភៈ ឆ្នាំ២០១៤

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...