ខ្សែប្រយុទ្ធប៊ុលការី ឌីម៉ីតា ប៊ើប៉ាតូវ នៅជាមួយក្លឹប ម៉ូណាកូ រហូតចប់រដូវកាល
ខ្សែប្រយុទ្ធសញ្ជាតិប៊ុលការី ឌីម៉ីតា ប៊ើប៉ាតូវ (Dimitar Berbatov) របស់ក្លឹប ហ្វូលហាម (Fulham) បានសម្រេចចូលរួមជាមួយក្លឹបអ្នកមាននៅ លីកអង (League 1) របស់បារាំងឈ្មោះ ម៉ូណាកូ (Monaco) ក្នុងលក្ខណៈខ្ចីជើងរហូតដល់ចប់រដូវកាលថ្មីនេះ។
កីឡាករខ្សែប្រយុទ្ធសញ្ជាតិប៊ុលការី ឌីម៉ីតា ប៊ើប៉ាតូវ។ (រូបថត metro.co.uk)
បាល់ទាត់បារាំង - កីឡាករវ័យ ៣៣ ឆ្នាំរូបនេះ ត្រូវបានសាព័ត៌មាន ប៊ីប៊ីស៊ី ស្ពត (BBC Sports) បានឲ្យដឹងថា កិច្ចសន្យារបស់គេជាមួយក្លឹប នឹងងបញ្ចប់នៅចុងរដូវកាលនេះ ហើយបានបង្ហាញខ្លួនឲ្យក្រុម ហ្វូលហាម ១៩ លើកនារដូវកាលនេះ រកបាន ៥ គ្រាប់ផងដែរ។
កីឡាករខ្សែរប្រយុទ្ធរូបនេះ បានថ្លែងឲ្យដឹងផងដែរថា «ខ្ញុំអាចនឹងចូលរួមជាមួយក្លឹបចាស់របស់ខ្លួន តូលតេនហាម ហ៊តស្ពើ (Tottenham Hotspur) ប៉ុន្ដែពេលនេះ ត្រូវបានចូលរួមជាមួយក្លឹប នៅលីកលំដាប់កំពូលរបស់បារាំងវិញ»។
ក្លឹប ម៉ូណាកូ កំពុងមានវិបត្តិផ្នែកខ្សែប្រយុទ្ធ ខណៈពេលដែលកីឡាករខ្សែប្រយុទ្ធតម្លៃខ្លួនខ្ពស់របស់ក្លឹប រ៉ាដាម៉េល ហ្វាលឃូ (Radamel Falcao) របួសជង្គង់ធ្ងន់ធ្ងរ ដែលអាចនឹងអវត្តមានរហូតដល់ចប់រដូវកាល និងបន្ដអវត្តមានរហូតដល់ វើលខាប់ (World Cup) នៅប្រេស៊ីលទៀតផង បន្ទាប់ពីការវះកាត់រួចកីឡាកររូបនេះមានសង្ឃឹមជាសះស្បើយទាន់ពេលតែ ៥០% ប៉ុណ្ណោះ។
ចំណែកឯក្លឹប ហ្វូលហាម ក៏យល់ព្រមឲ្យកីឡាករ ប៊ើប៉ាតូវ ចាកចេញទៅចូលរួមជាមួយក្លឹបនៅលីកលំដាប់កំពូលរបស់បារាំង ក៏ដោយសារតែក្លឹបទើបនឹងទិញបាន កីឡាករខ្សែបម្រើជម្រើសជាតិក្រិច ខុនទែនទីនូស ម៊ីទ្រូហ្លូ (Konstantinos Mitroglou) ក្នុងតម្លៃផ្ទេរប្រមាណជា ១១ លានផោន៕
--------------------------------------
ដោយ វ៉ន ដារ៉ា (ទំនាក់ទំនង៖ [email protected]) - ភ្នំពេញ ថ្ងៃទី០២ ខែកុម្ភះ ឆ្នាំ២០១៤