«ជាការបង្ហាញរឿងឯកជន ដែលមិនត្រូវពេល និងមិនចេះគិតវែងឆ្ងាយ» នេះជាការឧទានឡើងរបស់​ពលរដ្ឋដើម​កំណើតខ្មែរមួយរូប ពីក្នុងចំណោមពលរដ្ឋមួយចំនួនទៀតរស់នៅក្នុងប្រទេសបារាំង ដែលបានរិះគន់ការកំសាន្ដ​ជិះ​«ស្គី»របស់លោក សម រង្ស៊ី នៅប្រទេសស្វីស។

រូបភាពផ្តិតចេញពីវីដេអូមួយ ដែលបង្ហាញថា លោក សម រង្ស៊ី កំពុងជិះស្គីយ៉ាងរំភើយនៅលើភ្នំទឹកកក ក្នុងប្រទេស​ស្វីស។

នយោបាយកម្ពុជា - ការធ្វើកីឡា ជារឿងមួយចាំបាច់ណាស់សម្រាប់មនុស្សគ្រប់រូប។ រីឯការជិះស្គី ក៏ជាកីឡា​មួយ​ដែរ។ តែផ្ទុយទៅវិញ ការជិះស្គីថតដាក់ផ្សាយក្នុងទំព័រហ្វេសប៊ុកផ្លូវការ របស់ប្រធានគណបក្សសង្គ្រោះជាតិ លោក សម រង្ស៊ី មិនត្រូវបានចាត់ទុកជាការធ្វើកីឡាធម្មតានោះទេ បែជាត្រូវបានពលរដ្ឋដើមកំណើតខ្មែរមួយចំនួន ដែល​រស់នៅ​ក្នុង​ប្រទេសបារាំង ពេបជ្រាយនិងធ្វើការរិះគន់ ថាជាការបង្ហាញឲ្យគេដឹង ពី«ការកំសាន្ដបែបឯកជនមួយ​ដែល​មិន​ត្រូវ​ពេល»។

នៅក្នុងកាលៈទេសៈមួយដ៏ពិបាក ដូចជាអនុប្រធានរបស់ខ្លួន លោក កឹម សុខា បានរងនូវការគម្រាមសម្លាប់ និង​ក្រុមបាតុករប្រឆាំងក្នុងស្រុកជាច្រើន បានរងនូវការបាញ់សម្លាប់ និងវាយឲ្យរបួសហូរឈាម ប៉ុន្តែគេបានឃើញ​មេបក្សប្រឆាំង បានចេញទៅកំសាន្ដស្គីនិងថែមទាំងបានថតរូប ផ្ដិតជាវីដេអូ ដាក់បង្ហាញបង្អួតគេឯងថែមទៀត។ នោះគឺជាការិះគន់ដោយចំៗ ទៅកាន់ប្រធានគណបក្សសង្គ្រោះជាតិ លោក សម រង្ស៊ី ដោយពលរដ្ឋមួយរូប មក​ពី​ទីក្រុងលីយ៉ុង (Lyon) ឈ្មោះ ថេត សារឿន នៅក្នុងប្រតិកម្មមួយធ្វើមកកាន់ទស្សនាវដ្ដីមនោរម្យ.អាំងហ្វូ ដែល​មាន​ទីស្នាក់ការនៅក្នុងរដ្ឋធានីប៉ារីស។ ពលរដ្ឋដែលជាអ្នកគាំទ្រគណបក្សសង្គ្រោះជាតិមួយរូបដែរនេះ បាន​និយាយ​ទៀតថា «នៅក្នុងដំណាក់កាលនេះ លោកប្រធាន គប្បីសម្ដែងកាយវិការជាសាធារណៈ ដោយចូលរួម​ឈឺ​ឆ្អាល ឬ​ការកាន់ទុក្ខ ឬសាមគ្គីភាព ជាមួយជនរងគ្រោះនៅប្រទេសកម្ពុជា ជៀសជាងការបង្ហាញរូបភាពលំហែកំសាន្ដ»។

ពលរដ្ឋដើមកំណើតខ្មែរមួយរូបទៀត អ្នកស្រី អៀរ វណ្ណថា រស់នៅតំបន់វាល់ដ័ស៍ (Val-d'Oise) ជាយរដ្ឋធានីប៉ារីស បានថ្លែង​បញ្ជាក់ដែរថា «លោក សម រង្ស៊ី ត្រូវតែមានពេលវេលាឯកជនរបស់លោក ដើម្បីធ្វើកីឡា សម្រាកកំសាន្ដឬ​លំហែ។ ប៉ុន្តែប្រសិនបើសកម្មភាពណាមួយ មិនបានផ្ដល់រូបល្អដល់រូបលោក និងនយោបាយរបស់លោកទេ មិន​គួរ​ត្រូវ​យក​មកបញ្ចេញផ្សាយជាសាធារណៈយ៉ាងដូច្នេះទេ។ ការជិះស្គី នៅទីនេះ (ក្នុងប្រទេសបារាំង) គេមិនមែនចាត់​ទុក​ត្រឹម​តែជាកីឡាធម្មតានោះទេ តែវាក៏ជាការលំហែកាយមួយ របស់ក្រុមអ្នកមានៗដែរច៎ា។»

ការរិះគន់របស់ក្រុមពលរដ្ឋទាំងនេះ បានធ្វើឡើងបន្ទាប់ពីមេបក្សប្រឆាំង បានធ្វើដំណើរទៅចូលរួម​បាតុកម្មរបស់​ក្រុមអ្នកគាំទ្ររបស់លោកនៅក្រៅប្រទេស នៅមុខឧត្ដមស្នងការសិទ្ធិមនុស្សនៃអង្គការសហប្រជាជាតិ នាទីក្រុង​ហ្សឺណែវ ប្រទេសស្វីស ខណៈពេលដែលមានការរៀបចំធ្វើសន្និសីទដ៏ធំមួយ ស្ដីពីសិទ្ធិមនុស្សនៅកម្ពុជា។ ក្នុង​រយៈពេលស្នាក់នៅទីនោះ ថ្ងៃទី២៩ ខែមករា ឆ្នាំ២០១៤ លោក សម រង្ស៊ី បានឆ្លៀតឱកាសពីការចូលរួមបាតុកម្ម និងការចូលរួមសន្និសីទ ដើម្បីទៅជិះកំសាន្ដ«ស្គី» ជាមួយនឹងគ្រួសារខ្មែរមួយដែលរស់នៅក្នុងតំបន់នោះដែរ។ រូប​ថតរបស់លោកជាមួយនឹងស្នាមញញឹមបន្ដិចផង ដែលបានចុះផ្សាយនៅលើទំព័រហ្វេសប៊ុកផ្លូវការរបស់លោក បាន​សរសេរជាអក្សរអមថា «ខ្ញុំជិះស្គីលើទឹកកក ជាមួយ​គ្រួសារខ្មែរមួយ (...)»។

នៅលើទំព័រហ្វេសប៊ុកផ្លូវការ របស់មេដឹកនាំប្រឆាំងមួយនេះ មិនមែនមានតែរូបលេងស្គីមួយនេះប៉ុណ្ណោះទេ តែអ្នក​តាមដានទំព័ររបស់លោក ឧស្សាហ៍ឃើញលោក សម រង្ស៊ី ចូលចិត្តយករូបថតឯកជនរបស់លោកជាច្រើនមកចុះ​ផ្សាយជាសាធារណៈណាស់ ដូចជានៅពេលលោកពត់ខ្លួន ហែលទឹក រត់ចម្ងាយ លោតឆ្លងប្រឡាយទឹក ជាដើម។

ការចុះផ្សាយនូវរូបភាពទាំងនេះ មិនមែនគ្មានមូលហេតុ ឬអត់មានប្រយោជន៍នោះទេ។ ជារឿយៗ ក្រុមអ្នកគាំទ្រ​លោក សម រង្ស៊ី និងគណបក្សសង្គ្រោះជាតិ នៅក្នុងបណ្ដាញសង្គមហ្វេសប៊ុក តែងយក​សកម្មភាពរបស់ប្រធាន​គណបក្ស​ប្រឆាំងរូបនេះ ទៅផ្គូរផ្គងជាមួយនឹងដៃគូរបដិបក្ខនយោបាយ លោក ហ៊ុន សែន ដែលកំពុងកាន់អំណាច​ជិត៣០ឆ្នាំក្នុងប្រទេសកម្ពុជា។ ក្រុមអ្នកគាំទ្រ បានធ្វើការប្រៀបធៀបថា លោក សម រង្ស៊ី ជាបញ្ញាជនមានជីវិត​សមញ្ញ ចេះធ្វើ​កីឡាគ្រប់យ៉ាង និងមានសុខភាពកាយសម្បទារមាំមួន សក្ដិសមនឹងក្លាយជាមេដឹកនាំបាន ខណៈ​លោក ហ៊ុន សែន មេដឹកនាំ​ចាស់​វស្សា ត្រូវបានគេយករូបភាពមកដាក់ក្បែរ ដែលមានលក្ខណៈទប់ខ្លួន​ដោយមាន​ជំនួយពីក្រុមអង្គរក្ស​ជាដើម។

អ្នកស្រី អៀរ វណ្ណថា ដែលជាអតីតសាស្ត្រាចារ្យមួយរូប ពីវិទ្យាល័យមួយក្នុងរាជធានីភ្នំពេញផងនោះ បានពន្យល់​ទៀតថា «ការបង្ហាញថា ខ្លួនចេះលេងស្គី ដាក់រូបបង្អួតគេឯង មិនបានធ្វើឲ្យ សម រង្ស៊ី មានប្រៀបជាង ហ៊ុន សែន នោះទេច៎ា។ ខ្ញុំឃើញរូបនេះហើយ ខ្ញុំចង់សើច (...)។ ផ្ទុយទៅវិញ បើវិភាគឲ្យជ្រៅ វាបានបង្ហាញពីរូបភាពជាអភិជន របស់អ្នកលេងស្គីនោះ មកសប្បាយធ្វើវាហី ដែលខុសឆ្ងាយពីនយោបាយរបស់ សម រង្ស៊ី។ នយោបាយ ដែល​គណបក្សលោកស្រែកថា នៅជិត សង្គ្រោះ និងការពារអ្នកតូចទាប ខ្សត់ខ្សោយនោះ។»

មកដល់ពេលនេះ ទស្សនាវដ្ដីមនោរម្យ.អាំងហ្វូ នៅមិនទាន់ទទួលបានប្រតិកម្មពីមន្ត្រីគណបក្សសង្គ្រោះជាតិ សាខា​ប្រទេសបារាំង​ណាម្នាក់នៅឡើយ។

យ៉ាងណាក៏ដោយ ក៏ពលរដ្ឋម្នាក់ទៀត លោក ហ្វ្រង់ស៊័រ សេង ពីទីក្រុងម៉ុងពើលីយ៉េ (Montpellier) ស្ថិតនៅផ្នែក​ខាងត្បូងនៃ​ប្រទេសបារាំង បានថ្លែងយោគយល់ប្រធានគណបក្សរូបនេះ ថាជាការឆ្លៀតឱកាសដើម្បីដកដង្ហើម។ លោកយល់​ស្របទៀតថា គេគួរបានមេដឹកនាំដែលមិនសូវចេះលាក់ មានតម្លាភាពដូចលោក សម រង្ស៊ី ជៀសជាង​មេដឹកនាំ​ដែលលួចលាក់ស្ថាត់ៗ តែបក្សពួកខ្លួន។

ពលរដ្ឋដើមកំណើតខ្មែរ អាយុជាង៥០ឆ្នាំរូបនេះ បានថ្លែងផ្ដល់យោបល់ឲ្យលោក សម រង្ស៊ី ថាត្រូវតែ​ធ្វើខ្លួន​ជា​បុគ្គល​«ឥតខ្ចោះ»​បន្ថែមទៀត ដោយសារតែលោកមានភារកិច្ចដ៏ធ្ងន់មួយ សម្រាប់ប្រទេសកម្ពុជា។ ជា​ពិសេស លោក សម រង្ស៊ី ខ្លួន​លោកត្រូវស្ថិតនៅពីមុខចលនាតស៊ូ«មតិ»មួយ ដែលគ្រប់គ្នានរណាៗ ចាំមើលតែរូប​លោក​ប៉ុណ្ណោះ។ លោក ហ្វ្រង់ស៊័រ បានបន្ថែមថា «បន្ទាប់ពីព្រឹត្តិការណ៍បង្ក្រាបយ៉ាងឃោឃៅរបស់ហ៊ុន សែន លើ​បាតុករ​បាតដៃទទេពី​ពេល​កន្លងមក ដំណើរចេញក្រៅប្រទេសរបស់ សម រង្ស៊ី ត្រូវបានខ្មែរពេញពិភពលោកទន្ទឹង​រងចាំថា នឹងមានលទ្ធផល​មួយពីបេសកកម្មរដោះជាតិរបស់មេដឹកនាំមួយនេះ ចេញពីកណ្ដាប់ដៃយួនឈ្លានពាន ដេញ ហ៊ុន សែន ចេញពី​អំណាច។ ប៉ុន្តែគ្មាន​នរណាម្នាក់គិតសូម្បីបន្តិចថា សម រង្ស៊ី ចេញមកក្រៅប្រទេស ដើម្បីជិះស្គីថតរូប​ដាក់​ហ្វេសប៊ុក​នោះឡើយ៕»

------------------------------------------------------
ដោយ សេក មនោរកុមារ (ទំនាក់ទំនង៖ [email protected]) - ភ្នំពេញ ថ្ងៃ០១ ខែកុម្ភះ ឆ្នាំ២០១៤