សម រង្ស៊ី៖ បក្សសង្រ្គោះជាតិ នឹងចូលសភាបើមានការបោះឆ្នោតឡើងវិញ
បន្ទាប់ពីគណបក្សប្រជាជនកម្ពុជា ស្នើឲ្យតំណាងអង្គការសហប្រជាជាតិ ជួយជម្រុញគណបក្សសង្រ្គោះជាតិ ចូលប្រជុំរដ្ឋសភាមក គណបក្សសង្រ្គោះជាតិបានឆ្លើយតបភ្លាមៗថា គណបក្សខ្លួនស្វាគមន៍ ចំពោះការអន្តរាគមន៍ពីអង្គការសហប្រជាជាតិ ដើម្បីជួយបិទបញ្ចប់វិបត្តិនយោបាយនៅកម្ពុជា ហើយគណបក្សសង្រ្គោះជាតិនឹងព្រមចូលទៅប្រជុំរដ្ឋសភា ប្រសិនបើមានការធានាថា នឹងមានការរៀបចំបោះឆ្នោតឡើងវិញ ឲ្យបានឆាប់បំផុត។
លោក សម រង្ស៊ី ប្រធានគណបក្សសង្គ្រោះជាតិ។ (រូបថត គណបក្ស)
ប្រធានគណបក្សសង្រ្គោះជាតិ លោក សម រង្ស៊ី តាមរយៈទំព័រហ្វេសបុកផ្លូវការរបស់ខ្លួន បានបញ្ជាក់នៅថ្ងៃទី១៦ ខែមករា ឆ្នាំ២០១៤ នេះថា៖ «គណបក្សសង្គ្រោះជាតិសូមឆ្លើយតបថា យើងស្វាគមន៍នូវតួនាទីរបស់អង្គការសហប្រជាជាតិ ដើម្បីដោះស្រាយ វិបត្តិនយោបាយក្រោយការបោះឆ្នោត។ ក៏ប៉ុន្តែការចូលរួមប្រជុំរដ្ឋសភាអាចធ្វើទៅបាន លុះត្រាតែមាន ការធានាឱ្យមានការកែទម្រង់ប្រព័ន្ធបោះឆ្នោត (គ.ជ.ប) ដើម្បីឈានទៅរកការបោះឆ្នោតឡើងវិញ ក្នុងពេលឆាប់ៗនេះ។»
ការបញ្ជាក់ពីគោលជំហររបស់គណបក្សសង្រ្គោះជាតិ ដោយលោក សម រង្ស៊ី យ៉ាងដូច្នេះ គឺបានកើតឡើងតែមួយថ្ងៃតែប៉ុណ្ណោះ ក្រោយពីលោក ហ៊ុន សែន ជាអនុប្រធានគណបក្សប្រជាជនកម្ពុជា បានទទូចដល់លោក លោកសុរិយា ប្រាសាទ ស៊ូប៊ែឌី អ្នក រាយការណ៍ពិសេស អង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា (អ.ស.ប) ជួយជម្រុញបេក្ខជនជាប់ឆ្នោតគណបក្សសង្គ្រោះជាតិ ចូលប្រជុំសភាជាមុនសិន ដើម្បីជាការឈានដល់ការទម្លាយភាពជាប់គាំងនយោបាយបច្ចុប្បន្ន។
ចំពោះការទាមទារ របស់គណបក្សសង្រ្គោះជាតិ ទស្សនាវដ្តីមនោរម្យព័ងអាំងហ្វូ មិនអាចទាក់ទងមន្រ្តីគណបក្សប្រជាជនកម្ពុជា និងអ្នកនាំពាក្យរដ្ឋាភិបាលកម្ពុជាដើម្បីធ្វើការអត្ថាធិប្បាយបាននៅឡើយ។ តែបើយោងលើគោលជំហរចុងក្រោយរបស់លោក ហេង សំរិន ជាថ្នាក់ដឹកនាំកំពូលរបស់គណបក្សប្រជាជនកម្ពុជា ក្នុងពិធីរំឭកខួប ទី៣៥ នៃទិវាជ័យជម្នះ ៧មករា បានអះអាងថា គេមិនអាចបដិសេធលទ្ធផលបោះឆ្នោត កាលពីថ្ងៃទី២៨ ខែ កក្កដា ឆ្នាំ២០១៣ បានទេ ហើយការបង្កើត រដ្ឋសភា និងរដ្ឋាភិបាលបច្ចុប្បន្ន គឺស្របតាមរដ្ឋធម្មនុញ្ញ។
តែសម្រាប់ បេក្ខជនជាប់ឆ្នោតគណបក្សសង្រ្គោះជាតិ ទាំង៥៥រូប ត្រូវបានគេមើលឃើញថា មិនធ្លាប់ទៅចូលរួមប្រជុំសភានីតិកាលទី៥ ដែលកើតចេញពីការបោះឆ្នោតកាលពីថ្ងៃទី២៨ ខែកក្កដា ឆ្នាំ២០១៣ ម្តងណាឡើយ ព្រោះបេក្ខជនជាប់ឆ្នោតគណបក្សសង្រ្គោះជាតិទាំងនោះ បានចាត់ទុករដ្ឋាភិបាល និងរដ្ឋសភា«ឯកបក្ស» ក្នុងអាណត្ដិទី៥នេះ ថាបានបង្កើតឡើងដោយរំលោភរដ្ឋធម្មនុញ្ញ ។
ជុំវិញវិវាទនយោបាយ ក្រោយការបោះឆ្នោតដ៏ចម្រូងចម្រាសនេះ អ្នកតាមដានស្ថានការណ៍នយោបាយកម្ពុជា និងអ្នកវិភាគឯករាជ្យបានលើកឡើងថា ដំណោះស្រាយល្អបំផុតដើម្បីទម្លាយភាពជាប់គាំនយោបាយនេះ គឺមានតែគណបក្សទាំងពីរ គប្បីថយមួយជំហានម្នាក់ មានន័យថា គណបក្សសង្រ្គោះជាតិត្រូវចូលប្រជុំរដ្ឋសភា រីឯគណបក្សប្រជាជនកម្ពុជា ត្រូវយល់ព្រមឲ្យមានការបោះឆ្នោតមុនបញ្ចប់អាណត្តិឡើងវិញ ក្រោយការធ្វើកំណែទម្រង់គណៈកម្មាធិការជាតិរៀបចំការបោះឆ្នោត(គ.ជ.ប)៕
--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី១៦ ខែមករា ឆ្នាំ២០១៤