ពលរដ្ឋ​រិះ​គន់ ក្រុម​មនុស្ស​ពាក់​មួក​បិទ​មុខ ថា​ជា​ក្រុម​ជន​«បាត​ដៃ​ទី​បី»

តើក្រុមជនបិទមុខ នៅមុខសាលាដំបូងរាជធានីភ្នំពេញ នៅថ្ងៃទី១៤ ខែមករា ជានរណា? មកពីណា? ឬជាកងកម្លាំង​សាធារណៈរបស់អាជ្ញាធរស្លៀកឯកសណ្ឋានស៊ីវិល ឬជាកងកម្លាំងឯកជន«ខុសច្បាប់»? យ៉ាងណាក៏ដោយ ក៏ពលរដ្ឋ​ដែលបានចូលរួមនៅក្នុងការតវ៉ា ទាមទាររកយុត្តិធម៌ឲ្យមេដឹកនាំគណបក្សប្រឆាំង បានសម្ដែងប្រតិកម្មរិះគន់ថា រដ្ឋាភិបាលកំពុងទុកឲ្យកងកម្លាំងបិទមុខទាំងនេះ មានលទ្ធភាព«មកបង្កហិង្សា»ផង នឹងអាចដើរតួជាកងកម្លាំងរបស់​អាជ្ញាធរដើម្បីចាំ«បង្ក្រាប»ផង។
Loading...
  • ដោយ: ប្រាថ្នា
  • កែប្រែចុងក្រោយ: January 14, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

តើក្រុមជនបិទមុខ នៅមុខសាលាដំបូងរាជធានីភ្នំពេញ នៅថ្ងៃទី១៤ ខែមករា ជានរណា? មកពីណា? ឬជាកងកម្លាំង​សាធារណៈរបស់អាជ្ញាធរស្លៀកឯកសណ្ឋានស៊ីវិល ឬជាកងកម្លាំងឯកជន«ខុសច្បាប់»? យ៉ាងណាក៏ដោយ ក៏ពលរដ្ឋ​ដែលបានចូលរួមនៅក្នុងការតវ៉ា ទាមទាររកយុត្តិធម៌ឲ្យមេដឹកនាំគណបក្សប្រឆាំង បានសម្ដែងប្រតិកម្មរិះគន់ថា រដ្ឋាភិបាលកំពុងទុកឲ្យកងកម្លាំងបិទមុខទាំងនេះ មានលទ្ធភាព«មកបង្កហិង្សា»ផង នឹងអាចដើរតួជាកងកម្លាំងរបស់​អាជ្ញាធរដើម្បីចាំ«បង្ក្រាប»ផង។


ក្រុមមនុស្សពាក់មួកបិទមុខ នៅមុខសាលាដំបូងរាជធានីភ្នំពេញ ថ្ងៃទី១៤ ខែមករា ឆ្នាំ២០១៤។ (រូបថត ហ្វេសប៊ុក)

បាតដៃទីបី - ជាទូទៅ នៅពេលមានព្រឹត្តិការណ៏ណាមួយកើតឡើង ឬបុណ្យជាតិ គេតែងឃើញមានកងកម្លាំង​របស់​អាជ្ញាធរ ដែលមានឯកសណ្ឋាន ជាកងកម្លាំងការពារជាតិ ឬជាសន្តិសុខតាមផ្នែកណាមួយ។ តែចម្លែក​តែនៅថ្ងៃ​ទី១៤ ខែមករា ឆ្នាំ២០១៤នេះវិញ   នៅពេលប្រជាពលរដ្ឋដែលមានចំនួនច្រើនរាប់ពាន់នាក់ ទៅធ្វើការទាមទារតវ៉ា នៅមុខ​សាលាដំបូងរាជធានីភ្នំពេញ ដើម្បីផ្ដល់យុត្តិធម៌ ដល់មេដឹកនាំគណបក្សប្រឆាំងនោះ គេបានសង្កេតឃើញ មានជន​ស្លៀកពាក់ស៊ីវិលធម្មតា តែមានពាក់មួកសុវត្តិភាព និងមួយចំនួនមានពាក់ម៉ាស់បិទមុខ ប្រមាណជា៣០នាក់ បាន​មក​ឈរ​តម្រៀបជួរគ្នានៅទីនោះ ដែលទំនងជាមិនចង់អោយ ប្រជាពលរដ្ឋមើលឃើញមុខពួកគេថាជានរណា។

បើមើលតាមសកម្មភាព និងរបៀបរបបរបស់ក្រុមមនុស្សបិតមុខទាំងនេះ គេអាចដឹងបានភ្លាមថា វាជាកង​កម្លាំង​របស់​ផ្នែកណាមួយ ដែលអាចនឹងធ្វើសកម្មភាពបង្ក្រាប ឬទប់ទល់នឹងសភាពការណ៍ខុសធម្មតា។ ពលរដ្ឋដែលជួបជុំ​គ្នា​នៅ​ទីនោះ បានសម្ដែងការរិះគន់ និងលើកជាសេចក្ដីសន្និដ្ឋានថា រដ្ឋាភិបាលកំពុងរៀបចំប្រព័ន្ធការពារសណ្ដាប់ធ្នាប់ ដោយ​ប្រើ​កម្លាំងបង្កប់ដើម្បីបន្លំ ខុសពីរបៀបគ្រប់គ្រង​តាមបែបនិតិរដ្ឋ។

មន្រ្តីសង្គម​ស៊ីវិល លោក សួន ប៊ុនសក្តិ លេខាធិការប្រតិបត្តិ គណកម្មការប្រព្រឹត្តិកម្មការពារសិទ្ធមនុស្សកម្ពុជា ហៅ​កាត់តាមភាសាអង់គ្លេសថា CHRAC  បានរិះគន់សកម្មភាពនេះថា ជាទង្វើមិនសមស្របតាមផ្លូវច្បាប់។ លោកបាន​ពន្យល់ថា «តាមផ្លូវច្បាប់ គឺរដ្ឋ​ប្រើប្រាស់តែកងកម្លាំង​សាធារណៈ ដែល​ជាកម្លាំង​របស់​រដ្ឋ ដើម្បីរៀបចំចាត់ចែង​សណ្តាប់ធ្នាប់សាធារណៈ»។

មន្ត្រីសិទ្ធិមនុស្សរូបនេះ បានអោយទស្សនាវដ្ដីមនោរម្យព័ងអាំងហ្វូដឹងទៀតថា «ប្រសិនបើរដ្ឋចាត់ចាត់ចែង ឬក៏ទៅ​យកមនុស្សមកពីណា ដែលគ្មានក្របខ័ណ្ឌពិតប្រាកដ ហើយស្លៀកស៊ីវិលមកការពារ វាជារឿងដែលមិនសមស្រប និងខុសច្បាប់។ ក៏ប៉ុន្តែរដ្ឋមានសិទ្ធចាត់ចែងនរណាម្នាក់ ឬចាត់តាំងកម្លាំងបន្ថែមដើម្បីដោះស្រាយបញ្ហាអីមួយ តែ​រដ្ឋត្រូវតែមានអត្តសញ្ញាណអ្វីមួយដើម្បីសម្គាល់ អោយបានច្បាស់លាស់ ថាតើគេនេះជាក្រុមអី ហើយអន្តរាគមន៍​បន្ថែមទៅលើបញ្ហាអី។»។

ស្រង់សម្ដីដោយវិទ្យុក្នុងស្រុកមួយ លោក​ខៀវ សុភ័​ក្រ អ្នកនាំពាក្យ​ក្រសួង​មហាផ្ទៃ​បាន​ថ្លែង​ឲ្យដឹងថា នេះ​មិនមែន​ជា​កងកម្លាំង​សមត្ថ​កិច្ច​​​ របស់​ក្រសួងមហាផ្ទៃ​នោះទេ។ លោក​ខៀវ សុភ័​ក្រ បដិសេធ​ដោយ​លើក​ហេតុផល​ថា កង​កម្លាំង​សមត្ថកិច្ច​​របស់​​ក្រសួង​មហាផ្ទៃ​ គឺ​សុទ្ធតែ​​មាន​​ឯក​សណ្ឋាន​​ត្រឹម​ត្រូវ​​ដែល​​អាច​​​បញ្ជាក់​​ថា ពិតជាកងកម្លាំង​សមត្ថកិច្ច ​របស់​ក្រសួងមហាផ្ទៃ​យ៉ាង​ពិតប្រាកដ​មែន​។​ ដូច្នេះក្រុមទាំងនេះ មកពីណា មានភារកិច្ចអ្វី?

ជាមួយនឹងមនុស្សរាប់ពាន់នាក់ នៅមុខសាលាដំបូងរាជធានីភ្នំពេញ លោកស្រី មូរ សុខហួ តំណាង​រាស្រ្តមណ្ឌល​បាត់ដំបង មកពីគណបក្សសង្រ្គោះជាតិ បានសំណូមពរអោយក្រុមនេះបើកកញ្ចក់ ឬដោះមួកសុវត្តិភាព ដើម្បីជា​ការ​សំដែង​នូវការគោរព ស្រលាញ់ក្នុងនាមជាប្រជាជាតិខ្មែរតែមួយ និងដើម្បីបង្ហាញពីភាពមានយុត្តិធម៌ ជូន​ប្រជាពលរដ្ឋ​ខ្មែរដែលរងគ្រោះ។ ប៉ុន្តែមិនមានសកម្មភាពប្រតិកម្ម ឆ្លើយតបពីក្រុមនេះឡើយ។

រូបថតមួយចំនួន ដែលត្រូវបានគេបង្ហោះនៅតាមបណ្ដាញសង្គម បានបង្ហាញឲ្យឃើញថា ក្នុង​ចំណោមជនមួយ​ក្រុម​នេះ មានមួយចំនួនប្រដាប់ដោយអាវុធ លាក់នៅក្នុងអាវរបស់ពួកគេ។ បើគ្មានការរៀបចំច្បាស់លាស់ និងការបើកដៃ​ពីអ្នកមាន​អំណាច​ដ៏សម្បើម​ណាម្នាក់ ក្រុមនេះមិនអាចចេញមកឈរតម្រង់ជួរ គ្រពាត់ដៃយ៉ាងសង្ហាបែបនេះឡើយ។ ឬគេអាចនិយាយបានថា ជា«បាតដៃទីបី»ដែលត្រៀមមកបន្លំជាមួយប្រជាពលរដ្ឋ នៅពេលមានហេតុការណ៍​អ្វីមួយ​កើតឡើង។

ចំពោះបញ្ហានេះ ព្រះចៅអធិការវត្តសាមគ្គីរង្សី ព្រះតេជព្រះគុណ សៀង សុវណ្ណារ៉ា បានបញ្ចេញទស្សនៈថា «មនុស្ស​ដែលពាក់មួកសុវត្តិភាព ជាមនុស្សដែលគេបញ្ជូនមក ដើម្បីទប់ស្កាត់ទៅលើរឿងអ្វីមួយកើតឡើង ដែលយើងមិន​អាច​ស្មានបាន និងមួយវិញទៀត ដើម្បីកុំអោយប្រជាពលរដ្ឋស្គាល់ និងដឹងថាគេជានរណា ហើយនៅពេលដែលមាន​បញ្ហាអ្វីមួយ គេគ្រាន់តែដោះមួកចេញ ហើយអាចបន្លំខ្លួនជាមួយប្រជាពលរដ្ឋបាន»។ ព្រះតេជគុណ មានថេរដីការ​បន្តថា «តាមអាត្មាគិត នេះហើយជាបាតដៃទីបី ដូចដែលនាយករដ្ឋមន្រ្តីប្រកាស​កាលពីមុន»។

ពលរដ្ឋ​មួយចំនួន បានលើកជាមតិឡើងថា នៅក្នុងកម្មវិធីជួបជុំដែលប្រមូលមនុស្សម្នាមកច្រើនបែបនេះ កងកម្លាំង​របស់អាជ្ញាធរ ដែលគ្រប់គ្រងដោយរដ្ឋាភិបាល គួរតែស្នើសុំឲ្យក្រុមមនុស្សទាំងនេះ ឲ្យបើកមុខឡើងក្រោម​ហេតុ​ផល​សុវត្ថិភាព។ ព្រោះក្នុងករណីមានហេតុការណ៍អ្វីកើតឡើង អាជ្ញាធរពិបាកនឹងកំណត់មុខសញ្ញាណាស់ ដោយសារតែ​មនុស្សមួយក្រុមនេះ បិទមុខជិត។ ហើយបើទោះនៅក្នុងលក្ខខ័ណ្ឌណាក៏ដោយ ក៏បញ្ហាសុវត្ថិភាពនៅតែជា​ការ​ទទួល​ខុសត្រូវ របស់អាជ្ញាធរជាដដែលដែរ អាជ្ញាធរមិនអាចបកស្រាយយករួចខ្លួន ថាមិនដឹងជនមួយក្រុមនេះមកពីណា នោះទេ។

យ៉ាងណាក៏ព្រះតេជគុណ សៀង សុវណ្ណរ៉ា បានមានសង្ឃដីការ បិណ្ឌបាតសុំអោយទាំងកម្លាំងសន្តិសុខ ទាំង​ក្រុម​ជនបិទមុខ និងទាំងប្រជាពលរដ្ឋទាំងអស់ សូមរក្សានូវសុខសន្តិភាពទាំងអស់គ្នា ព្រោះសុទ្ធតែជាខ្មែរដូចគ្នា៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី១៤ ខែមករា ឆ្នាំ២០១៤

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...