ចិន​អំពាវនាវ​ឲ្យ​ភាគី​ជម្លោះ​នៅ​កម្ពុជា ជជែក​គ្នា

អ្នកនាំពាក្យក្រសួងការបរទេសចិន លោកស្រី ហួរ ឈុនយីង (Hua Chunying) បានធ្វើការអំពាវនាវឲ្យភាគីជម្លោះទាំងអស់ នៅក្នុងប្រទេសកម្ពុជា ដោះស្រាយការខ្វែងគំនិតរបស់ពួកគេ តាមរយៈការជជែកគ្នា។ នេះជាការផ្សាយឲ្យដឹង របស់ទីភ្នាក់ងារសារព័ត៌មានចិន ស៊ីនហួរ នៅប៉ុន្មានម៉ោងមុននេះ។
Loading...
  • ដោយ: កេសរ កូល
  • កែប្រែចុងក្រោយ: January 01, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

អ្នកនាំពាក្យក្រសួងការបរទេសចិន លោកស្រី ហួរ ឈុនយីង (Hua Chunying) បានធ្វើការអំពាវនាវឲ្យ​ភាគីជម្លោះ​ទាំងអស់ នៅក្នុងប្រទេសកម្ពុជា ដោះស្រាយការខ្វែងគំនិតរបស់ពួកគេ តាមរយៈការជជែកគ្នា។ នេះជាការផ្សាយ​ឲ្យ​ដឹង របស់ទីភ្នាក់ងារសារព័ត៌មានចិន ស៊ីនហួរ នៅប៉ុន្មានម៉ោងមុននេះ។


លោក សម រង្ស៊ី (ខាងឆ្វេង) និងលោក ហ៊ុន សែន ចាប់ដៃគ្នានៅមន្ទីរដ្ឋសភាជាតិ ថ្ងៃទី១៧ខែកញ្ញាឆ្នាំ២០១៣។ (រូបថត MONOROOM.info/ O. Vary)

នយោបាយកម្ពុជា - «យើងសង្ឃឹមថាគ្រប់ភាគីកម្ពុជាទាំងអស់ នឹងគិតផលប្រយោជន៍ជាតិ ជាអាទិភាព ប្រើប្រាស់​ដំណោះស្រាយតាមផ្លូវច្បាប់ ដើម្បីរកច្រកចេញពីវិបត្តិ និងរក្សាឲ្យបាននូវស្ថិរភាព និងសុខសន្តិភាពរបស់​ប្រទេស​របស់ពួកគេ។» នេះជាការថ្លែងឲ្យដឹងរបស់លោកស្រី ហួរ ឈុនយីង ដកស្រង់ដោយទីភ្នាក់ងារសារព័ត៌មាន ស៊ីនហួរ នៅក្នុងសន្និសិទសារព័ត៌មានមួយ កាលពីល្ងាចថ្ងៃទី៣១ ខែធ្នូ ឆ្នាំ២០១៣ ដែលក្រសួងការបរទេសចិន តែងធ្វើជា​រៀងរាល់ថ្ងៃ។

លោកស្រី ហួរ បានពន្យល់បកស្រាយបែបនេះ នៅពេលមានអ្នកការសែតបានសាកសួរ សុំប្រតិកម្មរបស់ក្រសួង​ការបរទេសចិន ទាក់ទងនឹងបាតុកម្មដែលរៀបចំឡើងជាបន្តបន្ទាប់ ដោយគណបក្សសង្គ្រោះជាតិ ដែលជា​គណបក្ស​ប្រឆាំងធំជាងគេ ក្នុងប្រទេសកម្ពុជា។

លោកស្រីបានពន្យល់បន្ថែមថា ក្នុងនាមប្រទេសជិតខាត និងជាមិត្តជិតស្និតនោះ ប្រទេសចិនគាំទ្រការ​ខិតខំ​ប្រឹង​ប្រែង ជាវិជ្ជមានរបស់រដ្ឋាភិបាលកម្ពុជា ដើម្បីរក្សាឲ្យបាននូវស្ថិរភាព និងនាំឆ្ពោះទៅរកការអភិវឌ្ឍន៍សេដ្ឋកិច្ច។ ទាក់ទង​នឹង​ចំណងទាក់ទងរវាងប្រទេសទាំងពីរ លោកស្រី ហួរ បានរំលឹកពីជំនួបជជែកគ្នា​ ដែលបានធ្វើឡើងរវាង​មេដឹកនាំនៃ​ប្រទេសទាំងពីរ កាលពីឆ្នាំ២០១៣ ដោយបានអះអាងថាមេដឹកនាំប្រទេសទាំងសងខាង បាន​ឈានមក​ដំណាក់កាល​ដ៏សំខាន់មួយ នៃការទាក់ទងមិត្តភាពទ្វេភាគី។

អ្នកនាំពាក្យរូបនេះ បានបញ្ជាក់ទៀតថា ក្រោមការអញ្ជើញរបស់ក្រុមប្រឹក្សារដ្ឋចិន លោក យ៉ាង ជីឈី (Yang Jiechi) ឧបនាយករដ្ឋមន្ត្រី និងជារដ្ឋមន្ត្រីការបរទេសកម្ពុជា លោក ហោ ណាំហុង នឹងធ្វើដំណើរទស្សនកិច្ច នៅថ្ងៃពុធនេះ នាទីក្រុងប៉េកាំង ក្នុងឱកាសនៃជំនួបលើកទីមួយនៃគណកម្មាធិការនៃកិច្ចសហប្រតិបត្តិការ នៃរដ្ឋាភិបាលនៃ​ប្រទេស​កម្ពុជា និងចិន។

សូមរំលឹកដែរថា ការលើកឡើងរបស់ក្រសួងការបរទេសចិន បានធ្វើឡើងក្រោយការថ្លែងរបស់លោក ឈាន វុន មន្ត្រី​ជាន់ខ្ពស់មួយ​រូប​ពីគណបក្សប្រជាជនកម្ពុជា ដែលជាគណបក្សកាន់អំណាច ដែលអះអាងថា ស្ថានទូតបរទេសយ៉ាង​ហោច​ណាស់ចំនួនបី ក្នុងនោះមានស្ថានទូតចិននោះផង គ្រោងនឹងផ្ញើរលិខិតចំហរទៅកាន់​គណបក្ស​សង្រ្គោះជាតិ ដើម្បី​លើក​ឡើងពីផលប៉ះពាល់ ដែលកើតចេញពីមហាបាតុកម្មអហិង្សា របស់គណបក្សប្រឆាំងមួយនេះ ទៅដល់​ក្រុម​អ្នកវិនិយោគទុនចិន ក្នុងប្រទេសកម្ពុជា។

ប្រទេសចិនត្រូវបានគេដឹងថា បានប្រកាន់គោលជំហរគាំទ្រ ការប្រកាសលទ្ធផលឆ្នោតសកល ដ៏ប្រទាំងប្រទើស កាលពីថ្ងៃទី២៨ ខែកក្កដា ឆ្នាំ២០១៣ ដែលឈានទៅដល់ ការបង្កើតរដ្ឋាភិបាលរបស់លោកនាយករដ្ឋមន្ត្រី ហ៊ុន សែន។ ប៉ុន្តែបណ្ដាអ្នករិះគន់ បាននិយាយថា ចិនជាប្រទេសកុម្មុយនីស មិនដែលស្គាល់ការបោះឆ្នោតម្ដងណាឡើយ ហើយអ្វីដែលប្រទេសបានប្រកាន់ជំហរសម្រាប់ប្រទេសកម្ពុជានោះ ដោយសារតែចិនសម្លឹងឃើញពីផល​ប្រយោជន៍​​សេដ្ឋកិច្ចតែប៉ុណ្ណោះ៕

------------------------------------------------
ដោយ ៖ កេសរកូល - ភ្នំពេញ ថ្ងៃទី០១ ខែមករា ឆ្នាំ២០១៤
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...