ចាប់ពីថ្ងៃស្អែកនេះ សាលារាជធានីភ្នំពេញ នឹងដាក់អោយប្រើប្រាស់សាកល្បង នូវសេវារថយន្តក្រុងសាធារណៈ នៅលើមហាវិថីព្រះមុនីវង្ស រយៈពេលមួយខែ។ ប្រសិនបើការសាកល្បងនេះ ទទូលបានជោគជ័យ សេវានេះនឹង​ជួយសម្រួលដល់ការធ្វើដំណើររបស់ប្រជាពលរដ្ឋ ជាពិសេសគឺការកកស្ទះចរាចរណ៍។

គំនូសនៅលើទ្រូងថ្នល់ សំគាល់ពីចំណតឈប់មួយភ្លែតៗ របស់រថយន្ដក្រុង។ (រូបថត ឯកសារ)

សេវាសាធារណៈ - សាលារាជធានីភ្នំពេញ នឹងដាក់សម្ពោធឲ្យប្រើប្រាស់ សេវាកម្មរថយន្តក្រុង​សាធារណៈ​សាក​ល្បងនៅលើមហាវិថីព្រះមុនីវង្ស។ ក្រោមកិច្ចសហការរវាងសាលារាជធានីភ្នំពេញ និងទីភ្នាក់ងារសហប្រតិបត្តិការ​អន្តរជាតិជប៉ុន(JICA) ឲ្យដឹងថា រថយន្តក្រុងសាធារណៈ នឹងដំណើរការសាកល្បងរយៈពេល១ខែ លើកំណាត់ផ្លូវ​មួយខ្សែប្រវែងប្រហែល ៧,៥គីឡូម៉ែត្រ ចាប់តាំងពីរង្វង់មូលស្តាតចាស់ លើបណ្តោយមហាវិថីព្រះមុនីវង្ស រហូតដល់​ផ្សារច្បារអំពៅនិងត្រលប់វិញ តាមទិសដៅដដែល។

រថយន្តក្រុង១០គ្រឿងនឹងត្រូវបានដាក់អោយសាកល្បង ក្នុងរយៈពេលមួយខែនេះ ចាប់ផ្តើមពីថ្ងៃទី៥ ខែកុម្ភៈ ស្អែក​នេះ ដល់ថ្ងៃទី៤ ខែមីនា ឆ្នាំ២០១៤។ ចំណតរងចាំមាន៣៦ ចំណត គឺចាប់ពីចំណតរង់ចាំរង្វង់មូលស្តាតចាស់ រហូត​ដល់គល់ស្ពានច្បារអំពៅ។

ចំពោះតម្លៃសម្រាប់មនុស្សម្នាក់ គឺ១៥០០រៀលក្នុងមួយជើង។ ចំណុះ រថយន្តក្រុងសាធារណៈ ១គ្រឿង អាចផ្ទុកអ្នក​ដំណើរបាន ចន្លោះពី៥០នាក់ ទៅ៦០នាក់ សម្រាប់ការអង្គុយ និងឈរ។ រីឯសេវាដឹកអ្នកដំណើរ នឹងចាប់ផ្តើមពី​ម៉ោង៥និង៣០នាទីព្រឹក ដល់ម៉ោង៨និង៣០នាទីយប់។

ទាក់ទិននិងបញ្ហានេះដែរ លោក អឹម ផល្លា ប្រធានក្រុមហ៊ុន ប្រឹក្សាយោបល់ផ្នែកវិនិយោគ បានអោយដឹងថា «បើ​ការធ្វើទៅទទួលបានជោគេជ័យ វានឹងផ្តល់ប្រយោជន៍ដល់សង្គម ក្នុងកាត់បន្ថយនូវការស្ទះចរាចរណ៍ និងគ្រោះថ្នាក់​ចរាចរណ៍ ។ ហើយវាក៏នឹងជួយសម្រួលចរាចរណ៍បានច្រើន ពីការប្រើប្រាស់យានយន្តច្រើន ប្តូរមកប្រើប្រាស់​ឡាន​តែមួយ។»

កាលពីប៉ុន្មានឆ្នាំមុន កម្ពុជាបានដាក់ឲ្យប្រើប្រាស់សេវានេះម្តងរួចមកហើយ តែបរាជ័យទៅវិញ ដោយសារ​ការមិន​ចាប់អារម្មណ៍ ពីអ្នកធ្វើដំណើរ និងកង្វះខាតជំនួយ ។ ជុំវិញបញ្ហានេះដែរ អ្នកជំនាញផ្តល់ប្រឹក្សា​ផ្នែកវិនិយោគ​រូប​នេះ​បានបញ្ជាក់ថា ដើម្បីអោយសេវាកម្មនេះទទួលបានជោគជ័យ រឿងសំខាន់ដែលគួរយកចិត្តទុក​ដាក់នោះ គឺតម្លៃនៃ​ការប្រើប្រាស់ ពេលវេលា និងភាពងាយស្រួល។

លោកបានកត់សម្គាល់ទៀតថា «កាលពីលើកមុនយើងមិនមានឡានក្រុងទេ ធ្លាប់តែជិះម៉ូតូឌុប ឬក៏តុក តុក ដែលវា​អាចទៅកន្លែងណា ឬពេលណាក៏បានដែរ ហើយតម្លៃវាអាចប្រែប្រូលទៅតាមការចរចា ដែលធ្វើអោយប្រជាពលរដ្ឋ​មានភាពងាយស្រួល។ តែចំពោះឡានក្រុងវិញវាមានពេលវេលាកំណត់ និងទីកន្លែងជាក់លាក់របស់វា ហើយ​អញ្ចឹង​ហើយ ទើបវាមិនអាចបត់បែនទៅតាមចិត្តរបស់អ្នកប្រើប្រាស់បាន។»

មានតែពេលវេលាទៅមុខប៉ុណ្ណោះ ដែលអាចឆ្លើយនឹងសំនួរខាងលើនេះបាន។ សំនួរដែលអ្នកគ្រប់គ្រង​សេវាកម្ម​មួយនេះ គួរតែចោទសួរខ្លួនឯងដែរ ថារថយន្ដក្រុងចេញដំណើរញឹកញាប់ឆ្លើយតបនឹងតម្រូវការ មានចំណត​រងចាំ​ច្រើននិងផ្ដល់ភាពងាយស្រួលដល់ការរងចាំ ​និងថា​តើតម្លៃនៃការ​ប្រើប្រាស់ សមរម្យទៅនិងលទ្ធភាព​របស់​អតិជន​ដែរឬយ៉ាងណា?

-----------------------------------------------
ដោយ ក. ចាន់នីតា (ទំនាក់ទំនង៖ [email protected] ) -ភ្នំពេញ ថ្ងៃទី ០៤ ខែកុម្ភៈ ឆ្នាំ២០១៤