នៅថ្ងៃបុណ្យចូលឆ្នាំចិននិងវៀតណាមឆ្នាំ២០១៤នេះ នៅភ្នំពេញមានសភាពស្ងាត់ ទាំងចរាចរណ៍ អាជីវកម្ម​លក់ដូរ​ស្ងាត់ជាងរាល់​ថ្ងៃ ដោយសារអាជីករមួយចំនួនបានបិទតូបសម្រាក និងមួយចំនួនទៀតបានឈប់សម្រាកពីការសិក្សា និងធ្វើការងារដើម្បី​ទៅ​ប្រារព្ធពិធីចូលឆ្នាំចិន វៀតណាមនៅតាមខេត្ត។

ភាពស្ងប់ស្ងៀមនៅទីក្រុងភ្នំពេញ នាពេលចូលឆ្នាំប្រពៃណីចិន-វៀតណាម។ (រូបថត newtonthecat)

រដូវបុណ្យទាន - នៅរដូវបុណ្យចូលឆ្នាំចិន តាមស្ថាប័ននិងហាងលក់ដូរឬកន្លែងលក់ដូរ មិនតំរូវអោយឈប់​សម្រាក​នោះទេ តែក្រុមហ៊ុនឯកជន ហាងទំនិញធំៗ ឬកន្លែងលក់ដូរមួយចំនួន ដែលមានថៅកែជាប់ខ្សែស្រឡាយចិន និង​វៀតណាមបាន​សម្រេចចិត្ត បិទទ្វារមិនធ្វើអាជីវកម្មឡើយក្នុងអំឡុងពេលនេះ ដើម្បីអបអរនិងប្រារព្ធពិធីបុណ្យនេះ។

កញ្ញាធីតា ជាអាជីករនៅផ្សារច្បារអំពៅបានអោយដឹងនៅថ្ងៃនេះ តូបអាជីវកម្មនៅផ្សារច្បារអំពៅបានបិទទាំងអស់។ រីតូបរបស់កញ្ញាវិញបានបិទមិនលក់ថ្ងៃនេះ និងថ្ងៃស្អែក ហើយខានស្អែកនឹងដំណើការលក់ធម្មតាវិញ ហើយ​សំរាប់​តូបលក់ដូរផ្សេងវិញខ្លះបិទលក់បីបួនថ្ងៃ និងអ្នកខ្លះស្អែកនេះដំណើរការធម្មតាវិញ។

អាជីវករដែលមានខ្សែរស្រលាយកាត់វៀតណាមរូបនេះ បានបញ្ជាក់ថែមទៀតថា «មូលហេតុដែល​ខ្ញុំបិទតូបមិន​លក់​ពីរថ្ងៃនេះ ដោយសារពួកយើងបានហត់នឿយពេញមួយឆ្នាំហើយ ហើយយើងចង់សម្រាកខ្លះ»។

ការកត់សម្គាល់ឃើញថាមិនមែនតែក្រុមហ៊ុន ឬទីផ្សារទេដែលមិនសូវមានមនុស្សច្រើនធ្វើការ និងលក់ដូរនោះ នៅ​តាមគ្រឹះសា្ថនអប់រំរដ្ឋ និងឯកជននានាក៏មិនមានវត្តមានសិស្ស និងនិស្សិតដែរនៅថ្ងៃនេះ ដោយសិស្សមួយ​ចំនួន​បាន​ឈប់សម្រាកសែនព្រេន និង សិស្សមួយចំនួនទៀតបាននាំគ្នាទៅស្រុកកំណើត។ រីឯមន្ត្រីរាជការមួយចំនួនធំ​ក៏មិន​ទៅក្រសួងរបស់ខ្លួនដែរ ព្រោះតែរវល់ជាប់សែនព្រេនបុណ្យប្រពៃណីរបស់ចិន និងវៀតណាម។

កញ្ញា ឡេង សៀវលី ជានិស្សិតនៅសាកលវិទ្យាល័យភូមិន្ទនិតិសាស្រ្តនិងវិទ្យាសាស្រ្តសេដ្ឋកិច្ច ដែលមានស្រុក​កំណើតនៅខេត្តបាត់ដំបងនោះ បានប្រាប់ទស្សនាវដ្តីមនោរម្យ.អាំងហ្វូ ថាជារៀងរាល់ឆ្នាំអោយតែ​ដល់បុណ្យ​ចូលឆ្នាំ​ចិន កញ្ញាតែងមកស្រុកកំណើត ដើម្បីជូបជុំបងប្អូនព្រោះមួយឆ្នាំមានតែម្តង។ និសិត្សរូបនេះបានប្រាប់​ទៀត​ថា «សំរាប់​ខ្ញុំដែលមានខ្សែស្រលាយចិន ការមកស្រុកកំណើតដើម្បីសែនព្រេនជារឿងសំខាន់ ព្រោះមួយឆ្នាំមានតែម្តង។ ម្យ៉ាងនៅពេលដែលម៉ាក់របស់ខ្ញុំបានស្លាប់អញ្ចឹង អត់មានអ្នកណាជួយរៀបចំប្រដាប់ប្រដាសែនទេ ដូច្នេះខ្ញុំ​ត្រូវតែមក​ជួយគ្រួសារក្នុងការរៀបចំ។»

ចំណែកស្ថានភាពចរាចរណ៍នៅក្នុងទីក្រុងភ្នំពេញ ក្នុងថ្ងៃធ្វើពិធីបុណ្យនេះ ក៏មានសភាពស្ងប់ស្ងាត់ជាងសព្វដង ដោយមនុស្សមួយចំនួនជាប់រៀបចំពិធីសែនព្រេន អ្នកខ្លះបានចាកចេញទៅជួបជុំបងប្អូននៅស្រុកកំណើត មួយចំនួន​ទៀតទៅកំសាន្តតាមបណ្តាខេត្តនានា ឬទៅកម្សាន្តទៅឯបរទេស។

តែផ្ទុយទៅវិញ បើទោះបីជាតូបក្នុងផ្សារភាគច្រើនត្រូវបានបិទ តែអាជីវករដែលនៅលក់ម្ហូបអាហារ នំ និងផ្លែឈើ​សម្រាប់​សែនព្រេនមួយចំនួន នៅតែមានដំណើរការដូចធម្មតា ដោយសារតែពួកគាត់យល់ថា ថ្ងៃនេះវានឹងធ្វើឲ្យ​ពួក​គាត់មាន​ចំណូលច្រើនជាងធម្មតា៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected] ) -ភ្នំពេញ ថ្ងៃទី ៣០ ខែមករា ឆ្នាំ២០១៤