ដោះលែងសកម្មជនដីធ្លីបឹងកក់ទាំង៥នាក់វិញ ក្រោយធ្វើកិច្ចសន្យារួច?
- ដោយ: សេក មនោរកុមារ
- កែប្រែចុងក្រោយ: January 06, 2014
- ប្រធានបទ:
- អត្ថបទ: មានបញ្ហា?
- មតិ-យោបល់
-
សកម្មជនដីធ្លីបឹងកក់ទាំង៥នាក់ រួមមាន អ្នកស្រី ទេព វន្នី អ្នកស្រី យ៉ោម បុប្ផា អ្នកស្រី បូ ឆវី អ្នកស្រី ផាន់ ឈុនរ៉េត និងអ្នកស្រី សុង ស្រីលាភ ត្រូវបានដោះលែងវិញហើយនៅរសៀលថ្ងៃចន្ទនេះ បន្ទាប់ពីមានការអន្តរាគមន៍ពីមន្ត្រីសិទ្ធិមនុស្ស នៃអង្គការសហប្រជាជាតិប្រចាំនៅកម្ពុជា។ ប៉ុន្តែប្រភពស្និតនឹងអាជ្ញាធរ បាននិយាយថា ស្ត្រីទាំងប្រាំនាក់ត្រូវបានដោះលែង បន្ទាប់ពីបានធ្វើកិច្ចសន្យាមួយ ឈប់ប្រមូលផ្ដុំគ្នាធ្វើបាតុកម្ម«អនាធិបតេយ្យ»ក្នុងសង្គមតទៅទៀត។
ក្រុមអ្នកតវ៉ាដីធ្លី មកពីសហគមន័បឹងកក់។ (រូបថត MONOROOM.info/ Senghong)
សណ្ដាប់ធ្នាប់ - នៅវេលាម៉ោង៤និង៣៧នាទីល្ងាចថ្ងៃទី៦ ខែមករា ឆ្នាំ២០១៤នេះ ស្ត្រីប្រជាសហគមន៍ពីតំបន់បឹងកក់ ចំនួន៥នាក់ ត្រូវបានដោះលែងឲ្យមានសេរីភាពវិញហើយ បន្ទាប់ពីពួកគាត់ត្រូវបានគេចាប់ដាក់ក្នុងរថយន្ដ ដឹកនាំចេញទៅ កាលពីវេលាម៉ោងប្រមាណជា ៧កន្លះព្រឹកថ្ងៃដដែល។
សូមអានអត្ថបទ ដែលទាក់ទងនឹងប្រធានបទនេះ៖
» ស្ត្រីសកម្មជនសិទ្ធិលំនៅដ្ឋានបឹងកក់ប្រាំនាក់ ត្រូវបានចាប់ខ្លួន«ឆៅ»
សូមរលឹកថា ក្រុមប្រជាសហគមន៍ទាំងប្រាំនាក់នេះ ត្រូវបានមនុស្សមួយក្រុម ជិះរថយន្ដទ្រុងធុនធំចំនួនពីរគ្រឿង និងរថយន្ដទេសចរណ៍មួយគ្រឿងមកឈប់ ចុះព័ទ្ធចាប់ដាក់បញ្ចូលទៅក្នុងរថយន្ដទេសចរណ៍ ដឹកនាំចេញទៅបាត់ ដោយគ្មាន«ដីកាចាប់ខ្លួន» និងមិនមានសាកសួរអ្វីទាំងអស់។
ហេតុការណ៍នេះបានកើតឡើង នៅពេលដែលក្រុមសកម្មជនទាំងនេះ បានដើរមកដល់ចំណុច មុខមន្ទីរវះកាត់បេះដូង ជិតកាច់ជ្រុងផ្លូវកែងនៃស្ថានទូតបារាំង ក្នុងបំណងចង់ដាក់ញាតិ ទៅកាន់ស្ថានទូតបារាំង ដើម្បីស្នើសុំឲ្យស្ថានទូតមួយនេះ ជួយធ្វើអន្តរាគមន៏លើករណីចាប់ខ្លួន លោក វ៉ង ពៅ និង ជនផ្សេងៗទៀតចំនួនដប់នាក់ ព្រមទាំងរកយុត្តិធម៌ឲ្យជនរងគ្រោះ ក្នុងការប្រឈមមុខដោយហិង្សាកន្លងមក។
ប្រភពមួយស្និតនឹងអាជ្ញាធរ បាននិយាយថា បន្ទាប់ពីឃាត់ខ្លួនស្ត្រីទាំងប្រាំនាក់ និងបានធ្វើការសាកសួរនាំរួច គណៈបញ្ជាការឯកភាព រាជធានីភ្នំពេញ បានសម្រេចឲ្យធ្វើដោះលែងពួកគេវិញ។ ប៉ុន្តែប្រភពបានបញ្ជាក់ទៀត ស្រ្តីទាំង៥នាក់ ត្រូវបានទទួលការ«អប់រំ»ពីអាជ្ញាធរ និងបានធ្វើកិច្ចសន្យាចុះហត្ថលេខាមួយ ឲ្យឈប់ប្រមូលផ្ដុំគ្នាធ្វើបាតុកម្ម«អនាធិបតេយ្យ»ក្នុងសង្គមតទៅទៀត។
ប៉ុន្តែសម្រាប់មន្ត្រីសិទ្ធិមនុស្ស បាននិយាយថា ការដោះលែងនេះ ដោយសារការអន្តរាគមន៍ដ៏ស្វិតស្វាញ ពីមន្ត្រីសិទ្ធិមនុស្សនៃអង្គការសហប្រជាជាតិប្រចាំនៅកម្ពុជា៕
------------------------------------------------
ដោយ៖ សេក មនោរកុមារ - ប៉ារីស ថ្ងៃទី៦ ខែមករា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ