អ៊ឹង កន្ថាផាវី៖ គម្រោង​លើក​កម្ពស់​ស្រ្តី ក្នុង​វិស័យ​កសិកម្ម

«យើងព្យាយាមធ្វើយ៉ាងម៉េច អោយស្រ្តីមានអំណាចសេដ្ឋកិច្ចដែរ ដើម្បីអោយសហគមន៍ និងសង្គមជាតិ​ទាំងមូល​ទទួលស្គាល់ ទៅលើការចូលរួមស្រ្តី ក្នុងការអភិវឌ្ឍន៍សេដ្ឋកិច្ចជាតិ» នេះជាការលើកឡើងរបស់លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី ខណៈក្រសួងរបស់លោកស្រី កំពុងជំរុញនិងលើកកម្ពស់ស្រ្តីក្នុងការងារកសិកម្ម និងជំរុញអោយមាន​និរន្តភាព​នៃសេដ្ឋកិច្ចផ្ទាល់ខ្លួន។
Loading...
  • ដោយ: ប្រាថ្នា
  • កែប្រែចុងក្រោយ: January 18, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

សេដ្ឋកិច្ចនារី - ស្រ្តី គឺជាផ្នែកមួយនៃការអភិវឌ្ឍន៍ប្រទេស។ ការជំរុញនិងលើកទឹកចិត្តអោយស្រ្តី ចូលរួមក្នុង​ការ​អភិវឌ្ឍន៍​សេដ្ឋកិច្ច មានន័យថា កំពុងលើកកម្ពស់អោយមានសមភាពយេនឌ័រ។ បើតាមការស្រាវជ្រាវ​របស់​ក្រសួង​កិច្ចការនារី ឃើញថាក្នុងវិស័យវិស័យកសិកម្ម ស្រ្តីមានចំនួនប្រហែល៥៧% ដែលចំនួននេះច្រើនជាងបុរស ដោយ​សារតែបុរសមួយចំនួនការធ្វើការចំណាកស្រុកទៅទីក្រុង និងក្រៅប្រទេស ដើម្បីរកការងារធ្វើ។

ក្នុងសិក្ខាសិលាមួយ កាលពីថ្ងៃទី១៧ ខែមករា ឆ្នាំ២០១៤ នៅសណ្ឋាគារកាំបូឌីយ៉ាណា លោកស្រី អ៊ឹង កន្ថាផាវី រដ្ឋមន្រ្តីក្រសួងកិច្ចការនារីបានថ្លែងថា «វិស័យចំបងបី ដែលទ្រទ្រង់វិស័យសេដ្ឋកិច្ចកម្ពុជាបច្ចុប្បន្ន ដែលរួមមាន​វិស័យកសិកម្ម ឧស្សាហកម្មកាត់ដេ និងសេវាកម្ម ។ នៅក្នុងផែនការយុទ្ធសាស្រ្ត​របស់នារីរតនៈ​របស់ក្រសួង​កិច្ចការ​នារី យើងបានផ្តោតសំខាន់ ទៅលើវិស័យសេដ្ឋកិច្ចរបស់ស្រ្តី ធ្វើយ៉ាងម៉េច អោយស្រ្តីមានអំណាចសេដ្ឋកិច្ចដែរ ដើម្បី​អោយសហគមន៍ និងសង្គមជាតិទាំងមូលទទួលស្គាល់ទៅលើការចូលរួមរបស់ស្រ្តី ក្នុងការអភិវឌ្ឍន៍សេដ្ឋកិច្ចជាតិ និងផ្តល់តម្លៃដោយស្វ័យប្រវត្តិដល់ស្រ្តី។»

លោកស្រីបន្តថា «ហេតុអ្វីយើងគួរជំរុញស្រ្តី ក្នុងវិស័យកសិកម្ម? ដោយសារវិស័យកសិកម្ម​ ជាវិស័យ​មួយដែល​មាន​ចរន្តទេសន្តរប្រវេសន៍ និងដោយសារទេសន្តរប្រវេសន៍កាន់តែកើនឡើងនេះហើយ ដែលធ្វើអោយស្រ្តីភាគច្រើន​នៅ​ចាំផ្ទះ ហើយបុរសទៅទីក្រុង ឬក្រៅប្រទេសដើម្បីរកការងារធ្វើ។ ដែលភាគច្រើនគឺស្រ្តីដែលមាន៥៧% នេះហើយ​ដើរតួសំខាន់ នៅក្នុងវិស័យកសិកម្ម។»

ដោយសារតែប្រជាជនខ្មែរភាគច្រើន នៅធ្វើកសិកម្មតាមបែបប្រពលវប្បកម្ម ជាពិសេសគឺស្រ្តី ដែលពួកគេ​នៅ​មាន​កង្វះខាតទៅលើព័ត៌មាន ទាក់ទងនឹងជំនាញមួយចំនួនដូចជា ការបង្កើនគុណភាពដី ការជ្រើសគ្រាប់ពូជ និង​ជំនាញ​បច្ចេកទេស ដែលធ្វើអោយការបង្កើនផលិតកម្មរបស់គាត់នៅមានកំរិត។

ពាក់ព័ន្ធនិងបញ្ហានេះដែរ រដ្ឋមន្រ្តីក្រសួងកិច្ចការនារីរូបនេះបានបញ្ជាក់ថា «ក្រសួងកិច្ចការនារីកំពុងស្រាវជ្រាវ ថា​តើ​អាចជួយស្រ្តីបានដូចម្តេច ដើម្បីបង្កើនផលិតកម្មនៅក្នុងវិស័យកសិកម្មរបស់ពួកគាត់ ដោយមិនមែនជាលក្ខណៈ​ដែលធ្វើបានត្រឹមតែមួយរស់ តែយើងចង់ប្រែក្លាយទៅជាកសិកម្មមួយ ដែលបំពេញតម្រូវការគ្រួសារផង និង​អាច​អោយ​គ្រួសារមានកំរៃបន្ថែមផង។

លោកស្រីពន្យល់បន្ថែមថា មិនត្រឹមតែការសិក្សាស្រាវជ្រាវប៉ុណ្ណោះទេ ក្រសួងកិច្ចការនារីបានរៀបចំផែនការ ដើម្បី​លើកកម្ពស់ស្រ្តីក្នុងវិស័យនេះផងដែរ ដោយបានសហការជាមួយដៃគូរអភិវឌ្ឍន៍អន្តជាតិ ដើម្បីមើលថាតើអ្វី​ជា​តម្រូវ​របស់ស្រ្តី វាជួយស្រ្តីយ៉ាងដូចម្តេចក្នុងវិស័យកសិកម្ម ដែលក្រសួងនឹងបញ្ចេញនូវអនុសាសន៍។ ក្រសួងកិច្ចការនារី​ក៏នឹងស្នើទៅក្រសួងបច្ចេកទេស ដើម្បីជួយបំភ្លឺខ្លះៗថា តើគួរតែធ្វើអ្វីដែលជួយលើកកម្ពស់សមភាពយែនឌ័រ និង​ជួយ​ស្រ្តីក្នុងវិស័យនេះ ជាមួយនិងក្រសួងដែលពាក់ព័ន្ធនានា ដើម្បីបន្ថយភាពក្រីក្រនៅក្នុងគ្រួសារ និងសង្គម។

នៅពេលបច្ចុប្បន្ននេះ ស្រ្តីដែលមានអាយុ១៨ឆ្នាំភាគច្រើន ធ្វើការចំណាកស្រុកទៅទីប្រជុំជន ដើម្បីធ្វើការងារ​រោង​ចក្រ ជាងធ្វើការងារកសិកម្មដែលជាការងារលំបាក និងតម្រូវអោយមានកម្លាំងពលកម្មច្រើន តែទទូលបាន​ផល​មិន​បានតាមអ្វីដែលរពឹងទុក និងមានស្រ្តីមួយចំនួនទៀតសុខចិត្តចំណាកតាមស្វាមីរបស់ពួកនាង។ ទាក់ទងនិង​បញ្ហា​នេះដែរ លោកស្រី អ៊ឹង កន្ថាផាវីយល់ស្របថា «ការងារនៅក្នុងកសិកម្មរបស់ស្រ្តី វាជាការងារសេដ្ឋកិច្ចក្រៅប្រព័ន្ធ ហើយការងារនេះ មានភាពងាយរងគ្រោះច្រើន។ តែបើទោះបីជាស្រ្តីភាគច្រើន ធ្វើការងាររោងចក្រក៏ដោយ តែវា​មិន​អាចប៉ះពាល់ដល់កសិកម្មទេ ព្រោះមានស្រ្តីមួយចំនួនគេនៅតែប្រកបរបរនេះ ម្យ៉ាងវិស័យទាំងពីនេះ​បំពេញ​អោយ​គ្នា​ទៅវិញទៅមក ហើយប្រទេសមួយ មិនអាចគ្មានវិស័យកសិកម្មបានទេ។»

លោកស្រី បានអោយដឹងទៀតថា «ឥលូវនេះយើងកំពុងធ្វើទំនើបកម្ម ដែលយើងប្រើប្រាស់កម្លាំងម៉ាស៊ីន ដែលវា​ជួយ​សម្រួលដល់កាងារកសិកម្មរបស់ស្រ្តី ព្រោះស្រ្តីកម្លាំងកាយទាបជាងបុរស។ បើគាត់មានជំនញទៅលើការប្រើប្រាស់​ម៉ាស៊ីន គាត់ប្រហែលជាលែងលំបាកហើយ អញ្ចឹងហើយទើបយើងលើកយកការអប់រំ ការបណ្តុះបណ្តាលជំនាញ​បច្ចេកទេស​ដល់ស្រ្តីដើម្បីជួយសម្រួលពួកគាត់ក្នុងវិស័យកសិកម្ម។»

-----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី១៨ ខែមករា ឆ្នាំ២០១៤

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...