អង្គការសង្គមស៊ីវិលចំនួនប្រាំពីរ គ្រោងនឹងដាក់ពាក្យបណ្តឹងប្តឹងលោក នាយករដ្ឋមន្រ្តីហ៊ុន សែនទៅកាន់តុលាការ​ព្រហ្មទណ្ឌអន្តរជាតិ (ICC) និងអង្គការពលកម្មអន្តរជាតិ (ILO) ជុំវិញករណីដែលបុរសខ្លាំងកម្ពុជារូបនេះ ប្រើប្រាស់​កងកម្លាំងរបស់ជាតិ មកវាយបង្គ្រាប និងបាញ់សម្លាប់កម្មករ និងប្រជាពលរដ្ឋស្លូតត្រង់ស្លាប់ចំនួន«ប្រាំពីរនាក់» និង​ការចាប់ឃុំខ្លួនតំណាងសង្គមស៊ីវិល និងប្រជាពលរដ្ឋចំនួន២៣នាក់ ក្នុងហេតុការណ៍ប៉ះទង្គិច ជាមួយបាតុករនាពេល​កន្លងមកនេះ។

អង្គការសង្គមស៊ីវិលចំនួនប្រាំពីរ ក្នុងសន្និសីទសារព័ត៌មាន នាព្រឹកថ្ងៃទី១០ ខែមករា ឆ្នាំ២០១៤ នៅស្នាក់ការសមាគម​ប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធ។ (រូបថត MONOROOM.info/O.Vary)

ប្រព័ន្ធយុត្តិធម៌ - លោក ហេង សំអូន អគ្គលេខាធិការសមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធ និង លោក ស ម៉ូរ៉ា ប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា បានបង្ហាញនូវទស្សនៈដូចគ្នាថា «ផ្ទះ​សាមគ្គី»នៃបណ្តាញអង្គការសមាគមទាំងប្រាំពីរ មានសមាជិកជិតប្រាំមួយម៉ឺននាក់ បានដាក់កំហិតដល់​រដ្ឋាភិបាល​កម្ពុជា ដែលដឹកនាំដោយលោក ហ៊ុន សែន ធ្វើការដោះលែង លោក វ៉ន ពៅ និងអ្នក២២នាក់ផ្សេងទៀត ដោយគ្មាន​លក្ខខ័ណ្ឌ ដាក់ទោសលើអ្នកដែលបានប្រព្រឹត្តអំពើហិង្សាបណ្តាលឲ្យមានកម្មករស្លាប់ និងរបួស ព្រមទាំងទាមទារ​ឲ្យមានការតម្លើងប្រាក់ខែគោលដល់កម្មករចំនួន១៦០ដុល្លារ។

ការថ្លែងរបស់មេដឹកនាំសមាគមទាំងនេះ បានធ្វើឡើងក្នុងសន្និសីទសារព័ត៌មានមួយ នាព្រឹកថ្ងៃទី១០ ខែមករានេះ នៅ​ស្នាក់ការសមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធ ក្នុងសង្កាត់ ទឹកថ្លា ដែលមានព្រះសង្ឃ ជាងម្ភៃអង្គ និងប្រជាពលរដ្ឋចូលរួមប្រមាណជិតមួយរយនាក់ចូលរួម។

លោក ហេង សំអូន បានបន្ថែមថា អង្គការទាំងប្រាំពីរគ្រោងនឹងដាក់ពាក្យបណ្តឹង ប្តឹងលោក នាយករដ្ឋមន្រ្តីហ៊ុន សែន ទៅអង្គការពលកម្មអន្តរជាតិ (ILO) និងទៅកាន់តុលាការព្រហ្មទណ្ឌអន្តរជាតិ(ICC)។ ពីករណីបាញ់សម្លាប់កម្មករ ដែលធ្វើបាតុកម្មទាមទាប្រាក់ខែគ្រាន់ តែអាចរស់នៅសមរម្យប៉ុណ្ណោះ។ ជាមួយគ្នានេះលោកបានឲ្យដឹងទៀតថា ក្នុង​ពេលខាងមុខនេះក្រុមបណ្តាញអង្គការរបស់លោក នឹងបន្តធ្វើបាតុកម្ម បើសិនជាមិនមាន​ការដោះលែងអ្នក​ទាំង២៣​នាក់​នោះទេ។ «យើងនឹងធ្វើការដង្ហែរក្នួន ដែលមានគ្នាមិនតិចជាងមួយម៉ឺននាក់ នៅទីក្រុងភ្នំពេញនេះ បើទោះបីជា មានការហាមឃាត់យ៉ាងណាក៏ដោយ យើងនៅតែធ្វើប្រសិនជាមិនមានការដោះលែងទេ។»

ឯប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជាលោក ស ម៉ូរ៉ា បានអះអាងថា ផ្ទះសាមគ្គីមិនអាច​ទទួលយកបានទេ នូវអំពើហិង្សាដែលធ្វើដោយកងកម្លាំងជាតិ និងត្រូវបានប្រើប្រាស់ដោយលោក នាយករដ្ឋមន្រ្តីហ៊ុន សែន បែបនេះ។ លោកបានអះអាងថា អំពើហិង្សាមិនមែនជាដំណោះស្រាយទេ។ ដំណោះស្រាយដែលល្អ គឺការ​ដោះ​ស្រាយបញ្ហានានាជូនប្រជាពលរដ្ឋ កម្មករ និងបាតុករដែលកំពុងតែធ្វើការទាមទា។ «អំពើហិង្សាមិនមែនជា​ដំណោះ​ស្រាយទេ វាក៏នឹងមិនបញ្ចប់នោះដែរ។ (…) មិនមែនថាការចាប់ខ្លួនលោក វ៉ន ពៅ និងប្រជាពលរដ្ឋផ្សេងទៀត រឿងត្រូវ​បាន​បញ្ចប់នោះទេ ព្រោះបញ្ហាប្រជាពលរដ្ឋមិនទាន់ត្រូវបានដោះស្រាយ។ (…) នេះជាបញ្ហារបស់ប្រជាពលរដ្ឋខ្មែរ​ទាំងមូល។»

«បើមិនមានការឯកភាព ពីរាជរដ្ឋាភិបាលទេ...»

ករណីខាងលើនេះ ក្នុងកិច្ចសម្ភាសន៍ជាមួយទស្សនាវដ្តីមនោរម្យព័ងអាំងហ្វូ  ប្រធានគណៈកម្មាការ​សេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា លោក ជាម យៀប បានលើកឡើងថា ទាំងនោះជាសិទ្ធិរបស់អង្គការសមាគម។ លោក​បានបន្ថែមថា បើមិនមានការឯកភាពពីរដ្ឋាភិបាលទេ តុលាការព្រហ្មទណ្ឌអាចនឹងទទួល នូវពាក្យបណ្តឹង​ទាំង​នោះទុកជាឯកសារ តែគេនឹងមិនចាត់ការនោះទេ។ លោកបានបន្ថែមថា ឯការទាមទាឲ្យមានការដោះលែងនោះ ជា​សិទ្ធិរបស់តុលាការ មិនមែនអាស្រ័យលើការស្នើសុំ ឬទាមទារបស់ពួកគាត់ឡើយ។ បើពួកគាត់មិនព្រមសុខចិត្ត ចំពោះ​ការសម្រេចរបស់តុលាការទេ អាចធ្វើបាតុកម្មដោយអហិង្សា ស្របច្បាប់និងមានការអនុញ្ញាតិពីរដ្ឋាភិបាល។ «ការ​ដង្ហែ​ក្បួនត្រូវសុំអនុញ្ញាតិពីអាជ្ញាធរដែនដី ត្រូវសុំពីសមត្ថកិច្ចរបស់រាជរដ្ឋាភិបាល។ (…) ធ្វើយ៉ាងណាឲ្យគេយល់​ព្រម តែបើ​គេមិនយល់ព្រម ក៏មិនអាចធ្វើបានដែរ។»

សូមបញ្ជាក់ថា ក្នុងសន្និសិទសារព័ត៌មាន កាលពីប៉ុន្មានថ្ងៃមុននេះ គណបក្សសង្គ្រោះជាតិដែលដឹកនាំដោយលោក សម រង្ស៊ី ក៏បានបង្ហាញពីគោលជំហររបស់ខ្លួនដែរ ថានឹងគ្រោងប្តឹងសមត្ថកិច្ចរដ្ឋាភិបាលកម្ពុជា ដឹកនាំដោយ​អនុ​ប្រធាន​គណបក្សប្រជាជនកម្ពុជា ដ៏មានអំណាចលោក ហ៊ុន សែន ទៅកាន់តុលាការព្រហ្មទណ្ឌអន្តរជាតិ(ICC)។ រីឯអង្គការ​ទាំងប្រាំពីរនោះរួមមាន សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ(IDEA), សម្ព័ន្ធសហគមន៍​កសិករ​កម្ពុជា (CCFC), សហព័ន្ធសហជីពកម្មករចំណីអាហារ និងសេវាកម្មកម្ពុជា (CFSWF), សមាគមមន្រ្តីរាជការ​ឯករាជ្យ​​កម្ពុជា(CICA), បណ្តាញយុវជនកម្ពុជា(CYN), បណ្តាញកម្មករធ្វើការតាមផ្ទះកម្ពុជា(CDWN) និងមជ្ឈមណ្ឌល​អភិវឌ្ឍន៍​កម្មករកម្ពុជា(CWCD)៕

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី១០ ខែមករា ឆ្នាំ២០១៣