«មហារីកដុំសាច់នៅក្រលៀន ទើបតែវះបាន៤ខែ និងពងបែកក្នុងពោះវៀនជាបញ្ហាសុខភាពធ្ងន់ធ្ងរ និងទ្រុឌ​ទ្រោម​របស់លោក វ៉ន ពៅ ដែលអាចញុំាបានត្រឹមតែបាយទន់ ត្រីស្ងោរ និងចំហុយតែប៉ុណ្ណោះ» នេះជាសំដីរបស់អ្នកស្រី ប្រាក់ សុវណ្ណារី ភរិយារបស់លោក វន ពៅ ថ្លែងប្រាប់ទស្សនាវដ្តីមនោរម្យព័ងអាំងហ្វូ។

អ្នកស្រី ប្រាក់ សុវណ្ណារី ភរិយារបស់លោក វន ពៅ ផ្ដល់កិច្ចសម្ភាសឲ្យអ្នកការសែតថ្ងៃទី១០ ខែមករា ឆ្នាំ២០១៤។ (រូបថត MONOROOM.info/O.Vary)

ជីវិតមេសហជីព - ការលើកឡើង ពីសុខភាពរបស់លោក វន ពៅ ប្រធានសមាគមប្រជាធិបតេយ្យ​ឯករាជ្យ​សេដ្ឋកិច្ច​ក្រៅ​ប្រព័ន្ធ ត្រូវបានថ្លែងឲ្យដឹងដោយអ្នកស្រី ប្រាក់ សុវណ្ណារី ភរិយាអាយុ៣០ឆ្នាំរបស់លោក នៅក្នុងសន្និសីទ​សារព័ត៌មាន​មួយ នៅទីស្នាក់ការសមាគម កាលពីព្រឹកថ្ងៃទី១០ ខែមករានេះ។ លោក វន ពៅ ដែលកំពុង​ជាប់ឃុំ​នៅ​គុកត្រពាំងថ្លុក ក្នុងខេត្តកំពង់ចាម ជិតព្រំដែនប្រទេសវៀតណាម។

ប្រធានសមាគមប្រជាធិបតេយ្យឯករាជ្យសេដ្ឋកិច្ចក្រៅប្រព័ន្ធរូបនេះ ត្រូវបានកងកំលាំងប្រដាប់អាវុធ និងកងឆ័ត្រ​យោងលេខ ៩១១ ចាប់ខ្លួនតាំងពីថៃ្ងទី២ ខែមករាកន្លងទៅនេះ នៅតំបន់សេដ្ឋកិច្ចភ្នំពេញ ខណៈពេលមានបាតុកម្ម ទាមទារប្រាក់ខែ១៦០ដុល្លា យ៉ាងខ្លាំងក្លាពីសំណាក់ក្រុមកម្មករ។ លោក វន ពៅ ត្រូវបានសាលាដំបូងរាជធានីភ្នំពេញ ចោទពីបទញុះញង់ប្រើអំពើហឹង្សា និងចោទប្រកាន់ពីបទល្មើសមាត្រា ២១៨ និង៤១៤ នៃក្រមព្រហ្មទណ្ឌ (ហិង្សា​ដោយ​ចេតនា និងការបំផ្លាញទ្រព្យ​សម្បត្តិ ដោយចេតនាដោយមានស្ថានទង្ងន់ទោស)។

អ្នកស្រី ប្រាក់ សុវណ្ណារី បានថ្លែងឲ្យដឹងទៀតថា លោក វ៉ន ពៅ មិនត្រូវ​បានអនុញ្ញាតអោយនិយាយស្តី ឬឆ្លង​ឆ្លើយ​ជា​មួយអ្នក​ដែលជាប់ក្នុង​ឃុំដទៃទៀតទេ ដោយឆ្មាំគុកទាំងនោះអះអាង​ថានេះជា«បទបញ្ជាថ្នាក់លើ»។ បើទោះជា​ការ​ជួប​គ្នាមានត្រឹមតែ២ដង និងម្ដងមានរយៈពេល១៥នាទីនេះក៏ដោយ ក៏ភរិយាលោក វន ពៅ​ រូបនេះ នៅតែឆ្លៀតឱកាស ផ្តល់ជា​កម្លាំង​ចិត្ត​អោយស្វាមីអ្នកស្រី ហើយប្ដេជ្ញាតស៊ួជាបន្ត ដើម្បីទាមទាររកយុត្តិធម៌ជូនលោកអោយ​ទាល់​តែបាន។

អ្នកស្រីបាន​អំពាវនាវ ទៅកាន់អង្គការក្រៅរដ្ឋាភិបាលនានា ក៏ដូចជាសហភាពអឺរ៉ុប ឲ្យដាក់សំពាធលើរដ្ឋាភិបាល ដើម្បីដោះ​លែង​ស្វាមីរបស់អ្នកស្រី និងមនុស្ស២២នាក់ទៀតដោយគ្មានលក្ខខណ្ឌ ព្រោះតែអ្នកស្រី បានអះអាងថា ពួកគេទាំងនោះមិនមានកំហុសអ្វីឡើយ។

សូមបញ្ជាក់ដែរថា សន្និសីទសារព័ត៌មានខាងលើ ត្រូវបានរៀបចំចាត់ចែងឡើង ដោយសមាគមចំនួនប្រាំពីរផ្សេងគ្នា ដែលសុទ្ធតែធ្វើការស្និតនឹង កម្មករ កសិករ មន្ត្រីរាជការ និងសិទ្ធិមនុស្ស។ សន្និសីទសារព័ត៌មាននេះ ផ្ដោតសំខាន់លើ​គោលជំហរ និងការជជែក​ពិភាក្សាលើប្រធានបទ ទាមទារអោយមានការដោះលែងអ្នកជាប់ឃុំទាំង២៣នាក់ បពា្ឈប់​អំពើហឹង្សា និង​ទាមទារ​ប្រាក់ឈ្មួល១៦០ដុល្លារ សម្រាប់កម្មករគ្រប់វិស័យ។

ជុំវិញ​ការចាប់ខ្លួនប្រធានសមាគម និងបណ្ដាជនផ្សេងទៀត ក្នុងអំឡុងនៃការបង្ក្រាបរបស់កងកម្លាំងអាជ្ញាធរ កាល​ពី​ថ្ងៃទី០២ និងថ្ងៃទី០៣ ខែមករានេះ អង្គការជាតិ និងអន្តរជាតិជាច្រើន សម្ដែងប្រតិកម្មដោយបានចាត់ទុក ថានោះ​ជា​ការរំលោភសិទ្ធិមនុស្ស និងច្បាប់ធ្ងន់ធ្ងរ។ នៅក្នុងសេចក្ដីថ្លែងការណ៍របស់ក្រុមអង្គការសង្គមស៊ីវិល​ទាំងនោះ ក៏បាន​វាយតម្លៃដែរថា សកម្មភាពបង្ក្រាបរបស់កងកម្លាំងបញ្ជាដោយរដ្ឋាភិបាលនេះ បានធ្វើឲ្យដើរថយ​ក្រោយ នូវលទ្ធិ​ប្រជាធិបតេយ្យនៅកម្ពុជា ដែលកំពុងមានភាពផុយស្រួយស្រាប់៕

---------------------------------------------
ដោយ ក. ស៊ន សុខឃៀង (ទំនាក់ទំនង៖ [email protected]) - ភ្នំពេញ ថ្ងៃទី១០ ខែមករា ឆ្នាំ២០១៤