ប្រភពច្បាស់ការណ៍មួយបានបង្ហើបថា បុរសម្នាក់ក្នុងឯកសណ្ឋានជាសន្តិសុខ ដែលបានលោតវាយក្បាល លោក សុខ នី អ្នករត់ម៉ូតូឌុប នៅមុខក្រសួងព័ត៌មានថ្ងៃទី២៧ ខែមករានោះ ជាមនុស្សតែ«មួយ»នឹងជនប្រដាប់ដោយ ចម្ពាមកៅស៊ូគ្រាប់ដែក ដែលត្រូវបានប្រជាពលរដ្ឋ និងតំណាងសហជីពកម្មករឃាត់ខ្លួនកាលពីថ្ងៃទី២៦ ខែមករា ជិតក្បាលនាគលើផ្លូវនរោត្តម។ ជនសង្ស័យដែលស្ថិតនៅក្នុងក្រុមពិសេស ជួលនិងគ្រប់គ្រងបញ្ជាដោយសាលា​រាជធានីភ្នំពេញ។

លោក ហាំ ហ៊ុត ជនសង្ស័យប្រដាប់ដោយជំពាមកៅស៊ូគ្រាប់ដែក និងស្នាប់ដៃ នៅពេលត្រូវក្រុមពលរដ្ឋ និងកម្មករ ចាប់ឃាត់ខ្លួន នៅស្ពាននាគថ្ងៃទី២៦ ខែមករា ឆ្នាំ២០១៤។ (រូបថត MONOROOM.info/ O.Vary)

វិបត្តិសង្គម - ព្រឹត្តិការណ៍ថ្ងៃទី២៧ ខែមករា ត្រូវបានចារទុកក្នុងលទ្ធផលថ្មីមួយទៀត នៃការប្រព្រឹត្តិដ៏ហិង្សា​ពី​សំណាក់កងអាជ្ញាធរ។ ព្រឹត្តិការណ៍ដែលត្រូវបានកត់ចំណាំទុកដោយ ការវាយសន្ធាប់យ៉ាងឃោឃៅ ដោយមនុស្ស​មួយក្រុមគ្នាជិតដប់នាក់ ក្នុងឯកសណ្ឋានស៊ីវីល និងជនម្នាក់ទៀតក្នុងឯកសណ្ឋានជាសន្តិសុខ ទៅលើបុរសអ្នក​រត់ម៉ូតូឌុបម្នាក់ឈ្មោះ សុខ នី រហូត«ហូរ»ឈាមដាបមុខ។ ជនឯកសណ្ឋានស៊ីវិល និងសន្តិសុខ តែមានពាក់មួកបិទ​មុខជិត ឬហៅថា«កម្លាំងពិសេស» សុទ្ធសឹងត្រូវបានជួលឲ្យមកធ្វើប្រតិបត្តិការ«សឹក»នេះ ដោយសាលារាជធានី​ភ្នំពេញ ដែលមានលោក ប៉ា សុជាតិរង្ស ជាអភិបាលសព្វថ្ងៃ។

ប្រភពច្បាស់ការណ៍មួយ ដែលត្រូវបានស្គាល់ថា មានទំនាក់ទំនងជិតស្និតនឹងក្រុមកម្លាំងពិសេសនេះ បានទូរស័ព្ទ​ប្រាប់អ្នកយកព័ត៌មានរបស់ទស្សនាវដ្ដីមនោរម្យ.អាំងហ្វូ ក្នុងព្រឹកថ្ងៃទី២៨ ខែមករានេះ រាយការណ៍ពីព្រឹត្តិការណ៍​នៅមុខក្រសួងព័ត៌មានកន្លងទៅថា «ពួកនេះបង្កប់ដើម្បីធ្វើអំពើអ្វីមួយ។ ពួកពាក់មួក ជាក្រុមរបស់សាលាក្រុង ពួក​បាតដៃទីបី។ បើមិនមែនសាលាក្រុងរៀបចំ មានអ្នកណាអាចរៀបចំបាន? (…) សាលាក្រុងរៀបចំឡើង ដើម្បីធ្វើ​សកម្មភាពតដៃ (…) ពេលនោះ អាចធ្វើការចោទប្រកាន់ ទៅលើក្រុមបាតុករបានហើយ។»

អ្វីដែលសំខាន់នោះ ប្រភពដដែលបានបញ្ជាក់ ក្នុងលក្ខខ័ណ្ឌមិនបញ្ចេញឈ្មោះ ទាក់ទងនឹងជនចុងក្រោយគេ​ក្នុង​ឯកសណ្ឋានជាសន្តិសុខ ដែលបានលោតទៅវាយសំពង ទៅលើក្បាលបុរសរត់ម៉ូតូឌុប ឈ្មោះ សុខ នី នោះ ថាជា​«មនុស្សតែមួយ» ទៅនឹងជនសង្ស័យមួយរូប ប្រដាប់ដោយ«ចម្ពាមកៅស៊ូគ្រាប់ដែក» និង«ស្នាប់ដៃដែក» ដែលត្រូវ​បានក្រុមកម្មករ និង​ប្រជាពលរដ្ឋឃាត់ខ្លួនកាលពីថ្ងៃទី២៦ ខែមករា នៅជិតក្បាលនាគ មហាវិថីព្រះនរោត្ដម។ ជន​ដែលគេបានឃាត់ខ្លួនរូបនេះ ត្រូវបានដោះលែងមកវិញ បន្ទាប់ពីមន្ត្រីនគរបាលប៉ុស្តិ៍បឹងកេងកងទី១ ខណ្ឌ​ចំការមន​ អះអាងថា ​រក​មិន​ឃើញមានការពាក់ព័ន្ធ។

ម្ចាស់ប្រភពស្និតនឹងក្រុមពិសេសរូបនេះ ដែលនៅជាប់នឹងហេតុការណ៍វាយអ្នករត់ម៉ូតូឌុបនោះដែរ បានអនុញ្ញាត​ឲ្យ​ទស្សនាវដ្ដីមនោរម្យ.អាំងហ្វូ ថតសម្លេងទុក ហើយបានបានអះអាងទៀតថា «ម្នាក់ដែលគេបានចាប់ពីថ្ងៃមុន​នោះ​ជា​អ្នកវាយ។ (…) មនុស្សនោះ និងរូបដែលមានក្នុងវីដេអីខ្លីប (ជនដែលវាយអ្នករត់ម៉ូតូឌុប)ជាមនុស្សដដែល។» លោក​បន្តរថា ការវាយយ៉ាងចាស់ដៃរហូតដំបងបាក់ជាពីរកំណាត់នោះ គឺជាការសងសឹកទៅនឹងការចាប់ខ្លួន កាលពីថ្ងៃ​ទី​២៦ ខែ​មករាកន្លងមកនេះ។

ទោះជាការទម្លាយនេះ មានការពិតច្រើនឬតិចក៏ដោយ ក៏ក្រុមពិសេសឯកសណ្ឋានស៊ីវិល និងឯកសណ្ឋាន​សន្តិសុខ​ទាំងនេះ ធ្លាប់ត្រូវបានលោក ឡុង ឌីម៉ង់ អ្នកនាំពាក្យសាលារាជធានី និងលោក ផៃ ស៊ីផាន អ្នកនាំពាក្យទីស្ដីការ​គណរដ្ឋមន្ត្រី ទទួលស្គាល់ថាជាក្រុមស៊ីឈ្នួលស្ថិតនៅក្រោមបញ្ជារបស់សាលារាជធានី។ នេះបើតាម​ការផ្សាយ​របស់គេហទំព័រភ្នំពេញប៉ុស្ដ៍ ចេញនៅថ្ងៃទី២៤ ខែមករាកន្លងមកនេះ។ គេហទំព័រដដែល បានដកស្រង់សម្ដីមន្ត្រី​អ្នក​នាំពាក្យសាលារាជធានី មករាយការណ៍ថា សេចក្តីណែនាំមួយរបស់ក្រសួងមហាផ្ទៃ បានប្រាប់សាលារាជធានី ឲ្យ​ឈប់ជួលសន្តិសុខទាំងនោះ ពីក្រុមហ៊ុនឯកជន។

ប៉ុន្តែសម្រាប់អ្នកឃ្លាំមើលសិទ្ធិមនុស្ស និងអ្នកច្បាប់បានបរិហាទៅលើចំណាត់ការបែបនេះ របស់អាជ្ញាធររាជធានី ថាជាការរំលោភលើច្បាប់ និងសិទ្ធិមនុស្សយ៉ាងធ្ងន់ធ្ងរ។ ចំណាត់ការ ដែលបានបណ្ដោយឲ្យ​ក្រុម«បិទមុខ»​ខុស​ច្បាប់ទាំងនោះ អាចធ្វើអ្វីបានស្រេចតែនឹងចិត្ត រួមទាំងការដើរតួជាក្រុមញុះញង់ឲ្យកើតមានហិង្សា ដើម្បីបង្កជា​លេស​ឲ្យកងកម្លាំងអាជ្ញាធរអាចធ្វើការបង្ក្រាប និងការដើតួរជាអ្នកបង្ក្រាប ទៅលើក្រុមអ្នកតវ៉ានោះផង។ ជាពិសេស​នៅ​ពេលដែល​ក្រុម​ពិសេសនេះ ត្រូវបានជ្រើសរើស«ក្រៅ»ច្បាប់ដោយគ្មានក្របខណ្ឌ គ្មានការបណ្ដុះបណ្ដាល តែត្រូវ​បានគេបញ្ជូនឲ្យ​មកអនុវត្តន៍ ភារកិច្ចរបស់កងកម្លាំងស្រប់ច្បាប់របស់អាជ្ញាធរទៅវិញ។

នៅក្នុងវីដេអូខាងក្រោម លោកអ្នកនឹងឃើញពី​សភាព«ឃោឃៅ អមនុស្សធម៌»របស់ជនទាំងនេះ ប្រព្រឹត្តិទៅអ្នក​រត់​ម៉ូតូឌុប​នៅមុខក្រសួង​ព័ត៌មាន។ សភាពការណ៍ដែលធ្វើឲ្យគេយល់ថា នៅកម្ពុជាបើគ្រាន់តែគេមិនសប្បាយចិត្តនឹង​នរណាម្នាក់ ជននោះនឹង​ត្រូវគេសំពងទាត់ធាក់ បញ្ជាគ្រប់គ្រងដោយអាជ្ញាធរខ្លួនឯង ហើយប្រកបដោយ​នីទណ្ឌភាព​យ៉ាងរំភើយ។

ទស្សនាវដ្ដីមនោរម្យ.ព័ងអាំងហ្វូ នឹងវិលត្រឡប់មកជាបន្តទៀត ជាមួយអត្ថបទរបស់ខ្លួន ជុំវិញក្រុមពិសេស ឬជាក្រុម​បាតដៃទីបី ដែលទើបតែកើតមានក្នុងសម័យលោកនាយករដ្ឋមន្ត្រី ហ៊ុន សែន នេះតែប៉ុណ្ណោះ៕

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី២៨ ខែមករា ឆ្នាំ២០១៤